قازاقستان قۇراماسى ازيا چەمپيوناتىنان 25 مەدال جەڭىپ الدى
ازيا بىرىنشىلىگىنە 18 ەلدەن كەلگەن 200 شاقتى سپورتشى قاتىستى. ەل نامىسىن MMA ۇلتىق قۇراماسىنىڭ 37 سپورتشىسى قورعاعان، دەپ حابارلايدى قازاقپارات.
قازاقستاننىڭ قۇراماسى 7 التىن، 8 كۇمىس جانە 10 قولا جۇلدەگە يە بولدى.
جاستار اراسىندا 61,2 كەلى سالماقتا فينالدىق بەلدەسۋدە ادەل ماحامەتوۆا (الماتى وبلىسى) وزبەك سپورتشىسى زەبينيسو وتاكۋلوۆانى ءۇشىنشى راۋندتا تەحنيكالىق نوكاۋتپەن اياقتاپ، قازاقستان قورجىنىنا العاشقى التىندى سالدى.
جاستار اراسىندا 56,7 كەلىگە دەيىنگى سالماقتا ەرسۇلتان شاكەنباي (استانا) فينالدىق بەلدەسۋدە تورەشىلەردىڭ شەشىمىمەن موڭعوليالىق وتگونبااتار بولتبااتاردى جەڭىپ، سپورتتىق مانسابىنداعى تاعى ءبىر التىندى قانجىعاسىنا بايلادى.
ايتا كەتەيىك، ەرسۇلتان 16-17 جاس ارالىعىنداعى جاسوسپىرىمدەر، 18-20 جاس ارالىعىنداعى جاستار اراسىندا الەم چەمپيونى، ورتالىق ازيا، ەۋروپا چەمپيونى، ال ەندى ازيا چەمپيونى اتاعىن دا باعىندىردى.
83,9 كەلىگە دەيىنگى ورتا سالماقتا (جاستار) فينالدا ەكى قازاقستاندىق - دەنيس چەرەپەنكو (جامبىل وبلىسى) مەن دياس وسەر (الماتى) كەزدەستى.
ءۇش راۋند بويى بەلدەسىپ، دياس وسەر ءبىراۋىزدان جەڭىسكە جەتىپ، MMA بويىنشا ازيا چەمپيونى اتاندى. چەرەپەنكو ەكىنشى ورىندى يەلەندى.
جاستار اراسىندا 65,8 كەلى سالماقتا سامعات شابدان (ب ق و) تورەشىلەردىڭ شەشىمىمەن تاجىكستاندىق ۋمرونجون مانسۋروۆتان ۇتىلىپ، كۇمىس جۇلدەگەر اتاندى.
ەرەسەكتەر اراسىندا 10 قازاقستاندىق سپورتشى ازيا چەمپيوناتىنىڭ «التىنىنا» تالاستى.
47,6 كەلىگە دەيىنگى سالماقتاعى العاشقى بەلدەسۋدە ەكى قازاقستاندىق قىز - تۇيمەگۇل ءجۇنىس (شىمكەنت) پەن قىمبات احمەت (تۇركىستان وبلىسى) كەزدەسۋى ءتيىس ەدى.
ءبىراق قىزدار جەكپە- جەكسىز جەڭىس تۇعىرىن بىلايشا ءبولىستى: احمەت چەمپيون اتاندى، ءجۇنىس ەكىنشى ورىندى يەلەندى.
52,2 كەلى سالماقتا ەرۇلان قابدۋلوۆ (اتىراۋ وبلىسى) تاجىكستاندىق يسروفيل توليبزودامەن كەزدەستى. ءۇش راۋندتىڭ قورىتىندىسى بويىنشا تورەشىلەر جەڭىستى قازاقستاندىققا بەردى.
ءدال وسى سالماقتا قىزدار اراسىندا ماتيلدا باچۋرينا (اقمولا وبلىسى) باحرەين اتىنان شىققان ايزا راموسپەن كەزدەستى.
باچۋرينا قولعا اۋىرتۋ ادىسىنە ءتۇسىپ، جەڭىلىسكە ۇشىراپ، ەكىنشى ورىن الدى.
قىزدار اراسىندا 56,7 كەلىگە دەيىنگى سالماقتا ايگەرىم تورەحانوۆا (شىمكەنت) باحرەين اتىنان شىعاتىن برازيليالىق فابيولا سيلۆادان تەحنيكالىق نوكاۋتپەن ۇتىلىپ، كۇمىس جۇلدەگەر اتاندى.
قىزدار اراسىندا 65,8 كەلىگە دەيىنگى سالماقتا ءمولدىر اشىربەكوۆا (الماتى وبلىسى) باحرەين سپورتشىسى سابرينا دە سوۋزادان جەڭىلىپ قالدى.
70,3 كەلىگە دەيىنگى سالماقتا بەلگىباي ادىلبەك (تۇركىستان وبلىسى) ءبىراۋىزدان شەشىممەن تاجىكستاندىق ماسۋد ودينايەۆقا ەسە جىبەرىپ، ەكىنشى ورىندى يەلەندى.
جارتىلاي ورتا سالماقتا 77,1 كەلىگە دەيىنگى سالماقتا ونەر كورسەتكەن دوسجان كەنجەبايەۆ (الماتى وبلىسى) تورەشىلەردىڭ شەشىمىمەن رامازان گيتينوۆتەن ۇتىلىپ، كۇمىس جۇلدەگەر اتاندى.
93 كەلىگە دەيىنگى سالماقتا اليك دومنيچ (استانا) انۆار لانگارچيەۆتى ءسوزسىز جەڭىپ، ازيا چەمپيونى اتاندى.
120,2 كەلىدەن جوعارى سالماق دارەجەسىندە ونەر كورسەتكەن راسۋل حاتايەۆ (ماڭعىستاۋ وبلىسى) تاجىكستاندىق شاكرۋح فاتويەۆتى قىلقىندىرۋ ادىسىمەن جەڭىپ، التىن جۇلدە الدى.
قازاقستان قۇراماسى كوماندالىق ەسەپتە جاستار اراسىندا ەكىنشى جانە ەرەسەكتەر اراسىندا ەكىنشى ورىندى يەلەندى.
