ۇلتتىق مەرەكە رەتىندە 25-قازاندى بەكىتۋ - ەلدىك ءارى ەگەمەندىك تۇرعىسىنان ماڭىزدى قادام - اشىمبايەۆ
بۇل تۋرالى سەنات ءتوراعاسى ماۋلەن اشىمبايەۆ ايتتى، دەپ حابارلايدى قازاقپارات ءتىلشىسى.
ايتا كەتەيىك، بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كينەماتوگرافيا، مادەنيەت جانە مەرەكەلەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى قابىلداندى. قۇجاتتا 25-قازانداعى رەسپۋبليكا كۇنىن ۇلتتىق مەرەكە رەتىندە بەلگىلەيتىن نورما ەسكەرىلگەن.
«قابىلدانعان زاڭ مادەنيەت جانە كينەماتوگرافيا سالاسىنداعى مەملەكەتتىك ساياساتتىڭ قۇقىقتىق- ەكونوميكالىق، الەۋمەتتىك جانە ۇيىمداستىرۋشىلىق نەگىزدەرىن جەتىلدىرۋگە باعىتتالعان. جاڭا نورمالار مادەني ءىس-شارالاردى جوعارى دەڭگەيدە وتكىزۋگە جانە حالقىمىزدىڭ تاريحى مەن مادەنيەتىن كەڭىنەن دارىپتەۋگە مۇمكىندىك بەرەدى دەپ ەسەپتەيمىز. سونداي-اق وسى زاڭعا سايكەس، 25-قازان ۇلتتىق مەرەكە - رەسپۋبليكا كۇنى بولىپ بەكىتىلدى. بۇل تاريحي جانە وتە ماڭىزدى شەشىم. ەلىمىزدىڭ تاۋەلسىزدىگى شىن مانىندە وسى كۇننەن باستالادى. سول سەبەپتى وسى كۇندى ۇلتتىق مەرەكە رەتىندە بەكىتۋ - ەلدىك ءارى ەگەمەندىك تۇرعىسىنان ماڭىزدى قادام. الداعى ۋاقىتتا بۇل مەيرام تاۋەلسىزدىگىمىزدى دارىپتەۋگە جانە نىعايتۋعا ءوز ۇلەسىن قوسادى دەپ سەنەمىز»، - دەدى م. اشىمبايەۆ.
ءوز كەزەگىندە سەناتور نۇرتورە ءجۇسىپ 25-قازانداعى رەسپۋبليكا كۇنىنىن ۇلتتىق مەرەكە رەتىندە قابىلداۋ ەرەكشە وقيعا ەكەنىن اتاپ ءوتتى.
«قازاقستان تاۋەلسىزدىگى وسى داتادان باستالادى. سوندىقتان وسىنداي تاريحي شەشىمگە كۋا بولىپ وتىرمىز. قازاقستان حالقى ۇلتتىق مەرەكە رەتىندە 25-قازاندى جوعارى مارتەبەمەن تويلايتىن بولادى»، - دەدى ن. ءجۇسىپ.
اۆتور رۋسلان عابباسوۆ
