وتكەن جىلى تەمىرجولدان ءوتۋ ەرەجەسىن بۇزعان 25 مىڭنان اسا ادام جاۋاپقا تارتىلدى
نۇر-سۇلتان. قازاقپارات - وتكەن جىلى تەمىرجولدى بەلگىلەنبەگەن جەردەن كەسىپ وتكەن 25 مىڭنان اسا ازامات اكىمشىلىك جاۋاپقا تارتىلدى، دەپ حابارلايدى ق ر ءى ءى م كولىكتەگى پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.
باسپا ءسوز قىزمەتى تاراتقان مالىمەتتەرگە قاراعاندا، ەلىمىزدىڭ كولىك پوليتسەيلەرى جازاتايىم وقيعالارعا جول بەرمەۋ ءۇشىن كولىكتەگى پوليتسيا دەپارتامەنتىنىڭ جانە ونىڭ جەلىلىك بولىنىستەرىنىڭ قىزمەتكەرلەرى تەمىرجولداردا بولاتىن جاراقاتتاردىڭ الدىن الۋ ءۇشىن پروفيلاكتيكالىق ءىس- شارالاردى ۇدايى وتكىزىپ تۇرادى.
الايدا، جۇرگىزىلگەن پروفيلاكتيكالىق جۇمىستارعا قاراماستان، تەمىرجول كولىگى قوزعالىسىنىڭ قاۋىپسىزدىك ەرەجەلەرىن بۇزۋ ارەكەتتەرى ءالى دە جالعاسۋدا.
ماسەلەن، اعىمداعى جىلعى 7-قاڭتاردا شورتاندى ستانساسىندا جۇك پويىزى تەمىرجول توسەمىن بەلگىلەنبەگەن جەردەن كەسىپ وتپەك بولعان ەر ادامدى باسىپ كەتتى. ول العان جاراقات سالدارىنان وقيعا ورنىندا كوز جۇمدى.
قازىر وسى فاكتى بويىنشا ق ر ق ك 344-بابى 2-بولىگى، ياعني، قوزعالىس قاۋىپسىزدىگى نەمەسە تەمىرجول كولىگىن پايدالانۋ ەرەجەسىن بۇزۋ سالدارىنان ابايسىزدا كىسى ولىمىنە اكەپ سوقتىرۋ بويىنشا سوتقا دەيىنگى تەرگەۋ امالدارى جۇرگىزىلۋدە.
ج. بايكەنوۆتىڭ ايتۋىنشا، وتكەن جىلى تەمىرجول توسەمىن بەلگىلەنبەگەن ورىنداردان كەسىپ وتكەن 25293 ازامات انىقتالىپ، اكىمشىلىك جاۋاپقا تارتىلعان. سونداي-اق، پويىزداردى شۇعىل تەجەۋدىڭ 2505 فاكتىسى تىركەلدى. ولاردىڭ 650 وقيعاسى ادامداردىڭ بولۋىنا بايلانىستى، 1667 سى جولدا مالدىڭ جۇرۋىنە بايلانىستى بولعان. بۇعان قوسا، تەمىرجول ۇستىنە بوگدە زاتتار قويىپ كەتۋدىڭ 188 فاكتىسى تىركەلگەن.
كولىك پوليتسەيلەرى ەرەسەكتەرگە، اسىرەسە، بالالارعا تەمىرجول كولىكتەرىندە قاۋىپسىزدىك ەرەجەلەرىن قاتاڭ ساقتاۋدى، تەمىر جولداردان وتكەندە تەك قانا ارنايى بەلگىلەنگەن ورىنداردان، ياعني، جاياۋ جۇرگىنشىلەر وتكەلدەرى، كوپىرلەر جانە تەمىر جول وتكەلدەرى ارقىلى عانا ءوتۋ قاجەتتىگىن تاعى دا ەسكەرتەدى.
كامەلەتكە تولماعانداردىڭ تەمىرجول ينفراقۇرىلىمى نىساندارىندا ەرەسەكتەردىڭ قاداعالاۋىنسىز بولۋىنا جول بەرمەۋ قاجەت.
پوليتسيا قىزمەتكەرلەرى اتا-انالاردان وتباسىندا بالالارعا ۇنەمى ءتۇسىندىرۋ جۇمىستارىن جۇرگىزىپ، ولاردى تەمىرجولدا قاراۋسىز قالدىرماۋلارىن سۇرايدى. سونداي-اق، ءتارتىپ ساقشىلارى، ءتيىستى زاڭنامالارعا سايكەس تەمىرجول ەرەجەلەرىن بۇزعانى ءۇشىن ازاماتتاردىڭ اكىمشىلىك جاۋاپقا تارتىلاتىندىقتارىن ەسكەرتەدى.
