قازاقستاندى الداعى 25 جىلدا نە كۇتىپ تۇر
امەريكالىق عالىمنىڭ پايىمىنشا، وتكەن 25 جىلدا قازاقستان ءوزىنىڭ تاۋەلسىزدىگىنىڭ ۇلكەن اسۋلارىنان استى. «بۇل تاماشا ەكونوميكالىق دامۋ جەتىستىكتەرى، تۇراقتىلىق، تاۋەلسىزدىكتى نىعايتۋ عانا ەمەس حالىقارالىق ارەنادا «قازاقستان» برەندىنە قۇرمەتتىڭ ارتۋى. ال الداعى 25 جىلعا كوز جۇگىرتسەك، قازاقستاندىق بيلىك مەملەكەتتى الەمدەگى ەڭ دامىعان ەلدەردىڭ قاتارىنا قوسۋعا باعىتتالعان اۋقىمدى تۇجىرىمدامانى قالىپتاستىردى. ارينە، بۇل وڭاي جول ەمەس، وسى جولدا جاڭا ماسەلەلەر تۋىنداۋىمەن قاتار بۇرىنعى ەسكى پروبلەمالار دا الدان قايتا شىعۋى ىقتيمال. ءوزىنىڭ ودان ارى دامۋ باعدارلاماسىنا كىرىسكەننەن باستاپ قازاقستان ءبىرقاتار ماڭىزدى الەۋمەتتىك، ەكونوميكالىق، ساياسي جانە حالىقارالىق شىنايىلىقتارمەن بەتپە- بەت كەلەدى»، - دەيدى ف. ستارر.
ونىڭ بولجامدارىنا قاراعاندا، الداعى 25 جىلدا قازاقستان حالقىنىڭ سانى 20 پايىزعا وسەدى، الايدا مەملەكەت اسىراۋىنداعى ادامداردىڭ ەڭبەككە قابىلەتتى حالىقپەن اراقاتىناسى كەمىندە ەكى ەسەگە ارتادى. بۇل دا ەكونوميكالىق دامۋدىڭ ءوسۋىن تالاپ ەتەدى.
«ورنىقتى ەكونوميكالىق دامۋ ۋربانيزاتسيا ۇدەرىسىنىڭ جەدەلدەۋىنە اسەر ەتەدى، سوسىن 2041 -جىلعا قاراي قازاقستاندا حالىقتىڭ 70 پايىزى قالالىق جەرلەردە ءومىر سۇرەتىن بولادى»، - دەيدى ساراپشى. ونىڭ سوزىنە قاراعاندا، قازاقستاننىڭ اقپاراتتىق سالاسى ونىڭ حالىقارالىق قاتىناستارىنا قاراعاندا ءبىرشاما وقشاۋلانىپ، قاتارداعى ازاماتتار ءۇشىن رەسەي اقپاراتتىڭ نەگىزگى كوزىنە اينالادى.
«قازاقستان حالقى ەلدىڭ جاھاندىق ءرولىن قالىپتاستىراتىن اقپاراتتىق دياپازونعا يە بولۋى ءۇشىن ءدال وسى اقپارات سالاسىنا كوپ ۆەكتورلى قادامىن نىقتاۋ كەرەك. بۇل بەلگىلى ءبىر دەڭگەيدە باتىستىق دەرجاۆالار ەسكەرمەي وتىرعان سالا، سونىمەن قاتار، ءدال وسى سالا ارقىلى قازاقستاندى عانا ەمەس تۇتاستاي ءوڭىردى مەيلىنشە كەڭ اۋقىمداعى الەمدىك قاۋىمداستىقپەن بايلانىستىرا تۇسۋگە بولاتىن ەدى»، - دەيدى ول.
بۇدان بولەك، ساراپشى قازاقستان الداعى ۋاقىتتا جەتىستىكتەرگە جەتۋى ءۇشىن ەڭ الدىمەن، ەكونوميكاسىن ودان ءارى ءارتاراپتاندىرۋى قاجەتتىگىن دە العا تارتادى. ونىڭ سوزىنشە، اسىرەسە، اۋىل شارۋاشىلىعىنا ەرەكشە دەن قويعان ورىندى. ول سونداي- اق، استانا حالىقارالىق قارجى ورتالىعىن قۇرۋ جوباسى باتىل قادام ەكەندىگىن، الايدا شاعىن جانە ورتا كاسىپكەرلەردى قولداۋ نازاردان تىس قالماۋى تيىستىگىن دە ايتتى.
«جالپى العاندا مۇنايعا الەمدىك سۇرانىستىڭ تومەندەۋىنەن تۋىندايتىن ماسەلەلەرگە قارسى ءاۋ باستان ارەكەت ەتۋ مۇمكىندىگى ەل ەكونوميكاسىنىڭ كەلەشەگىن ايقىنداۋعا دا سەپتىگىن تيگىزەدى. بۇل رەتتە قازاقستاننىڭ اۋىل شارۋاشىلىعى نەگىزگى باعىتتاردىڭ ءبىرى بولىپ قالا بەرۋى كەرەك. شىندىعىندا قازاقستان ەۋرازيا كەڭىستىگىندە استىقتىڭ سارقىلماس قورىنا اينالاتىن الەۋەتكە يە. دەگەنمەن، اۋىل شارۋاشىلىعى سالاسى تۇبەگەيلى قايتا قۇرۋدى قاجەت ەتەدى»، - دەدى ف. ستارر.
ونىڭ ايتۋىنشا، ورتالىق ازيانىڭ باسقا دا بولىكتەرى سەكىلدى قازاقستاننىڭ قىتايدى ۇندىستانمەن جانە ەۋروپامەن بايلانىستىراتىن «قۇرعاقتاعى كوپىر» بولۋىنا ۇلكەن مۇمكىندىك تۋىپ وتىر. وسىنى قامتاماسىز ەتۋى ءۇشىن قازاقستان ىشكى جانە وڭىرلىك بايلانىستاردى نىعايتىپ، ءوزارا ارەكەتتەستىكتى جاڭا دەڭگەيگە كوتەرۋى كەرەك. بۇل رەتتە ساراپشى قازاقستان مەن وزبەكستان پرەزيدەنتتەرى 2013 -جىلى قول قويعان ستراتەگيالىق ارىپتەستىك تۋرالى شارتتى ەسكە سالدى.
اۆتور: قانات مامەتقازى ۇلى
