الماتىدا 23 جاسار انا ۇشەم تۋدى - فوتو
بۇگىن باقىتتى وتباسى الماتىداعى قالالىق پەريناتالدى ورتالىقتان ۇيىنە شىقتى.
ايتا كەتۋ كەرەك، انەل، ازەل، ادەل ەسىمدى ءۇش قىزدى ۇيىندە 3 جاسار اعالارى الديار كۇتىپ وتىر. ءوزىنىڭ ەرەكشە جاعدايىن ايجان مۋسينا جۇكتىلىكتىڭ 6-7 - اپتاسىندا بىلگەن.
سودان بەرى وتباسى كوز تيەدى دەپ دارىگەرلەردەن باسقا جان بالاسىنا قۇپياسىن اشپاعان. بالالاردىڭ اجەسىنىڭ ايتۋىنشا، وتباسىنىڭ تۇقىمىندا ەگىزدەن، ۇشەۋدەن تۋعان انالار بولعان. تەك ولاردىڭ كوپشىلىگى مەديتسينانىڭ السىزدىگىنەن شەتىنەپ كەتكەن.
«العاش تەكسەرىلگەن كەزىمدە ەگىز دەپ ايتقان بولاتىن. جۇرەك سوعىسىن باقىلاۋ كەزىندە ءۇشىنشى جۇرەكتىڭ ءلۇپىلى ەستىلگەن سوڭ مەنىڭ ۇشەم كوتەرىپ جۇرگەنىم بەلگىلى بولدى. قاتتى تولقىدىم»، - دەدى ا. مۋسينا. بوسانعانىنا 16 كۇن وتسە دە ايجان سابيلەرىنىڭ قايسىسى كىم ەكەنىن اجىراتا المايدى. ماماندار ۇشەمنىڭ تۋۋىن بيىلعى جىلعى تىركەلگەن العاشقى جاعداي ەكەندىگى جەتكىزدى.
«ءبىزدىڭ ورتالىقتا شالا، ۋاقىتىنان بۇرىن، بەلگىلى ءبىر پاتولوگيامەن تۋىلعان بالالارعا كۇتىم جاسالادى. سونىڭ ىشىندە ەگىز، ۇشەم تۋاتىندار دا بىزگە جىبەرىلەدى. بىزدە وسى تۇرعىدا تاجىريبە مول. بىلتىردىڭ وزىندە ورتالىق 350 ەگىز بەن 4 ۇشەمدى قابىلداعان بولاتىن. ولاردىڭ ىشىندە ەكى كەلىنشەك جاساندى ۇرىقتاندىرۋ قىزمەتىنە جۇگىنگەن. وسى جاعدايدا 23 جاسار كەلىنشەكتىڭ ۇشەم كوتەرۋى تابيعي جاعداي. نەگىزىنەن جاسى كەلگەن ايەلدەر ەگىز تۋۋعا بەيىم كەلەدى»، - دەدى قالالىق پەريناتالدىق ورتالىق ديرەكتورىنىڭ ورىنباسارى سالتانات ەربولاتوۆا.
«بالالار وتە اۋىر جاعدايدا تۋىلدى. العاشىندا جان ساقتاۋ بولىمىندە ءبىراز جاتتى. كەيىن ءوز كۇشىمەن دەمالا باستادى. بالالاردىڭ بارلىعىنىڭ سالماعى 2 كەلىدەن اسادى. وزدەرىن وتە جاقسى سەزىنىپ جاتىر. سوندىقتان، بۇگىن ولاردى پەرزەنتحانادان شىعارامىز»، - دەدى جاڭا تۋعان بالالاردىڭ پاتولوگياسى ءبولىمىنىڭ مەڭگەرۋشىسى سۆەتلانا ليسوگور.
جالپى قالا بويىنشا بىلتىر 450 ەگىز بەن 4 ۇشەم تۋعان. «ۋزد تەكسەرۋىندە دارىگەرلەر ۇشەم بولاتىنىن بىردەن ايتتى. 9 اي بويى قۇپيامىزدى ەشكىمگە اشپادىق. جۇكتىلىك بويى تۇسىك تاستاۋ قاۋپى بولدى. ۇنەمى دارىگەرلەردىڭ باقىلاۋىندا بولدىق. ەمىزگەن كەزدە عانا كىشكەنە قيىندىق تۋادى. ءبىرىن اناسى ەمىزسە، ەكەۋىن جاساندى سۇتپەن تاماقتاندىرامىز. ءارقايسىسى ءوز كەزەگىن كۇتىپ جاتادى»، - دەدى قىزداردىڭ اجەسى باقىت مۋسينا.
ەڭ جاس كوپبالالى وتباسى قازىر اۋەزوۆ اۋدانىندا تۇرادى. ۇشەمنىڭ تۋعانى جايلى پەرزەنتحانا باسشىلىعى بارلىق قۇزىرلى ورگاندارعا حابارلادى. 23 جاستاعى ايجان مۋسينا قالانىڭ مەكتەپتەرىنىڭ بىرىندە پسيحولوگ بولىپ قىزمەت ەتكەن. بالالاردىڭ اكەسى مەنەدجەر بولىپ جۇمىس جاسايدى. ازىرگە وتباسىندا جەكە باسپانا جوق.
