قاراعاندىدا بيىل ق ر تاۋەلسىزدىگىنىڭ 25 جىلدىعىنا وراي 500 دەن استام شارا وتەدى
«بۇگىن ءبىز تاۋەلسىزدىكتىڭ 25 جىلدىعى جىلىنىڭ سالتاناتتى باستالۋىنا جينالىپ وتىرمىز. جىل بويى وبلىستا وسى مەرەيتوي ۇرانىمەن 500 دەن استام شارا وتەدى. تاياۋ كۇندەرى «تاۋەلسىزدىكتىڭ 25 جىلدىعىنا - 25 ىزگى ءىس!» اكسياسى باستالادى، ونىڭ اياسىندا 33 تەن استام الەۋمەتتىك نىساندار اشىلادى، يندۋستريالاندىرۋ كارتاسى جوبالارى ىسكە قوسىلادى، كوپتەگەن قايىرىمدىلىق اكسيالارى جانە باسقا دا ماڭىزدى ءىس-شارالار وتەدى»، - دەدى قاراعاندى وبلىسىنىڭ اكىمى نۇرمۇحامبەت ابدىبەكوۆ فورۋمنىڭ اشىلۋىندا.
ءوڭىر باسشىسى بۇل فورۋمنىڭ جاڭا مەرەكە - العىس ايتۋ كۇن ءوتۋىنىڭ ەرەكشە ءمانى بار ەكەنىن اتاپ ءوتتى. «بۇل مەرەكە مەملەكەت باسشىسىنىڭ باستاماسىمەن بەلگىلەنىپ وتىر. ول «ماڭگىلىك ەل» يدەيالارىنىڭ قۇندىلىقتارىن ايشىقتايدى. العىس ايتۋ كۇنى ءبىز كۇشتەپ قونىستاندىرىلعان ءارتۇرلى ۇلىستاردىڭ وكىلدەرىن قابىلداپ، قولداۋ كورسەتكەندەردىڭ، قازاقستاننىڭ دامۋىنا ۇلەس قوسقانداردىڭ بارىنە ريزاشىلىعىمىزدى بىلدىرۋگە ءتيىسپىز»، - دەپ اتاپ ءوتتى ن. ابدىبەكوۆ.
وبلىس اكىمى ساحنادا وڭىردەگى مەرەيتوي جىلى باستالۋىن بەيەنەلەيتىن كىتاپقا العاشقى قولتاڭبا قالدىردى. «بۇل كىتاپ وبلىستىڭ بارلىق قالالارى مەن اۋداندارىن ارالاپ شىعادى. ول قاراعاندى وبلىسىنداعى تاۋەلسىزدىكتىڭ 25 جىلدىعى جىلىنىڭ شەجىرەسىنە اينالادى جانە 16- جەلتوقساندا بىزگە قايتىپ ورالادى»، - دەپ جاريالادى جۇرگىزۋشى.
قازاقستان حالقى اسسامبلەياسىنىڭ، ەتنومادەني بىرلەستىكتەردىڭ اتىنان العىس ايتۋ كۇنىمەن جينالعانداردى «پولونيا» پولياك قوعامنىڭ ءتوراعاسى ۆيتالي حمەليەۆسكي قۇتتىقتادى. ول تاريحتىڭ اۋىر كەزەڭدەرىندە قازاقتار تاعدىر تالقىسىنا ۇشىراعان كوپتەگەن ۇلىستاردىڭ وكىلدەرىن باۋىرىنا باسقانىن اتاپ ءوتىپ، ولاردىڭ اتىنان ريزاشىلىعىن ءبىلدىردى.
فورۋمدا وبلىستىڭ دامۋىنا ۇلەس قوسقان ونەركاسىپ جانە اۋىل شارۋاشىلىعى كاسىپورىندارىنىڭ باسشىلارىنا قۇرمەت كورسەتىلدى. تاۋەلسىزدىك قۇرداستارى، سونداي-اق 25 جىل تاتۋ-ءتاتتى وتاسقان شاحتەر مۇساليەۆتەردىڭ وتباسى سالتانات قاتىسۋشىلارى بولدى.
