استانادا بالا تاربيەسىندە سالعىرتتىق تانىتقان اتا-انالارعا قاتىستى 259 ءىس قارالعان
قالالىق سوتتىڭ باسپا ءسوز قىزمەتىنىڭ حابارلاۋىنشا، دوڭگەلەك ۇستەل اياسىندا 2016 -جىلدىڭ 9 ايىندا استانا قالاسى كامەلەتتىك جاسقا تولماعاندار ىستەرى جونىندەگى مامانداندىرىلعان اۋدانارالىق سوتىندا تىركەلگەن جانە قاراستىرىلعان اكىمشىلىك زاڭنامالار جۇيەسى مەن قۇقىق بۇزۋشىلىق باپتارى بويىنشا ىستەر تالقىلاندى.
سەميناردا استانا قالالىق سوتىنىڭ سۋدياسى قازيما ايتقاليەۆا ءبىرشاما سوت ىستەرى بويىنشا مالىمەتتەردى كەلتىردى. اتالعان ۋاقىت ارالىعىندا سوتتا قارالعان ىستەردىڭ ستاتيستيكالىق مالىمەتتەرىن الىپ قاراساق، اتا- انانىڭ نەمەسە باسقا دا زاڭدى وكىلدەردىڭ كامەلەتكە تولماعان بالالاردى تاربيەلەۋ مەن وقىتۋ جونىندەگى مىندەتتەردى ورىنداماۋىنا قاتىستى 259 ءىس قارالعان، ونىڭ ىشىندە 207 ءىس بويىنشا تۇلعالار اكىمشىلىك جاۋاپكەرشىلىككە تارتىلسا، 52 تۇلعاعا قاتىستى ءىس وندىرىسپەن توقتاتىلعان.
كامەلەتكە تولماعاندارعا ەروتيكالىق مازمۇنداعى باسىلىمدار، كينو- نەمەسە بەينەماتەريالداردى، بەينەلەردى نەمەسە وزگە دە زاتتاردى نە ماتەريالداردى ساتۋ بويىنشا 2 ءىس قارالىپ، 2 تۇلعا جاۋاپكەرشىلىككە تارتىلعان. كامەلەتكە تولماعان ادام جاساعان ۇساق بۇزاقىلىققا قاتىستى 101 ءىس قارالىپ، 92 ادام اكىمشىلىك جاۋاپكەرشىلىككە تارتىلدى. كامەلەتكە تولماعانداردىڭ تۇنگى ۋاقىتتا زاڭدى وكىلدەرىنىڭ ەرىپ ءجۇرۋىنسىز ويىن- ساۋىق مەكەمەلەرىندە بولۋى بويىنشا ىستەر ءجيى قارالادى. 9 ايدا 89 ءىس قارالىپ، 78 تۇلعاعا قاتىستى اكىمشىلىك قۇقىق بۇزۋشىلىق تۋرالى حاتتامالار تولتىرىلعان.
اتا-انالاردىڭ بالا تاربيەسىنە سالعىرت قاراۋىنىڭ ناتيجەسىندە بەلەڭ العان قىلمىستىق ىستەر مەن اكىمشىلىك قۇقىق بۇزۋشىلىقتار سانىن ازايتۋ ماقساتىندا ءبىرقاتار پروفيلاكتيكالىق جۇمىستارىنىڭ جۇرگىزىلۋ قاجەتتىلىگى قىزۋ تالقىلاندى. شارا بارىسىندا سۋديا كەيبىر ىستەرگە قاتىستى مىسالدار كەلتىرىپ، اكىمشىلىك قۇقىق بۇزۋشىلىق تۋرالى كودەكس نورمالارى تالاپتارىنىڭ قاتاڭ ساقتالىپ، قۇقىقتىق قاتەلىكتەر جىبەرمەۋ ماساتىندا اكىمشىلىك قۇقىق تۋرالى زاڭناماعا ەنگىزىلگەن وزگەرتۋلەر مەن تولىقتىرۋلاردى ۇنەمى قاداعالاپ وتىرۋ جايلى ۇسىنىستاردى تىلگە تيەك ەتتى.
شارا اياسىندا اكىمشىلىك ونىدىرىسكە قاتىسۋشىلاردىڭ قۇقىقتارى مەن بوستاندىقتارىنىڭ قاداعالاۋدى قامتاماسىز ەتۋ باعىتىندا الدا اتقارىلاتىن جۇمىس بارىسى تالقىلاندى.
