قازاقپارات كۇنتىزبەسى: 24- جەلتوقسان
ەستە قالار وقيعالار
1944 -جىلى قازاق اكادەميالىق وپەرا جانە بالەت تەاترىنىڭ ساحناسىندا العاش رەت «اباي» وپەراسى قويىلدى. ليبرەتتوسى - م. اۋەزوۆتىكى، مۋزىكاسى - ا. جۇبانوۆ پەن ل. حاميديدىكى، رەجيسسەرى - ق. جانداربەكوۆ. ليبرەتتوعا اقىن ومىرىندەگى درامالىق وقيعا ارقاۋ بولعان.
مۋزىكالىق شەشىمىنىڭ اۋەزدىلىگى، حالىقتىڭ ءان مۇراسىمەن ەتە بايلانىس، كاسىبي وپەرا ونەرىنىڭ جەتىستىكتەرىن ۇلتتىق وپەرادا ءتيىمدى پايدالانۋ شىعارمانىڭ تابىسى بولىپ سانالادى.
وپەراعا اباي اندەرى ءساتتى ەنگىزىلگەن. اقىن بەينەسىن اشۋعا فيلوسوفيالىق مازمۇنى تەرەڭ «كوزىمنىڭ قاراسى»، «قاراڭعى تۇندە تاۋ قالعىپ»، «قاي تالقى» سەكىلدى اندەر الىنعان.
2004 -جىلى استانا قالاسى ەسىلدىڭ سول جاعالاۋىنداعى جاڭا اكىمشىلىك ورتالىعى اۋماعىندا ورنالاسقان قازاقستان رەسپۋبليكاسى پرەزيدەنتىنىڭ رەزيدەنتسياسى رەسمي تۇردە اشىلدى. اشىلۋ سالتاناتىنا ەلوردانىڭ بارلىق ۇلتتىق- مادەني ورتالىقتارىنىڭ وكىلدەرى مەن قۇرمەتتى اقساقالدار قاتىستى.
قازاقستان رەسپۋبليكاسىنىڭ پرەزيدەنتى رەزيدەنتسيانىڭ اشىلۋ سالتاناتىندا جاڭا عيماراتتى «اق وردا» دەپ اتادى. رەزيدەنتسيا 2001 -جىلى قىركۇيەك ايىندا سالىنا باستادى. عيماراتتىڭ جالپى كولەمى 36720 شارشى مەتر. عيمارات قازىرگى زامانعى قۇرىلىستىڭ ەڭ تاڭداۋلى ادىستەرىن قولدانا وتىرىپ، مونوليت قۇيماتاستان سالىنعان.
كۇمبەزدەگى ءسۇمبىنى قوسا ەسەپتەگەندەگى عيماراتتىڭ بيىكتىگى 80 مەتر.
2007 -جىلى الماتىدا ءبىرىنشى رەت «قۇلاگەر» اتتى ۇلتتىق كينەماتوگرافيا سىيلىعىنىڭ يەگەرلەرىن ماراپاتتاۋ ءراسىمى بولىپ ءوتتى. ۇيىمداستىرۋشىسى - قازاقستان كينەماتوگرافيستەر وداعى. ونىڭ نەگىزگى ماقساتى - قازاقستانداعى كينەماتوگرافيا سالاسىن دامىتۋ جانە وسى سالادا جۇرگەن ازاماتتارعا قولداۋ كورسەتۋ.
2009 -جىلى اقتاۋدا يران يسلام رەسپۋبليكاسىنىڭ كونسۋلدىعى اشىلدى. اشىلۋ راسىمىنە وبلىس اكىمى قىرىمبەك كوشەربايەۆ جانە يران سىرتقى ىستەر ءمينيسترى فاراحي حوسسەين قاتىستى. بۇل كونسۋلدىقتىڭ اشىلۋى ەكى ەل اراسىنداعى دوستىق، ساۋدا- ەكونوميكالىق قارىم-قاتىناستاردى دامىتۋعا سەپتىگىن تيگىزىپ، سونىمەن قاتار قۇجاتتاردى راسىمدەۋدى جەڭىلدەتەدى.
2012 -جىلى ماسكەۋ مەتروسىنىڭ جاڭا «الماتى» ستانساسى رەسمي تۇردە اشىلدى. ستانسا براتەيەۆو اۋدانىندا ورنالاسقان جانە زاموسكۆورەتسك جەلىسىنە دەيىنگى ارالىقتى قامتيدى.
2012 -جىلى ەلىمىزدىڭ باستى ۇلتتىق تەلەارناسى QAZAQSTAN « قازمەديا ورتالىعىنان» حابار تاراتا باستادى. مەديا ورتالىعىنىڭ بارلىق تەحنولوگيالىق الاڭدارى «Sony» ، «Omneon»، «Dalet»، «Pharos»، «everts» ، «Apple « ، «Avid» سەكىلدى الەمنىڭ الدىڭعى قاتارلى وندىرۋشىلەرىنىڭ قوندىرعىلارىمەن جابدىقتالعان.
2015 -جىلى ت م د ەلدەرى اراسىندا العاش رەت الماتى قالاسىنداعى قازاق ونكولوگيا جانە راديولوگيا عىلىمي- زەرتتەۋ ينستيتۋتىندا ونكواۋرۋعا شالدىققان ادامدار ءۇشىن سەنسورلى كابينەت اشىلدى. مۇندا ارنايى مامانداندىرىلعان كومەك كورسەتۋ بويىنشا تۇتاستاي جالپىلاما جوسپار دايىندالعان.
2015 -جىلى اتىراۋدا قازاقستان رەسپۋبليكاسى مەملەكەتتىك ءانۇرانىنىڭ اۆتورى، كورنەكى اقىن جۇمەكەن ناجىمەدەنوۆكە ەسكەرتكىش ورناتىلدى.
اقىننىڭ ءتورت مەترلىك ءمۇسىنى ءدال وسىنداي بيىكتىكتەگى گرانيت تۇعىرعا ورناتىلدى: ەسكەرتكىشتىڭ جالپى بيىكتىگى - 8 مەتردەن استام.
2016 -جىلى امەريكاداعى El Paso Times باسىلىمى pound-for-pound ۇزدىك بوكسشىلارىنىڭ رەيتينگىن جاريالادى. جىل قورىتىندىسى بويىنشا اتالمىش رەيتينگتە، ورتا سالماقتاعى ۇزدىكتەردىڭ كوشىن WBA/IBF/WBC/IBO تۇجىرىمدارى بويىنشا الەم چەمپيونى، جەرلەسىمىز گەنادي گولوۆكين باستادى.
2018 -جىلى رۋمىنيادا قازاقستان ۇلتتىق مادەني ورتالىعى اشىلدى. قازاقستان ورتالىعى ەۋروپاداعى ەجەلگى كىتاپحانالاردىڭ بىرىندە ورنالاسقان. ونىڭ قورىندا 13 ميلليون كىتاپ بار. ورتالىق شەتەلدىك وقىرماندارعا قازاق حالقىنىڭ داستۇرىمەن، ادەت-عۇرپىمەن، ادەبيەتى مەن مادەنيەتىمەن تانىسۋعا مۇمكىندىك بەرەدى.
