پاۆلودارلىق 22 جاستاعى جىگىت قۇراندى باستان-اياق جاتتاپ، قاري اتاندى

بۇل تۋرالى قر مۇسىلماندارى ءدىني باسقارماسىنان ءمالىم ەتتى، دەپ حابارلايدى قازاقپارات.

پاۆلودار مەشىتىنىڭ وكىل يمامى جولداس قوسپاق ۇلى پاۆلودار قالاسىنداعى «ءماشھۇر ءجۇسىپ قۇران جاتتاۋ ورتالىعىنىڭ» شاكىرتى ماناس جۇمالينوۆتى جينالعان جاماعات الدىندا تانىستىردى.

«جۇمالينوۆ ماناس پاۆلودار وبلىسىنىڭ تۋماسى، ءارى وسى وبلىستان شىققان ءبىرىنشى قاري بولدى. ول قاسيەتتى قۇران كارىمنىڭ 114 سۇرەسىن باسىنان- اياعىنا دەيىن تۇگەل جاتتادى. ونىسىن وبلىسىمىزداعى بىلىكتى يمامداردان قۇرالعان توپتىڭ الدىندا دالەلدەدى دە. بۇل ءبىزدىڭ ۇلكەن ماقتانىشىمىز»، - دەدى يمام.

يمامنىڭ ايتۋىنشا، قاري دەپ قۇراندى باستان-اياق جاتقا بىلەتىن، ءتاجۋيد عىلىمىن جان- جاقتى مەڭگەرگەن، جەتى قيراعاتتىڭ ءمانى مەن ەرەكشەلىكتەرىن، اياتتاردىڭ ءتافسيرى (ءتاپسىرى، ماعىناسى) مەن ءتۇسىرىلۋ تاريحىن، تولىق بىلەتىن ادامدى ايتادى.

ءوز كەزەگىندە 22 جاستاعى ماناس قۇراندى تۇگەلىمەن جاتتاپ الۋ ءۇشىن كەڭەسىن بەردى.

«كوپتەگەن باۋىرلارىمىز «قۇران جاتتاۋ ءۇشىن قانداي كەڭەس بەرەسىز؟» دەپ سۇراپ جاتادى. مەن ولارعا ءبىر عانا نەگىزگى كەڭەستى بەرەمىن - قۇراندى كوپ وقۋ قاجەت. قاريلار قۇراندى كوپ وقىپ، قايتالاي بەرۋ ارقىلى قاري بولادى. قۇران جاتتاۋ - ايانباي ەڭبەكتەنۋدى تالاپ ەتەتىن مىندەت. مەدرەسەدە وقىپ جۇرگەندە ءار كۇنى 10-12 ساعاتىمىز قۇران وقۋعا ارنالدى. ءاليحان بوكەيحان اتامىز: «ۇلتقا قىزمەت ەتۋ - مىنەزدەن» دەپتى. سوندىقتان قۇران ءسوزىن جۇرەكتە اقتىق دەمىنە دەيتىن ساقتاۋ ءۇشىن، ماحاببات تۇنعان جۇرەكپەن قاتار، اينىماس مىنەز دە كەرەك. سول ءۇشىن مىنەزدىڭ كوركەمدىگى، جۇرەكتىڭ قاجىر- قايراتى، اقىلدىڭ ساۋىتى دا كەرەك دەپ ويلايمىن»، - دەدى پاۆلودارلىق جاس قاري.

ماناس الداعى ۋاقىتتا تۇركيا ەلىندە قۇراندى يزاجاعا تاپسىرۋعا دايىندالۋدا.

بۇگىنگى تاڭدا «ءماشھۇر ءجۇسىپ قۇران جاتتاۋ ورتالىعىندا» ون شاقتى شاكىرت ءبىلىم الۋدا. ورتالىقتىڭ باعىتىنا سايكەس قۇران، قۇران ءتاپسىرى، ءتاجۋيد، اقيدا، حاديس سەكىلدى پاندەر وقىتىلادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى