ۇلانباتىر قالاسىنداعى «كوكتەمگى التىن قىران» فەستيۆالىنە بيىل بايان- ولگەيدەن 22 بۇركىتشى قاتىسادى

اتالمىش سايىس موڭعوليانىڭ استاناسى ۇلانباتىر قالاسىنىڭ «شىڭعىس حاعان سارايى» تۋريستەر كەشەنىندە ناۋرىز ايىنىڭ 4-5 - كۇندەرى ۇيىمداستىرىلماق، دەپ حابارلايدى قازاقپارات ءتىلشىسى.

داستۇرگە اينالعان ايتۋلى شاراعا قاتىساتىن بۇركىتشىلەر ۇلانباتىرعا بايان- ولگيدەن ۇشاقپەن جەتكىزىلەدى. ۇيىمداستىرۋعا قاجەتتى 20 ميلليونعا تارتا توگروگ (تەڭگەگە شاققاندا شامامەن 2.7 ميلليون) قاراجاتتى جەرگىلىكتى بيلىك بولەتىن بولدى. بيىل 11  رەت قاتارىنان وتكىزىلگەلى وتىرعان «بۇركىتشىلەر تويىن» موڭعوليا تابيعي ورتا جانە تۋريزيم مينيسترلىگى، بايان- ولگەي ايماعىنىڭ ايماق اكىمى ءىس باسقارماسى، ۇلانباتىر قالاسىنىڭ تابيعي ورتا، تۋريزيم باسقارماسى، موڭعوليا بۇركىتشىلەر قاۋىمداستىعى سەكىلدى ۇيىمدار بىرلەسىپ ۇيىمداستىرماقشى. اتالمىش مەرەكەلىك شارانىڭ ماقساتى، ەلىمىزگە كەلەتىن تۋريستەر سانىن ارتتىرۋ، موڭعول ەلىن جانە موڭعوليا قازاقتارىنىڭ بۇركىتپەن اڭ اۋلاۋ مادەنيەتىن ناسيحاتتاۋ بولىپ تابىلادى.

ال ۇيىمداستىرۋشىلار القاسىنان، موڭعوليا قۇسبەگىلەر قاۋىمداستىعىنىڭ ءتوراعاسى، تاريح عىلىمدارىنىڭ دوكتورى ەدىلحان قونىسباي ۇلىنان بيىلعى جۇرىلەتىن «بۇركىتشىلەر تويىنىڭ» ەرەكشەلىگى جايلى سۇراعان ەدىك.

 «موڭعوليا ۇكىمەتى تۋريزيم سالاسىن دامىتۋ ماقساتىندا، جىل سايىن ناۋرىزدىڭ 3-5- كۇندەرى كەيبىر ايماقتاردا كوشپەندىلەردىڭ تۇرمىس تىرشىلىگىن، مادەنيەتىن پاش ەتەتىن فەستيۆالدار ۇيىمداستىرادى. مىسالى، حوۆسگول ايماعىندا سارلىق «قوداس» سيىردىڭ، ومنوگوۆ ايماعىندا تۇيە جارىسى فەستيۆالىن، ۇلانباتىر قالاسىندا بۇركىتشىلەر تويىن وتكىزەدى. بيىلعى جىلى «كوشپەندىلەر - 2018» شاراسى اياسىندا وتەتىن اتالمىش فەستيۆال ەكى كۇنگە جالعاسادى. جىلدا ءبىر كۇن تويلاناتىن. بيىل حالىقتىڭ تىلەگى بويىنشا ءارى «بۇركىتشىلەر تويىن» تاماشالاۋشىلاردىڭ سانىنىڭ ارتۋىنا بايلانىستى وسىنداي شەشىمگە كەلدىك» ، - دەيدى ەدىلحان قونىسباي ۇلى.

 ونىڭ سوزىنشە، سايىسقا قاتىساتىن 22 بۇركىتشىنىڭ ەڭ ۇلكەنى 80 جاستاعى - باتەي اقساقال، ەڭ جاسى 14 جاستاعى - ايگەرىم. سونىمەن قاتار، بيىل بۇركىتشىلەر قۇراماسىنىڭ ساپىندا 3 قىز بالا ونەر كورسەتەدى، ولار: ايشولپان، گۇلعايىم، ايگەرىمدەر. ال سايىس بارىسىندا بۇركىت شاقىرۋ، شىرعاعا تارتۋ، بۇركىتشىلەردىڭ ابزەلدەرى مەن جابدىقتارىن سىنالتۋ قاراستىرىلعان. بۇدان بولەك، كوكپار تارتۋ، تەڭگە ءىلۋ قاتارلى ۇلتتىق ويىندار جۇرت ءۇشىن ۇيىمداستىرىلادى.

ەستەرىڭىزگە سالا كەتەيىك، «بۇركىتشىلەر تويى» جىل سايىن ناۋرىزدا ۇلانباتىر قالاسىندا، ال قازان ايىندا بايان- ولگيي ايماعىندا رەسمي تۇردە تويلانادى. بىلتىرعى جىلى شارانى جەرگىلىكتى تۇرعىندار مەن شەتەلدىكتەردى قوسا العاندا 20 مىڭعا جۋىق ازاماتتار تاماشالاعان بولاتىن.

  قۋات ۋاتحان 

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى