كەدەن سالىعىنان جالتارعان كومپانيالاردان تاعى 26,3 ميلليارد تەڭگە ءوندىرىلدى - باس پروكۋرور
بۇل تۋرالى باس پروكۋرور بەرىك اسىلوۆ تۆيتتەردەگى پاراقشاسىندا جازدى.
«كەدەن سالاسىنداعى جۇمىستى جالعاستىرۋ ءۇشىن قاداعالاۋ اكىسى بويىنشا س ە ق- تىڭ جەكەلەگەن قاتىسۋشىلارىنان مەملەكەت كىرىسىنە قوسىمشا 26,3 ميلليارد تەڭگە كەدەندىك تولەمدەر مەن سالىقتار وندىرىلگەنىن اتاپ وتكىم كەلەدى. وسى سالاداعى پروكۋرورلاردىڭ تەكسەرۋلەرى ناتيجەسىندە مەملەكەتتىك بيۋدجەت 47,5 ميلليارد تەڭگەگە تولىقتىرىلدى»، - دەيدى بەرىك اسىلوۆ.
مەملەكەت باسشىسىنىڭ تاپسىرماسى بويىنشا بيىل جىل باسىندا پروكۋراتۋرا ورگاندارىنىڭ كەدەن سالاسىنا جۇرگىزگەن تەكسەرۋلەرى بارىسىندا سىرتقى ەكونوميكالىق قىزمەتتىڭ جەكەلەگەن قاتىسۋشىلارى قىتايدان تاۋار تاسىمالداۋ نارىعىن مونوپوليالاندىرىپ العانى ءمالىم بولدى.
«سىرتقى ەكونوميكالىق قىزمەت جەكەلەگەن قاتىسۋشىلارىنىڭ ءارقايسىسى بەلگىلى ءبىر تاۋارعا (اياق كيىم، كيىم، قوسالقى بولشەكتەر، تەحنيكا، جەمىس، كوكونىس جانە ت. ب. ) ماماندانىپ، ەلدىڭ ناقتى ايماقتارىن ءوز اراسىندا بولگەن. كەدەندىك تولەمدەردى تولەۋدەن جالتارۋ ءۇشىن يمپورتتاۋشىلار توبى 2019-2021 -جىلدارى قازاقستان رەسپۋبليكاسىنداعى كەدەندىك رەتتەۋ تۋرالى كودەكستىڭ تالاپتارىن بۇزا وتىرىپ، اكەلىنەتىن تاۋارلاردىڭ قۇنىن جۇيەلى تۇردە تومەندەتىپ وتىرعان»، - دەپ حابارلاعان ەدى باس پروكۋراتۋرانىڭ باسپا ءسوز قىزمەتى.
باس پروكۋراتۋرانىڭ ۇسىنۋى بويىنشا مەملەكەتتىك كىرىستەر كوميتەتى 10 كومپانياعا 107 ميلليارد تەڭگە كەدەندىك تولەمدەر مەن سالىقتاردى قوسىمشا ەسەپتەۋ تۋرالى حابارلاما بەردى. بۇعان دەيىن سىرتقى ەكونوميكالىق قىزمەتتىڭ 7 قاتىسۋشىسى بيۋدجەتكە 21 ميلليارد تەڭگە قايتارعانى حابارلاندى.
