جەتىسايلىق باتىر انا 24 بالاسىنان 70 نەمەرە، 20 شوبەرە ءسۇيىپ وتىر - فوتو

تۇركىستان وبلىسى - باتىر انالاردى تۇلەتكەن بەرەكەلى ءوڭىر. وبلىستا التىن قۇرساقتى انالار كوپ. سولاردىڭ ءبىرى - 76 جاستاعى ساپاركۇل ءابۋتالىپوۆا 24 بالانى دۇنيەگە الىپ كەلگەن.

جەتىساي اۋدانىنىڭ قاراوزەك ەلدىمەكەنىندە تۇراتىن كوپبالالى انا ەڭبەككە جاستايىنان ارالاسقان.

«ادامدى ادام ەتكەن - ەڭبەك» دەيدى. جاس كەزىمىزدەن ەڭبەكپەن شۇعىلداندىق. جولداسىم جولامان ەكەۋمىز سوۆحوزدىڭ مالىن باقتىق. مال شارۋاشىلىعىندا وتاعاسى اعا شوپان، مەن كومەكشىسى بولىپ ىستەدىم. جانۇيالى بولىپ، 24 بالانى دۇنيەگە اكەلدىك. وكىنىشكە قاراي، ءومىردىڭ ءتۇرلى سىناعىنا تاپ بولىپ، 12 بالام قايتىس بولدى. اللاعا شۇكىر دەيمىن، قالعانىنىڭ بارلىعىن اياقتاندىردىق، قاتارىنان كەم قىلمادىق. نەمەرە ءسۇيىپ، شوبەرەنىڭ قولىنان ماي جالاپ وتىرمىز»، - دەيدى اق جاۋلىقتى انا.

ساپاركۇل ءابۋتالىپوۆا بۇگىندە 70 نەمەرە مەن 20 شوبەرەسىنىڭ قىزىعىن كورىپ وتىر. ءوزى ومىرىندە ءبىر رەت ۇشەمدەردى، ەكى رەت ەگىزدەردى دۇنيەگە الىپ كەلگەن. قازىر ۇل- قىزدارى قوساقتارىمەن اۋلەتتىڭ داۋلەتىن اسىرىپ، التىن قۇرساقتى انانىڭ اق باتاسىمەن ۇرپاق ءوربىتىپ كەلەدى.

«باتىر انا» مەدالىن 1979 -جىلى 17-پەرزەنتىمدى دۇنيەگە اكەلگەندە الدىم. ال، ەكىنشى «التىن القانى» ومىراۋىما تاۋەلسىزدىك تاڭى اتقان سوڭ تاقتىم. قازىر ۇل- قىزدارىم استانا، الماتى، شىمكەنت قالالارى مەن تۇركىستان وبلىسىندا ءوز ىستەرىنىڭ شەبەرى اتانىپ، كاسىپتەرىن دوڭگەلەتىپ، ناسىپتەرىن تاۋىپ ءجۇر» - دەيدى ول.

بۇگىندە باتىر انا جولداسى ەكەۋى كەنجە ۇلدارىنىڭ شاڭىراعىندا تۇرادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى