سولتۇستىك قازاقستاندا بيىل 24 ايەل ءسۇت بەزى قاتەرلى ىسىگىنەن قايتىس بولدى

ۋاقتىلى دياگنوز قويىلعان جاعدايدا اۋرۋدىڭ ەمى بار، دەسەك تە جىل باسىنان بەرى قاتەرلى دەرتتەن 24 ايەل قايتىس بولعان، دەپ حابارلايدى قازاقپارات ءتىلشىسى.

س ق و ونكولوگيا ورتالىعىنىڭ مالىمەتىنشە، ءسۇت بەزىنىڭ وبىرى قاتەرلى ىسىكتەردىڭ اراسىندا تارالۋى بويىنشا ءبىرىنشى ورىندا تۇر.

ءار ونىنشى ايەل قاتەر توبىنا كىرەدى. قازاقستاندا جىل سايىن مۇنداي دياگنوز 5 مىڭعا جۋىق قىز- كەلىنشەككە قويىلادى. ال 1200 دەي ايەل وسى قاتەرلى دەرتتەن قايتىس بولادى.

«2008 -جىلدان باستاپ قازاقستاندا قاتەرلى ءسۇت بەزى وبىرىن سكرينينگتەۋ باعدارلاماسى جۇمىس ىستەپ كەلەدى. ول 40 پەن 70 جاس ارالىعىنداعى ايەلدەردى قامتىعان. ەلدەگى ەمحانالار مەن ونكوديسپانسەرلەر دەرتتى ەرتە باستان انىقتاۋ ءۇشىن تەكسەرۋدەن وتكىزەدى. دەگەنمەن، ناۋقاستاردىڭ باسىم بولىگى دارىگەرگە دەرتتىڭ ايقىن بەلگىلەرىمەن كەلەدى، ال بۇل اۋرۋمەن كۇرەسۋدە ايتارلىقتاي قيىندىق تۋعىزادى»، - دەيدى سقو كوپسالالى اۋرۋحانانىڭ ونكولوگيالىق ورتالىق ونكوماممولوگى رافاەل ريزايەۆ.

ماماننىڭ ايتۋىنشا، ءوڭىردىڭ جانە ەلىمىزدىڭ بارلىق مەديتسينالىق مەكەمەلەرىندە 15 -قازاندا ءسۇت بەزى وبىرىن انىقتاۋ جانە دەرتتىڭ الدىن الۋ ماقساتىندا اشىق ەسىك كۇنى وتەدى.

«ايەلدەردى كەشەندى تەكسەرۋدەن جانە سكرينينگتەن وتۋگە شاقىرامىز. ەڭ قاراپايىم ءادىس - ءوزىن- ءوزى تەكسەرۋ. ءاربىر ايەل تاڭەرتەڭ تۇرا سالىپ، دۋشقا تۇسپەس بۇرىن، كەۋدەسىن پالپاتسيالاپ ءوزىن- ءوزى تەكسەرۋى ءتيىس. ەگەر ول قانداي دا ءبىر پاتولوگيالىق ەرەكشەلىكتى انىقتاعان بولسا، ودان ءارى دياگنوستيكالاۋ ءۇشىن ماممولوگپەن كەڭەسكەنى ابزال»، - دەيدى رافاەل ريزايەۆ.

س ق و- دا جىل سايىن جاڭادان 200-210 ايەلدە ءسۇت بەزىنىڭ قاتەرلى ىسىگى انىقتالادى. بيىل جىل باسىنان بەرى 24 ايەل وسى دەرتتەن قايتىس بولعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى