وتاندىق دارىگەرلەر 25 ادامعا جاڭا جۇرەك سىيلادى
استاناداعى كارديولوگيالىق ورتالىق ورتا ازيادا العاش بولىپ اعزانىڭ باستى ورگانى - جۇرەكتى الماستىرۋعا بەل بايلاعان ەدى. وسىدان تۋرا 3 جىل بۇرىن قازاقستاندىق دارىگەرلەر العاش رەت ناۋقاستىڭ جۇرەگىن الماستىرىپ، وعان جاڭا ءومىر سىيلادى. بۇل - وتاندىق مەديتسينا تاريحىندا جاڭا پاراقتىڭ بەتى اشىلعان كۇن، دەپ حابارلادى www.24.kz.
سودان بەرى اقحالاتتىلار 25 ادامعا ءساتتى وتا جاساپ، وزگەلەردىڭ ءالسىز جۇرەگىنە ءۇمىتتىڭ وشپەس وتىن جاقتى. ءدال وسى كارديولوگيالىق ورتالىقتا ومىردەن كۇدەر ءۇزىپ، ءۇمىتى وشكەن ازاماتتار ەكىنشى مارتە دۇنيە ەسىگىن اشتى. 7 ساعاتقا سوزىلعان اۋىر وتادان كەيىن كوزىن اشقان 25-ناۋقاس بۇگىن اۋرۋحانادان شىعىپ، جاڭا جۇرەكپەن جاڭا ومىرگە اياق باسپاق. 42 جاستاعى نۇرلان قۇبدانوۆتى ۇيىندە كەلىنشەگى مەن 3 بالاسى كۇتىپ وتىر.
«ءىنىمنىڭ جۇرەگى 2009 -جىلدان بەرى اۋىراتىن. مۇندا كەلگەن كەزدە ازەر دەم الىپ ءجۇردى. 1 ايدىڭ ىشىندە دارىگەرلەر ءىنىمدى اياققا تۇرعىزدى. ال دونورلىق تۋرالى بۇرىن- سوڭدى ويلاماپ ەدىك. ەندى ونى ناسيحاتتاۋعا كۇش سالاتىن بولامىن»، - دەيدى ناۋقاستىڭ اپكەسى الۋا جۇبانيازوۆا.
ال 3 جىل بۇرىن تاعدىرىن اقحالاتتىلارعا تاپسىرىپ، پىشاقتىڭ استىنا تۇسكەن العاشقى ناۋقاس قازىر ءومىرىنىڭ ءار كۇنىنە شاتتانىپ، وزىمەن تاعدىرلاس جاندارعا قولداۋ كورسەتىپ ءجۇر. قازىر ولاردىڭ ۇلكەن ورتاق ماقساتى بار. ءالىمباي تاسبولات ۇلىنىڭ دا جاڭا جۇرەكپەن جۇرگەنىنە بۇگىن تۋرا 100 كۇن.
«مەنىڭ كەۋدەمدە باسقا ادامنىڭ جۇرەگى سوعىپ تۇر. ول ادامعا مىڭ دا ءبىر راحمەت، كەلىسىم بەرگەن تۋىستارىنا راحمەت ايتامىن. بىرەۋگە ءولىم تىلەمەيمىز. ءبىراق سول قايتىس بولعان ادام جۇرەككە ءزارۋ ادامداردىڭ ءومىرىن قۇتقارادى»، - دەيدى ءالىمباي تاسبولات ۇلى.
ال بۇگىندە قازاقستان بويىنشا 62 ادام جۇرەگىنە دونور كۇتىپ ءجۇر
«قازىر جۇرەكتى التاۋى ءبىزدىڭ ورتالىقتا كۇتىپ جاتىر، بىرەۋى جانساقتاۋ بولىمىندە، التاۋى بولىمشەدە. قالعانى ۇيلەرىندە. دونور كەلگەندە ءبىز شاقىرىپ الامىز. قان توبى، رەزۋس فاكتورىمەن سايكەس كەلسە، شاقىرىپ، وسى جەردە تاعى بيولوگيالىق سىناق جاسايمىز»، دەيدى ۇلتتىق عىلىمي كارديوحيرۋرگيا ورتالىعى وڭالتۋ بولىمشەسىنىڭ مەڭگەرۋشىسى گۇلجان مىرزاحمەتوۆا.
مامانداردىڭ ايتۋىنشا، وقىس جاعدايدا كوز جۇمعان ساۋ ادامنىڭ اعزا مۇشەلەرى كەمى 4 ناۋقاسقا ءومىر سىيلاي الادى. تەك وعان تۋىستارى كونسە بولعانى.
