تانىمال «كەلىن» تەلەحيكاياسىنىڭ جۇلدىزىمەن كەزدەسۋگە «حان شاتىرعا» 23 مىڭنان استام ادام جينالدى - فوتو
ۇلتتىق تەلەارنانىڭ كورەرمەندەرى سيدحارت شۋكحلانىڭ كەلۋىن اسىعا كۇتتى جانە ونى اۋەجايعا بارىپ گۇل شوقتارى مەن اسەم شارلارمەن قارسى الدى.
سيدحارتتىڭ ايتۋىنشا، مۋمبايدان شىققاندا اۋا تەمپەراتۋراسى +30 گرادۋس بولعان ەكەن. استانادا ءبىراز توڭعانىن جاسىرمادى. سوعان قاراماستان، قازاق حالقىنىڭ قوناقجايلىعى دالاداعى ايازدى قولمەن جۇلىپ العانداي. سونىمەن قوسا، ەلوردانىڭ ءزاۋلىم عيماراتتارى مەن قالىڭ قارلارى سيدحارتقا ەرەكشە اسەر ەتكەن كورىنەدى. ول قىس مەزگىلىندە شاڭعى سپورتىمەن اينالىسقاندى ۇناتاتىنىن جەتكىزدى.
28 - اقپان، سەنبى كۇنى، ساعات 15.00 دە «حان شاتىر» ساۋدا- ويىن ساۋىقتىرۋ ورتالىعىندا اكتەر كورەرمەندەرمەن كەزدەسىپ، افتوگراف- سەسسيا وتكىزدى. اكتەرمەن كەزدەسۋگە «حان شاتىرعا» 23 مىڭنان استام ادام كەلدى.
سونىمەن قاتار، 28 - اقپان كۇنى «جۇلدىزبەن كەشكى اس» ۇيىمداستىرىلىپ، وتكىزىلدى: «قازاقستان» رەسپۋبليكالىق تەلەراديوكورپوراتسياسىنىڭ ۆەب- پورتالىندا جاريالانعان ۆيكتورينا جەڭىمپازدارى استانا قالاسىنىڭ مەيرامحانالارىنىڭ بىرىندە سيدحارت شۋكحلامەن جانە تانىمال وتاندىق «قارا شاڭىراق» تەلەحيكاياسىندا باستى رولدەردىڭ ءبىرىن سومداعان اكتەرمەن كەشكى اس ءىشۋ مۇمكىندىگىنە يە بولدى.
2 - ناۋرىز، دۇيسەنبى كۇنى، «قازمەديا ورتالىعىنىڭ» 11-قاباتىندا ساعات 12.00 دە سيدحارت شۋكحلا جانە وتاندىق تانىمال «قارا شاڭىراق» تەلەحيكاياسىندا الىشەردىڭ ءرولىن سومداعان ازامات ساتىبالدى، داۋلەتتى سومداعان ءادىل احمەتوۆ، ءماديدى سومداعان داۋرەن سەرعازيننىڭ ب ا ق وكىلدەرىنە ارنالعان باسپا ءسوز ءماسليحاتى ءوتتى.
ءوز كەزەگىندە سيدحارد شۋكحلا «قازاقستانعا كەلەتىن كەزىمدە نە كۇتەرىمدى بىلمەدىم. دەگەنمەن، ۇشاقتان تۇسكەننەن باستاپ قازاقستاننىڭ عاجاپ مەملەكەت ەكەنىن، ادامدارىنىڭ قوناقجاي ەكەندىگىن بايقادىم. قازاق حالقى شىن جۇرەكتەن ريزاشىلىقپەن، قوناقجايلىقپەن قارسى الدى. سىزدەر دە بىزدەر سياقتى وتباسىنا ۇلكەن ءمان بەرەدى ەكەنسىزدەر»، - دەدى.
سونىمەن قاتار، ول كەلگەن ساتتەن باستاپ بىرنەشە فوتوسەسسياعا قاتىسىپ، ءتىپتى، كەيبىر ادامداردىڭ سۋرەتكە تۇسۋدەن شارشاعان جوقسىڭ با، دەپ سۇراعانىن ايتا كەلە: «سول ساتتەردە اينالامداعى ادامدار، اسىرەسە، قىزدار سۇلۋلىقتارىمەن ءتانتى ەتتى. ءتىپتى، قازاقستاننان كەتكىم دە كەلمەي قالدى. وكىنىشكە وراي، بۇگىن ەلىمە ورالامىن. سىزدەردىڭ قوناقجايلىلىقتارىڭىزدى ساعىناتىن بولامىن»، - دەدى س. شۋكحلا.
تانىمالدىلىعى تۋراسىندا قويىلعان جۋرناليست ساۋالىنا سيدحارت: «اكتەر بولماس بۇرىن مەن مودەل بولدىم. ال، «كەلىن» تەلەحيكاياسى مەن تۇسكەن ءتورتىنشى تەلەحيكايا. «كەلىن» ءۇندىستاندا دا تانىمال جانە ۇزدىك تەلەحيكايالاردىڭ ءبىرى دەۋگە بولادى. جۇرتتى قىزىقتىراتىنى - تەلەحيكايانىڭ سوڭى قالاي بىتەدى. مەن ايتار ەدىم، جوعارى رەيتينگ بەرەتىن تەلەحيكايانىڭ سوڭىن نە ءۇشىن كۇتەسىزدەر؟»، - دەپ جاۋاپ بەردى.
«قازاقستاننىڭ كينويندۋسترياسى تۋرالى كوپ بىلە بەرمەيمىن. ءبىراق، سىزدەردىڭ ەلگە كەلگەلى بەرى قازاقتىڭ اكتەرلەرىمەن تانىستىم. بايقاعانىم، ولار حالىق اراسىندا وتە تانىمال، جۇرت ولاردى جاقسى كورەدى»، - دەيدى اكتەر.
ءوز كەزەگىندە ءسوز العان ا. ساتىبالدى «قارا شاڭىراق» سەريالىنا قاتىستى وي- پىكىرلەرىمەن ءبولىستى. «قارا شاڭىراقتاعى» سەناريدىڭ شىنايىلىعى، اكتەرلىك قۇرام - بىزگە ۇلكەن تاجىريبە بولدى. ءتۇسىرىلىم جۇمىستارى التى ايعا سوزىلدى. كۇن سايىن بىرگە جۇرگەندىكتەن، كەيدە ءتىپتى ءبىر- ءبىرىمىزدى سول تەلەحيكاياداعى ەسىمدەرىمىزبەن اتاپ قالىپ جۇردىك. «قارا شاڭىراق» - قازاق تەلەحيكايالارىنا جاڭاشا لەپ الىپ كەلگەن تۋىندى.
سەبەبى، ءبىز مۇندا شىنايى ويناۋدى ۇيرەندىك. مۇنىڭ الدىندا تۇسكەن تۋىندىلارىمىزدا ءسال- ءسال تەاترداعىداي اسىرەلەپ ويناۋ بولدى. نە نارسە بولسىن تاجىريبەمەن كەلەدى ەمەس پە؟ «قارا شاڭىراق» بىزگە شىنايى ويناۋدى ۇيرەتتى»، دەدى ا. ساتىبالدى.
ايتا كەتۋ كەرەك، بۇگىن «قارا شاڭىراق» تەلەحيكاياسىنىڭ سوڭعى ءبولىمى. ۇلتتىق ارنادان ساعات 21.50 دە تاماشالاي الاسىزدار.
2 - ناۋرىز كۇنى ساعات 15.00 دە سيدحارت شۋكحلا «قازاقستان» ۇلتتىق ارناسىندا تىكەلەي ەفيردەگى «ايەل باقىتى» باعدارلاماسىندا قوناقتا بولدى. سونىمەن قاتار، بۇگىن، 2 - ناۋرىزدا ساعات 23.30 دا تەلەكورەرمەندەر تانىمال جۇلدىزدى «تۇنگى ستۋديادا نۇرلان قويانبايەۆ» توك- شوۋىنان كورە الادى.
2012 - جىلدان بەرى قازاقستاندا ءۇندىنىڭ تەلەۆيزيالىق كورسەتىلىمىنىڭ «كەلىن» سەريالى ۇزدىك بولىپ كەلەدى. ادەمى كەيىپكەرلەر، جاقسى دۋبلياج، ادەمى قويىلىم رەيتينگ كورسەتكىشتەرىنىڭ وسۋىنە وڭ ىقپال جاسادى.
«كەلىن» ءۇندىستانداعى تانىمال تەلەحيكايالاردىڭ ءبىرى. كينودا الەۋمەتتىك داستۇرلەر تاقىرىبى قوزعالادى. تەلەحيكايا تۋعان ەل مەن قارا شاڭىراقتى ءسۇيىپ، اتا ءداستۇردى قۇرمەتتەۋگە شاقىرادى. بۇل تۇرعىدان العاندا، «كەلىن» تەلەحيكاياسى «قازاقستان» تەلەارناسىندا ەفيرگە شىعاتىن وتباسى مەن وتباسىلىق قۇندىلىقتاردى دارىپتەۋگە باعىتتالعان وتاندىق «قارا شاڭىراق» تەلەحيكاياسىمەن ءساتتى ۇندەسىپ جاتىر.
سيدحارت شۋكحلا مۋمبايدا دۇنيەگە كەلگەن. 34 جاستا. 2008 - جىلدان بەرى اكتەر شەبەرلىگىن شىڭداپ كەلەدى. بۇدان بۇرىن ءسان بيزنەسىندە قىزمەت اتقارعان. «جۇلدىزدارمەن ءبي بيلەۋ» شوۋىنا قاتىسقان. ۇستەل تەننيسىمەن جانە فۋتبولمەن شۇعىلدانادى. 2013 - جىلى ءۇندىنىڭ تەلەۆيزيا اكادەمياسى سيدحارتقا «جىل ءارتىسى» اتاعىن بەرگەن بولاتىن.
سول جىلى جىل سايىنعى «Zee Gold Awards» ت ۆ سىيلىعىنىڭ نۇسقاسى بويىنشا ول ەڭ «دەنەلى» اكتەر اتاندى. ءۇندىنىڭ «Stardust» كينو تۋرالى جۋرنالى 2014 - جىلى ونى كينويندۋسترياداعى ء«ۇمىت كۇتەتىن جاس اكتەرلەردىڭ ءبىرى» دەپ باعالاعان بولاتىن. ال ءۇندىنىڭ جىل سايىنعى «Filmfare Awards» كينوسىيلىعى ءۇندى تىلىندە تۇسىرىلگەن فيلمدەردەگى جەتىستىكتەرى ءۇشىن سيدحارتتى «ەرلەر دەبيۋتى-2015» سىيلىعىنا ۇسىندى. قازىرگى ۋاقىتتا سيدحارت ءۇندىنىڭ بەلگىلى پروديۋسەرى كاران دجوحارمەن ءۇش فيلمگە ءتۇسۋ ءۇشىن شارتقا قول قويدى.
