رەسەيلىك سۋ-24 ۇشاعىنىڭ «قارا جاشىگى» تابىلدى
بۇل تۋرالى ANNA-News اگەنتتىگىنىڭ ءتىلشىسى مارات مۋسين LifeNews پورتالىنا بەرگەن سۇحباتىندا ايتتى.
ءتىلشىنىڭ ايتۋىنشا، بورتتىق وزدىگىنەن جازاتىن قۇرىلعىنى سيريالىق اسكەردىڭ ارنايى جاساعى تاپقان. ول «قارا جاشىك» جاتقان ازەر تاۋىن سودىرلار باسىپ العانىن، سوندىقتان دا قۇرىلعىنى قولعا ءتۇسىرۋ قيىنعا تۇسكەنىن ايتتى. ارنايى توپ اپاتتان كەيىن ەكى كۇننەن سوڭ وقيعا بولعان جەرگە جەتكەن، دەگەنمەن اتىستىڭ سالدارىنان ولار ماقساتتارىنا جەتە الماپتى. «كەيىن جاۋىن- شاشىن بولدى. كۇن اشىلعاننان كەيىن سودىرلاردى قۋىپ، بورتتىق وزدىگىنەن جازاتىن قۇرىلعىنى الدىق. ول ماماندارعا تاپسىرىلدى»، - دەدى مۋسين.
رەسەي پرەزيدەنتى ۆلاديمير پۋتين قورعانىس ءمينيسترى سەرگەي شويگۋعا قۇرىلعىنى شەتەلدىك مامانداردىڭ كومەگىمەن اشۋدى تاپسىردى. سونىمەن قاتار، پۋتين قۇرىلعىدان الىنعان اقپارات انكاراعا دەگەن قارىم- قاتىناستى وزگەرتپەيتىنىن جەتكىزدى.
جازۋ قۇرالىنىڭ دەرەكتەرىن وقۋ ۇشاقتىڭ تۇركيا اۋە كەڭىستىگىن بۇزعانىن نەمەسە بومبالاۋشىنىڭ سيريا جەرىنەن اتىپ تۇسىرىلگەنىن ايقىنداپ بەرەدى. بۇكىل دۇنيە جۇزىندەگى بەيبىت ءومىر ءۇشىن ماڭىزى بار بۇل ايعاقتاعى مالىمەتتەردى كىمنىڭ وقىپ بەرەتىنى دە ءالى شەشىلگەن جوق، دەپ حابارلايدى informing.ru.
kaz.tengrinews.kz
