اقمولا وبلىسىندا پارا العان اكىمگە 23 ميلليون تەڭگە ايىپپۇل سالىندى
سوت ۇكىمىندە كورسەتىلگەندەي كاسىپكەرلىكپەن اينالىسىپ جۇرگەن رەسەي فەدەراتسياسىنىڭ ازاماتى جىبەك جولى اۋىلىنداعى جالدامالى تۇرعىن ءۇيدىڭ ماڭىنا تەحنيكاسىن قويعان. وسى كەزدە اۋىلدىق وكرۋگتىڭ اكىمى بولعان ق. احمادياروۆ كولىك تۇراعى جول قوزعالىسىنا كەدەرگى كەلتىرەتىنىن ايتىپ، كولىكتەرىن الۋدى ۇسىنادى.
ال كاسىپكەر بولسا، ودان ارنايى تەحنيكالارىن قوياتىن جەر تەلىمىن سۇرايدى. ەكس اكىم ول ءۇشىن تۇرعىن ءۇي قۇرىلىسىنا قاجەتتى 6 ماشينا قيىرشىق تاس جەتكىزىپ بەرۋدى تالاپ ەتەدى.
سوت وتىرىسىندا پروكۋرور مەن سوتتالۋشى اراسىندا قىلمىستى مويىنداۋ رەتىندە پروتسەسسۋالدىق كەلىسىم جاسالدى.
وسىلايشا، سوت ق. احمەدياروۆتى ق ر ق ك 366-بابىنىڭ 2- ءبولىمى بويىنشا ايىپتى دەپ تانىپ، 60 ەسە كولەمدە 23400000 تەڭگە ايىپپۇل تاعايىندادى. وعان قوسا، ەكس- اكىم ءومىر بويىنا مەملەكەتتىك قىزمەت ىستەۋ قۇقىعىنان ايرىلدى.
سوت ۇكىمى زاڭدى كۇشىنە ەنگەن جوق.
