قازاقتىڭ 25 اقىن- جازۋشىسىنىڭ كىتاپتارى اعىلشىن تىلىنە اۋدارىلماق
دەپ حابارلايدى «قازاقپارات» ح ا ا ءتىلشىسى.
«بەس جىلدىڭ ىشىندە قازاقتىڭ 25 اقىن- جازۋشىسىنىڭ كىتابىن اعىلشىن تىلىنە اۋدارۋ تۋرالى جوسپارىمىز بار. بولاشاقتا بۇل جۇمىسقا كەلگەندە بىزگە بيلىك كومەكتەسەر دەگەن ويدامىز. نەگە دەسەڭىز، ءبىزدىڭ ادەبيەتىمىزدى اعىلشىن تىلىنە اۋدارۋدىڭ ماڭىزى وتە زور»، - دەيدى بيگەلدى عابدۋللين استانادا وتكەن ورالحان بوكەيدىڭ اعىلشىن تىلىندەگى «كىسى كيىك» كىتابىنىڭ تۇساۋكەسەرىندە.
بيگەلدى عابدۋللين ءوز سوزىندە دۇنيە ءجۇزىنىڭ جارتىسى قازىرگى تاڭدا اعىلشىن ءتىلىن بىلەتىنىن ايتادى.
«كىتاپتىڭ اۋدارىلۋىنا كەلگەندە مىنا جايدى ەسكەرۋ كەرەك: كەرەك دەسەڭىز، كەز كەلگەن قازاق جازۋشىسىنىڭ كىتابىن وسىندا دا اۋدارا بەرۋگە بولادى. ءبىراق، مۇندا اۋدارعان كىتابىمىز فرانكفۋرتتا نەمەسە نيۋ- يوركتاعى كىتاپتار جارمەڭكەسىنە قويىلمايدى. سوندىقتان، كىتاپتىڭ قاي باسپادان شىققانىنىڭ ماڭىزى وتە زور»، - دەيدى بيگەلدى عابدۋللين.
بيگەلدى عابدۋللين، سونىمەن بىرگە، ناقتى قاي جازۋشىلار مەن اقىندار تۋرالى ءسوز قوزعالىپ وتىرعانىن اتاپ ءوتتى.
«ءساتىن سالسا ساكەن ءجۇنىسوۆتىڭ شىعارمالارىن، قادىر مىرزا ءالىنىڭ، ماحامبەتتىڭ ولەڭدەرىن اۋدارعىمىز كەلەدى. ءبىراق، پوەزيانى اۋدارۋ وتە قيىن ەكەنىن اتاپ وتكىم كەلەدى. سونىمەن بىرگە، الداعى بەس جىلدا قاسىم امانجولوۆ، مۇحتار ماعاۋيننىڭ كىتاپتارىن ءتارجىمالاۋدى جوسپارلاپ وتىرمىز. وسىلاي، قازاق ادەبيەتىن شەتەلدىكتەرگە جاقىنداتىپ جاتىرمىز»، - دەپ ءتۇيدى ول.
اۆتور: ايان بەكەن ۇلى
