قازاقپارات كۇنتىزبەسى: 25- ناۋرىز

حالىقارالىق قۇلدىق جانە ترانساتلانتيكالىق قۇل ساۋداسى قۇرباندارىن ەسكە الۋ كۇنى

قۇلدىقتا جانە قۇلدىقتان ازات ەتۋ ءۇشىن كۇرەستە قازا بولعانداردى قۇرمەتپەن ەسكە الۋ ماقساتىندا - ب ۇ ۇ باس اسسامبلەياسى 2006-جىلعى قاراشادا 2007-جىلعى ناۋرىزدىڭ 25 ىندە ترانساتلانتيكالىق قۇل ساۋداسىن جويۋدىڭ 200 جىلدىعىن مەرەكەلەۋدىڭ حالىقارالىق كۇنى رەتىندە اتاپ ءوتۋ تۋرالى قاۋلى قابىلدادى.

2007-جىلدىڭ سوڭىندا ب ۇ ۇ باس اسسامبلەياسى قارار قابىلداپ، مەملەكەتتەردى جىل سايىن ناۋرىزدىڭ 25 ءىن حالىقارالىق قۇلدىق قۇرباندارىن جانە ترانساتلانتيكالىق قۇل ساۋداسىن ەسكە الۋ كۇنى تۇرعىسىندا اتاپ وتۋگە شاقىردى.

حالىقارالىق كۇزەتكە الىنعان جانە ءىز-ءتۇزسىز جوعالعان قىزمەتكەرلەرمەن ىنتىماقتاستىق كۇنى

بۇل كۇن ءىس-قيمىلداردى جۇمىلدىرۋعا، ادىلدىكتى تالاپ ەتۋگە جانە ب ۇ ۇ- نىڭ بىتىمگەرلەرى مەن قىزمەتكەرلەرىن، سونداي-اق ب ا ق پەن ۇكىمەتتىك ەمەس ۇيىمداردىڭ وكىلدەرى بولىپ تابىلاتىن ارىپتەستەردى قورعاۋعا دەگەن شەشىمىن نىعايتۋعا ارنالعان.

بۇل كۇن كەزدەيسوق تاڭدالعان جوق. 1985-جىلى 25- ناۋرىزدا پالەستينالىق بوسقىندارعا كومەكتەسۋدە جانە جۇمىستى ۇيىمداستىرۋدا ب ۇ ۇ تاياۋ شىعىس اگەنتتىگىندە جۇمىس ىستەگەن جۋرناليست الەك كولەتت ۇرلانعان.

ونى ليۆانداعى پالەستينالىق بوسقىندار تۋرالى ماقالانى جاساۋ كەزىندە قارۋلى تەرروريستەر ۇرلاپ اكەتكەن.

ەستە قالار وقيعالار

1930-جىلى بالقاش كولىنە ىرگەلەس بارىبايەۆ، قازىرگى بالقاش اۋدانىنا قاراستى باقالى جەرىندە بارىبايەۆ شارۋالار كوتەرىلىسى بولدى. كەڭەس وكىمەتىنىڭ ۇجىمداستىرۋ، جاپپاي قۋعىن-سۇرگىن ساياساتى مەن اشارشىلىق قاۋپىنە شىداماعان جەرگىلىكتى شارۋالار ۇيىمداسقان قارسىلىققا شىقتى.

باقالى اۋىل تۇرعىندارى قۇسمادي احمەتجانوۆ، قۇرامىس يبراگيموۆ، جاقىپباي ساۋقىمبايەۆ 100 دەن استام ادامدى ۇيىمداستىرىپ، كورشى اۋىلدارعا ۇگىتشىلەر جىبەردى.

كوتەرىلىسشىلەر وتريادقا بىرىگىپ، باقالى كوممۋناسىن باسىپ الدى، اۋىلدىق كەڭەستى تاراتىپ جىبەردى. ەلدەن كۇشپەن جينالعان 100 پۇت استىقتى، 100 باس جىلقىنى، باسقا دا مال مەن مۇلىكتى جۇرتقا تاراتىپ بەردى.

الماتى مەن سەمەيدەن اسكەر كۇشىن شاقىرتپاۋ ءۇشىن كوتەرىلىسشىلەردىڭ ارنايى توبى بالقاش جاعىنداعى تەلەفون بايلانىسىنىڭ سىمدارىن ءۇزىپ، تەمىر جول تابانىنىڭ التى بۋىنىن بوساتىپ، الىپ تاستادى. مىڭقۇم دەگەن جەردەگى 10 اۋىلدى باسىپ الدى. كوتەرىلىس باسشىسى قۇسمادي احمەتجانوۆ قىتاي شەكاراسىنان ءوتىپ كەتكەن بوسقىندارمەن، اقسۋ كوتەرىلىسشىلەرىمەن بايلانىس جاساپ، بىرلەسە قيمىلداۋعا تىرىستى.

ءبىراق اسكەر كۇشتەرى الدىن-الا شەكارانى نىعايتىپ، وعان جول بەرمەدى. شەكاراشىلار قىتاي جاعىنان كومەككە كەلمەك بولعان قازاق وتريادىن قولعا ءتۇسىردى. بارىبايەۆ اۋدانىنداعى كوتەرىلىسشىلەر و گ پ ۋ- ءدىڭ 50 ادامدىق قارۋلى جەدەل اسكەري وتريادىنىڭ كۇشىمەن باسىلىپ، 29 ادام اتۋ جازاسىنا كەسىلدى.

1992-جىلى قازاقستان رەسپۋبليكاسى مەن فيليپپينى رەسپۋبليكاسى اراسىندا ديپلوماتيالىق قارىم-قاتىناستار ورناتىلعانى تۋرالى نوتا الماسۋ ءراسىمى ءوتتى. فيليپپينى قازاقستان تاۋەلسىزدىگىن 1992-جىلعى 22- قاڭتاردا مويىندادى.

1993-جىلى قازاقستان رەسپۋبليكاسى ەۋروپا قايتا قۇرۋ جانە دامۋ بانكىنىڭ مۇشەلىگىنە قابىلداندى. 2006 -جىلى سەمەيدە «قۇنانبايدىڭ قۋعىن- سۇرگىنگە ۇشىراعان ۇرپاعى» كىتابى جارىق كوردى.

كىتاپتىڭ اۆتورى - رەسپۋبليكالىق «اباي» قورىنىڭ پرەزيدەنتى بالتابەك ەرسالىموۆ. كىتاپ ستاليندىك قۋعىن-سۇرگىن جىلدارىنداعى وقيعالار تۋرالى بايان ەتەدى.

ب. ەرسالىموۆ «اباي» رەسپۋبليكالىق قورىن - وتكەن عاسىردىڭ 90-جىلدارىندا قۇرىلعالى بەرى باسقارىپ كەلەدى. كىتاپ ماتەريالدارىن ول 10 جىل بويى جيناپ، دايىنداعان. بۇل كىتاپتا وتكەن عاسىردىڭ 20-30-جىلدارىنداعى ۇجىمداستىرۋعا، اشارشىلىققا جانە قۋعىن-سۇرگىنگە بايلانىستى وقيعالار تۋرالى دەرەكتى ماتەريالدار كەلتىرىلەدى. بۇل باسىلىم ادەبيەت ءۇشىن عانا ەمەس، قازاق حالقىنىڭ تاريحى ءۇشىن دە ۇلكەن ماڭىزعا يە، دەيدى كىتاپتىڭ تانىستىرىلىمىنا قاتىسقان ستۋدەنتتەر، زيالى قاۋىم وكىلدەرى جانە قالا اكىمشىلىگىنىڭ وكىلدەرى.

2010-جىلى قازاقستاننىڭ ۇلتتىق بانكى «بارىس» مونەتاسىن اينالىمعا شىعاردى.

2012 -جىلى ەلباسى نۇرسۇلتان نازاربايەۆ وڭتۇستىك كورەياعا جۇمىس ساپارىمەن بارىپ، يادرولىق قاۋىپسىزدىك جونىندەگى ەكىنشى جاھاندىق سامميتكە قاتىستى.

2014 -جىلى قازاقستان مەن ا ق ش باسشىلارى نۇرسۇلتان نازاربايەۆ پەن باراك وباما يادرولىق قارۋدى تاراتپاۋ جانە يادرولىق قاۋىپسىزدىكتى نىعايتۋ سالاسىنداعى ىنتىماقتاستىق تۋرالى بىرلەسكەن مالىمدەمە جاسادى.

2015 -جىلى الماتىدا يۋنەسكونىڭ 70 جىلدىعىنا جانە العاشقى قازاقستاندىق يۋنەسكو كلۋبىنىڭ 10 جىلدىعىنا ورايلاستىرىلعان «يۋنەسكو جولىمەن: بەيبىتشىلىك. ونەر. جاستار» حالىقارالىق كوللوكۆيۋمى ءوتتى.

2017 -جىلى قازاقستاندىق دەلەگاتسيا مالايزياداعى لانگكاۆي ارالىنداعى اۋە-عارىشتىق جانە اسكەري-تەڭىز تەحنيكاسىنىڭ (LIMA-2017) حالىقارالىق كورمەسىنە قاتىستى.

كورمە تاقىرىبى - ازاماتتىق جانە اسكەري اۆياتسيا، گۋمانيتارلىق كومەككە قاتىسۋ، دۇلەي ءزىلزالالاردىڭ سالدارىن جويۋ، اۆياتسيالىق تەحنيكانى جوندەۋ جانە جاڭعىرتۋ جونىندەگى باعدارلامالار، دالدىگى جوعارى قارۋدى باسقارۋ جۇيەلەرى، اۆياتسيالىق جانە تەڭىز قارۋ-جاراعى، سۋ استى جۇمىستارىنا ارنالعان تەحنيكا مەن جاراقتاندىرۋ، ۇشقىشسىز ۇشۋ اپپاراتتارى،

تەحنيكالىق بارلاۋ قۇرالدارى، قول جەتكىزۋدى باقىلاۋ قۇرالدارى، ترەناجەرلەر جانە وقۋ باعدارلامالارى.

2018 -جىلى قازاقستان حوككەي تاريحىندا العاش رەت جاستار كومانداسى ۋليانوۆ (رەسەي) قالاسىندا وتكەن الەم چەمپيوناتىندا جەڭىس تۇعىرىنا كوتەرىلدى.

2020 -جىلى حالىقتى كولىك باعىتتارى مەن دالىزدەرىنىڭ قولجەتىمدىلىگى تۋرالى بارىنشا اقپاراتتاندىرۋ ماقساتىندا ق ر يندۋستريا جانە ينفرقۇرىلىمدىق دامۋ مينيسترلىگى «قازاق تەلەكوم» كومپانياسىمەن بىرلەسىپ، كولىك جەلىلەرىنىڭ قولجەتىمدىلىگى (جابىق جانە اشىق باعىتتار) تۋرالى ينتەراكتيۆتى كارتا جاسادى.

وسى كارتا ارقىلى تۇرعىندار ناقتى ۋاقىت رەجىمىندە قانداي دا ءبىر جول باعىتتارىنىڭ قولجەتىمدىلىگىن (اۋە كولىگى، تەمىرجول كولىگى، اۆتوكولىك) قاراپ وتىرا الادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى