ەلىمىزدە 25 مۋلتفيلم ءتۇسىرىلىپ جاتىر
«ەلىمىزدە 2010 -جىلدان بەرى مەملەكەتتىك بيۋدجەت ەسەبىنەن 130 دان استام انيماتسيالىق جوبالار ىسكە اسىرىلدى. ونىڭ ىشىندە مادەنيەت جانە سپورت مينيسترلىگىنىڭ قولداۋىمەن 50 دەن استام مۋلتفيلم، «Balapan» تەلەارناسىنىڭ تاپسىرىسىمەن 80 انيماتسيالىق جوبا جاسالدى.
مەملەكەت تاراپىنان انيماتسيالىق جوبالاردى قارجىلاندىرۋ كولەمى جىلدان جىلعا ارتىپ وتىر. مادەنيەت جانە سپورت مينيسترلىگى ارقىلى 2018 جانە 56 ميلليون تەڭگە، 2019 -جىلى 105 ميلليون تەڭگە بولىنسە، 2020 -جىلى بۇل كورسەتكىش 1 ميلليارد تەڭگەدەن استى.
«بالاپان» تەلەارناسى 2020-2021 -جىلدارى بالالارعا ارنالعان وتاندىق كونتەنتتى وندىرۋگە 2 ميلليارد تەڭگەگە جۋىق قاراجات قاراستىرعان»، - دەدى ول.
سونىمەن بىرگە، ۆيتسە-پرەمەردىڭ ايتۋىنشا، انيماتسيالىق فيلمدەردىڭ مازمۇنى مەن ساپاسىن ارتتىرۋ بويىنشا جۇمىس جۇرگىزىلۋدە. 2019 -جىلى قابىلدانعان «كينەماتوگرافيا تۋرالى» زاڭعا ساي ۇلتتىق فيلمدەردى، سونىڭ ىشىندە انيماتسيالىق ونىمدەردى ىرىكتەۋگە جاۋاپتى ۇلتتىق كينونى قولداۋ مەملەكەتتىك ورتالىعى قۇرىلدى. اتالعان زاڭعا سايكەس مەملەكەتتىك تاپسىرىسقا ۇمىتكەر جوبالار ورتالىق جانىنداعى ساراپتامالىق كەڭەستە، سودان كەيىن ۇلتتىق فيلمدەردى مەملەكەتتىك قارجىلىق قولداۋ ماسەلەلەرى جونىندەگى ۆەدومستۆوارالىق كوميسسيامەن قارالادى.
ساراپتامالىق كەڭەس پەن ۆەدومستۆوارالىق كوميسسيا كينوجوبالاردىڭ كوركەمدىك يدەياسىمەن قاتار، ولاردىڭ تاربيەلىك ءمانىن باعالايدى. ساراپتامالىق كەڭەستىڭ قۇرامىنا ەلىمىزگە بەدەلدى انيماتورلار كىرەدى.
«سونىمەن قاتار، 2019 -جىلدىڭ سوڭىندا «Balapan» تەلەارناسى ارقىلى جاسالاتىن انيماتسيالىق جوبالاردى ىرىكتەۋدىڭ جاڭا قاعيدالارى ازىرلەندى. وعان سايكەس تۋىندىلار ەكى كەزەڭدە ارنايى كوركەمدىك كەڭەستىڭ ىرىكتەۋىنەن وتەدى. ىرىكتەۋ بارىسىندا مۋلتفيلمدەردىڭ يدەياسى، ستسەنارييى، تەحنيكالىق ورىندالۋى جانە شىعارماشىلىق توپتىڭ پورتفوليوسى باعالانادى. بۇل جۇمىستارعا پسيحولوگ، پەداگوگ، الەۋمەتتانۋشى، ءتىل ماماندارى جانە بالالار جازۋشىلارى قاتىسادى. جاڭا قاعيدالارعا سايكەس بيىلعى جىلى وقۋ- تانىمدىق، شىتىرمان وقيعالى، ويىن- ساۋىقتىق جانردا 25 انيماتسيالىق جوبا وندىرىسكە ەنگىزىلدى. سونداي-اق، انيماتسيانىڭ دامۋىنا جاڭا سەرپىن بەرۋ ماقساتىندا تەلەارنانىڭ ەفير جەلىسىندە مۋلتفيلمدەر ۇلەسى 60 پايىزدان 80 پايىزعا دەيىن كوبەيتىلدى»، - دەدى ەرالى توعجانوۆ.
