وليمپيادالىق ليسەنزيالار ءۇشىن 24 ەلدىڭ سپورتشىلارى استاناعا كەلەدى
وسى جىلعى 18-20 - ناۋرىز كۇندەرى استانادا جوسپارلانعان سپورت شاراسى ريو- دە- جانەيروداعى وليمپيدالىق ويىندارعا ليسەنزيالار ساراپقا سالىناتىن ەڭ العاشقى بىلىكتىلىك جارىسى (الەم چەمپيوناتىن ەسەپتەمەگەندە) بولماق.
سوندىقتان دا بيىلعى جىلدىڭ ەڭ ماڭىزدى سپورت جارىسىنا قازاقستان استاناسىندا ازيالىق قۇرلىقتىڭ بارلىق ۇزدىك پالۋاندارى باس قوسادى، دەپ حابارلاندى فەدەراتسيانىڭ سايتىندا.
فەدەراتسيانىڭ حالىقارالىق ءبولىمىنىڭ مالىمەتتەرى بويىنشا، الدىن الا تىزىمگە 24 ەل كىردى، ولاردىڭ اراسىندا قازاقستاندىق سپورتشىلارعا ەلەۋلى باسەكەلەس بولىپ تابىلاتىن كوشباسشى قۇرامالار بار: يران، قىتاي، جاپونيا، موڭعوليا، وڭتۇستىك كورەيا، ءۇندىستان.
«تاعى ەكى ەل تىركەلىپ ۇلگەرگەن جوق، ءبىراق تا تۋرنيرگە قاتىسۋدى جوسپارلاپ وتىر، ولار: فيليپپين مەن يوردانيا»، - دەپ ءتۇسىندىردى فەدەراتسيادان. قازىرگى كەزدە بۇل كوماندالاردىڭ بارلىعى وزدەرىنىڭ كوشباسشى- سپورتشىلارىن التى سالماق ساناتى، ءارتۇرلى ستيل بويىنشا ۇكىلەپ بايگەگە قوسادى، ويتكەنى وليمپيادا ويىندارىنىڭ تالابى وسىنداي.
گرەك- ريم كۇرەسى: 59, 66, 75, 85, 98, 130 كەلى؛
ەركىن كۇرەس: 57, 65, 74, 86, 97, 125 كەلى؛
ايەلدەر كۇرەسى: 48, 53, 58, 63, 69, 75 كەلى.
جوعارىدا كورسەتىلگەن ءۇش سالماق ساناتتارى بويىنشا قازاقستاننىڭ ءتورتجىلدىقتىڭ باستى سايىسىنا قازىردىڭ وزىندە ليسەنزيالارى بار.
العاشقى ليسەنزيانى 59 كەلى سالماق ساناتىنا دەيىنگى گرەك- ريم كۇرەسىنىڭ پالۋانى المات كەبىسبايەۆ الدى. ول ريوعا جولداماعا 2015 - جىلعى لاس- ۆەگاستاعى الەم چەمپيوناتىنداعى قولا مەدالى ەسەبىنەن قول جەتكىزدى. وسى جارىستاردا ەكىنشى ليسەنزيانى كلاسسيكالىق كۇرەستەن 75 كەلى سالماق ساناتىندا دوسجان قارتىقوۆ جەڭىپ الدى. ريوداعى ءۇشىنشى جولداماعا 57 كەلىگە دەيىنگى سالماق ساناتىندا ەركىن كۇرەس شەبەرى سانا ارتاس يە بولدى. ول ۆەگاستاعى الەم چەمپيوناتىندا كۇشتىلەردىڭ بەستىگى قاتارىنا كىردى. بۇل سپورتشىلار سوندىقتان دا استاناداعى جارىستارعا قاتىسپايدى، ال قالعان سالماق ساناتتارى بويىنشا قازاقستان ءوزىنىڭ ۇزدىك پالۋاندارىن سايىسقا سالادى.
