شاحتينسكىدەگى اپات: شاحتالاردى ۋلى قالدىقتاردان زالالسىزداندىرۋ 25 جىل بويى جۇگىزىلمەگەن
بۇل تۋرالى توتەنشە جاعدايلار مينيسترلىگى ونەركاسىپتىك قاۋىپسىزدىك كوميتەتىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات ءتىلشىسى.
«ارسەلورميتتال تەمىرتاۋ» اكسيونەرلىك قوعامىنا كومىر شاحتالارىنىڭ تاۋ- كەن قازبالارىن قاۋىپسىز كۇيدە ۇستاپ، ولاردى جەلدەتىپ ءارى قاۋىپسىزدىك بويىنشا تەحنولوگيالىق جۇمىستاردى جۇرگىزەتىن قىزمەتكەرلەردىڭ شتاتىن جاساقتاۋ قاجەت. سونىمەن قاتار، قاجەتتى جابدىقتاردى بەلگىلەنگەن مەرزىمدە ۋاقتىلى اۋىستىرۋى ءتيىس. ياعني، بەكىتىلگەن نەگىزگى جەلدەتۋ قۇرىلعىلارىن پايدالانۋ مەرزىمى - 14 جىل. قازىرگى كەزدە مۇندا 1970-1980 جىلداردان باستاپ قولدانىلىپ كەلە جاتقان جەلدەتكىشتەر اپاتتى جاعدايدا تۇر»، - دەپ ءمالىم ەتتى باسپا ءسوز قىزمەتىنەن.
سونداي- اق، كوميتەت اقپاراتى بويىنشا كومىر وندىرىلەتىن قاباتتارداعى ۋلى گاز سياقتى زياندى قالدىقتاردى زالالسىزداندىرۋ بۇرعىلانعان ۇڭعىمالار ارقىلى نەگىزگى جۇمىستار باستالعانعا دەيىن جاسالۋى ءتيىس. ال «ارسەلورميتتال تەمىرتاۋ» شاحتالاردا جەر قويناۋىن پايدالانۋعا ارنالعان كەلىسىمشارت قابىلدانعان 25 جىلدىڭ ىشىندە اتالعان باعىتتاعى جۇمىستاردى جۇرگىزبەگەن.
«ونەركاسىپتىك قاۋىپسىزدىك جونىندەگى بارلىق اتالعان ءىس- شارالاردى، تاۋەلسىز ساراپتامالىق ۇيىمداردىڭ ۇسىنىمدارىن ورىنداۋ - رەسپۋبليكانىڭ ءقاۋىپتى وندىرىستىك وبەكتىلەرىندەگى اپاتتار مەن وندىرىستىك جاراقاتتاردىڭ سانىن ازايتۋعا مۇمكىندىك بەرەدى دەپ سانايمىز. لەنين اتىنداعى شاحتادا بولعان اپاتتىڭ بارلىق سەبەپتەرى تەرگەۋ قورىتىندىلارى بويىنشا انىقتالاتالادى. سونداي- اق، وسىنداي اپاتتاردىڭ الدىن الۋ ءۇشىن ءتيىستى ءىس- شارالار ازىرلەنەتىنىن حابارلايمىز»، - دەلىنگەن كوتميتەتتىڭ باسپا ءسوز قىزمەتى تاراتقان حابارلامادا.
قۇزىرلى ورگان مالىمەتىنشە، ونەركاسىپ قاۋىپسىزدىگى سالاسىنداعى مەملەكەتتىك باقىلاۋ مەن قاداعالاۋ قولدانىستاعى زاڭناماعا سايكەس، جىلىنا ءبىر رەت جۇرگىزىلەدى. تەكسەرۋ جۇمىستارىنىڭ مەرزىمى بۇرىن 30 كۇن بولسا، قازىر ول 15 كۇنىنە دەيىن قىسقارتىلعان. كوميتەت اقپاراتىنا قاراعاندا، جىل سايىن جاڭادان اشىلىپ جاتقان كاسىپورىندار سانى ارتىپ، ونەركاسىپتىك قاۋىپسىزدىك سالاسىنداعى تەكسەرۋلەردى جۇزەگە اسىراتىن ينسپەكتورلىق قۇرام شتاتى قىسقارعان. اتاپ ايتقاندا، 1640 ادامنان قازىرگى تاڭدا 381 قىزمەكتكەر عانا جۇمىس ىستەيدى.
