رەسەيگە جالعا بەرىلگەن 25 مىڭ شارشى مەتر جەر ەلگە قايتارىلۋى مۇمكىن

بۇل تۋرالى بايقوڭىردا قىزىلوردا وبلىسىنىڭ اكىمى قىرىمبەك كوشەربايەۆ پەن رەسەي عارىش اگەنتتىگىنىڭ ءتوراعاسى يگور كوماروۆ الدىن-الا كەلىستى.

كەزدەسۋ جابىق ەسىك جاعدايىندا ءوتتى. وبلىس اكىمىنىڭ باسپا ءسوز قىزمەتى تاراتقان اقپار بويىنشا، جەر ماسەلەسى وڭىنان شەشىلسە، 25 مىڭ گەكتاردىڭ ءۇش جارىم مىڭدايى تورەتام كەنتىنە بەرىلەدى.

جەر تەلىمى جاڭادان كەنت ورتالىعىن سالۋعا، كاسىپكەرلىكتى دامىتۋعا جانە وزگە دە ماقساتتاردا پايدالانىلادى. ال اقاي كەنتىنىڭ اۋماعىن كەنەيتۋگە 122 گەكتار جەر بولىنەدى.

قالعان جيىرما ءبىر مىڭ گەكتاردان استام جەر «باتىس ەۋروپا-باتىس قىتاي» كولىك ءدالىزى بويىندا كولىك-لوگيستيكالىق ينفراقۇرىلىم سالۋعا جانە «بەينەۋ-شىمكەنت» گاز قۇبىرىنىڭ جەلىلىك بولىگىن وتكىزۋ ماقساتىنا قولدانىلادى.

سونداي-اق، باسقوسۋدا بايقوڭىر قالاسىنداعى التى مەكتەپتى قازاقستاندىق ستاندارتقا كوشىرۋ، تۋريزمدى دامىتۋ، جەڭىستىڭ 70 جىلدىعى مەن «بايقوڭىر» كەشەنىنىڭ 60 جىلدىعىن مەرەكەلەۋ ماسەلەلەرى تالقىلاندى.

قازىر «كرايني» اۋەجايى كۇردەلى جوندەۋدەن وتكىزىلىپ، استانا-قىزىلوردا-بايقوڭىر، الماتى- قىزىلوردا-بايقوڭىر باعىتتارىندا اۋە رەيىستەرىن اشۋ جۇمىستارى جاسالۋدا.

بۇعان قوسا، بايقوڭىرعا كىرۋگە رۇقسات بەرەتىن قۇجاتتاردى دايىنداۋ جەڭىلدەتىلمەك.

استانا تەلەارناسى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى