زياندى وندىرىستە 25 جىل جۇمىس ىستەگەندەرگە زەينەتاقى تولەنۋى مۇمكىن
بۇگىن ماجىلىستە تىلشىلەر مينيستردەن زياندى وندىرىستە ىستەيتىن جۇمىسشىلاردى زەينەتكە ەرتە شىعارۋ ماسەلەسى جايىندا سۇراق قويدى.
«بۇل سالاعا مينيسترلىك ءتيىستى ۇسىنىستارىن جولدادى. جالپى مەديتسينالىق تۇسىنىكتەمەلەرگە قاراساق، ەگەر ازامات 25 جىل بويى اۋىر جۇمىستا ىستەسە، ولاردىڭ كاسىبي جۇمىسقا قابىلەتتىلىگى تومەندەيدى. اتاپ ايتقاندا، 25 جىل ەڭبەك ءوتىلى بولسا، وسى سالادا ەكى ماسەلەنى قاراستىرىپ وتىرمىز»، - دەدى ت. دۇيسەنوۆا.
ونىڭ ايتۋىنشا، بۇل تۇرعىدا جۇمىس بەرۋشىلەردىڭ مىندەتتى كاسىبي زەينەتاقى جارنالارى ەسەبىنەن بىردەن زەينەتاقى تولەۋ قاراستىرىلىپ وتىر. وسى باعىتتا ەڭبەك ءوتىلى ەسكەرىلەدى. ەكىنشىدەن، جۇمىسشى كاسىبي ەڭبەك ەتۋ قابىلەتىن 5 تەن 30 پايىزعا دەيىن جوعالتسا، سول كاسىبي زەينەتاقىعا قوسىمشا ساقتاندىرۋ قورىنىڭ قاراجاتىنان تولەم جاساۋ ماسەلەسى پىسىقتالدى.
«سونىمەن قاتار، مەملەكەت جاعىنان زياندى وندىرىستە جۇمىس ىستەگەن ادامداردى قولداۋدىڭ ءۇش دەڭگەيلى الەۋمەتتىك قامتاماسىز ەتۋ ماسەلەسى بويىنشا ۇسىنىس جاسالدى. قازىر ساقتاندىرۋ كومپانيالارىنىڭ ەسەپ-قيسابىن كۇتىپ وتىرمىز. تاياۋ كۇندەرى بۇل كومپانيالاردىڭ ەسەپتەپ شىققان دەرەكتەرىن قاراستىرامىز»، - دەدى مينيستر.
بۇدان بۇرىن حابارلانعانداي، بيىل زياندى ەڭبەك جاعدايىندا جۇمىس ىستەيتىندەردى الەۋمەتتىك قورعاۋ تاسىلدەرى ازىرلەندى.
