ءبىرىڭعاي مەديتسينالىق اقپاراتتىق ورتالىققا 26 مىڭنان استام ءوتىنىش تۇسكەن

شاراعا استانا قالاسى اكىمىنىڭ ورىنداسارى ەرمەك امانشايەۆ، دەنساۋلىق ساقتاۋ جانە الەۋمەتتىك دامۋ ءمينيسترىنىڭ ءبىرىنشى ورىنباسارى ساليدات قايىربەكوۆا، استانا قالاسى دەنساۋلىق ساقتاۋ باسقارماسىنىڭ باسشىسى ايگۇل سەگىزبايەۆا، سونىمەن قاتار قالالىق دەنساۋلىق ساقتاۋ مەكەمەلەرىنىڭ جەتەكشىلەرى قاتىستى.

ا. سەگىزبايەۆا اتاپ وتكەندەي، استانادا تۇرعىندارعا كورسەتىلەتىن مەديتسينالىق قىزمەتتىڭ ساپاسىن ارتتىرۋ بويىنشا جۇمىستار جۇرگىزىلىپ جاتىر. جاڭا ەمحانالار مەن اۋرۋحانالار اشىلۋدا، دارىگەرلەردىڭ بىلىكتىلىگىن ارتتىرۋ كۋرستارى ۇيىمداستىرىلۋدا، مەديتسينالىق مەكەمەلەردە ەمدەۋدىڭ يننوۆاتسيالىق جۇيەلەرى ەنگىزىلۋدە.

«تۇرعىندارمەن Call-ورتالىقتار ارقىلى بايلانىس ورناتىلدى، 1300 نومەرىنە، مىسالى، 2014 -جىلى 26 مىڭنان استام ءوتىنىش كەلىپ تۇسكەن. سونداي- اق مەديتسينالىق مەكەمەلەردىڭ سايتتارى ىسكە قوسىلدى. بارلىق سايتتاردا ينتەراكتيۆتى توپتار قۇرىلدى، تۇرعىندار ونلاين كونسۋلتاتسيا الا الادى، وسىنىڭ ءبارى دارىگەرلەردى نەگىزسىز شاقىرتۋدى ازايتادى»، - دەدى دەنساۋلىق ساقتاۋ باسقارماسىنىڭ باسشىسى.

انا مەن بالا ءولىمى كورسەتكىشتەرىن ازايتۋ بويىنشا دا جۇيەلى جۇمىستار اتقارىلۋدا. №1 پەريناتالدى ورتالىق نەگىزىندە سابيلەردىڭ ءومىرىن ساقتاۋ ءۇشىن قازىرگى زامانعى وتالار جاسالادى. استانا قالاسى دەنساۋلىق ساقتاۋ باسقارماسى جاڭا باستاپقى مەديتسينالىق- سانيتارلىق كومەك ورتالىقتارىن اشۋ، قالالىق ەمحانالاردا كەزەكتى ازايتۋ، ۋچاسكەلىك دارىگەرلەردىڭ قىزمەتىنىڭ ساپاسىن ارتتىرۋ مىندەتتەرىن العا قويىپ وتىر.

ءوز كەزەگىندە ساليدات قايىربەكوۆا بيۋدجەتتىك قارجىنى ءتيىمدى پايدالانىپ، تۇرعىندارعا كورسەتىلەتىن قىزمەت ساپاسىن ودان ءارى ارتتىرۋ كەرەك ەكەندىگىن جەتكىزدى.

www.khabar.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى