استانا جۇرتشىلىعى 22- اقپاندا بەلگىلى جازۋشى نۇرعوجا ورازدى اقتىق ساپارعا شىعارىپ سالادى
مارقۇممەن قوشتاسۋ ءراسىمى ساعات تاڭەرتەڭگى 10:00 دە قاليبەك قۋانىشبايەۆ اتىنداعى قازاق دراما تەاترىندا وتەدى.
مارقۇمعا قارالى اس بەرۋ وسى كۇنى ساعات 13:00 تە «ازىرەت سۇلتان» مەشىتىنىڭ اسحاناسىندا بولادى.
بۇدان بۇرىن حابارلانعانداي، 21- اقپاندا قازىرگى قازاق ادەبيەتى اقساقالدارىنىڭ ءبىرى، استانالىق بەلگىلى جازۋشى نۇرعوجا وراز 84 جاسىندا دۇنيەدەن ءوتتى.
نۇرعوجا نارىمباي ۇلى 1932-جىلى 20- قازاندا قوستاناي وبلىسى ۋريتسكي (قازىرگى سارىكول) اۋدانىنداعى «ماياك» كەڭشارىندا تۋعان. 1947-جىلى تۋعان اۋىلىنداعى جەتىجىلدىق مەكتەپتى ءبىتىرىپ، گۋريەۆ (اتىراۋ) پەدۋچيليشەسىن 1950-جىلى تامامداعان. مۇنايلى جەتىجىلدىق مەكتەبىندە ءبىر جىل مۇعالىم بولعان. 1951-جىلى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىنە تۇسكەن.
العاشقى توپتاماسى «جاس جۇرەك» (1956) اتتى جاس اقىندار جيناعىنا ەنگەن. 1956-1958- جىلدارى مەكتەپتە ۇستازدىق ەتكەن. 1958-1963- جىلدارى قوستاناي وبلىستىق گازەتىندە، 1963-1965- جىلدارى «تىڭ ولكەسى» گازەتىندە قىزمەت ەتكەن. 1965-جىلى سەلينوگراد وبلىس ارالىق بولىمشەسىنە جاۋاپتى حاتشى بولىپ تاعايىندالعان. كەيىننەن «جاڭا سارى ارقا» جۋرنالىنىڭ اشىلۋىنا مۇرىندىق بولىپ، باسىلىمنىڭ باس رەداكتورى بولىپ قىزمەت اتقاردى، تالاي جاس تالانتتارعا قامقورلىق كورسەتتى.
قازاق پوەزياسىندا ءوز ءۇنى مەن ورىنى بار اقىن نۇرعوجا وراز ادەبيەتىمىزدىڭ، جالپى رۋحانياتىمىزدىڭ دا سولتۇستىك وڭىرلەردەگى ىلگەرى-كەيىندى كەزەڭدەردەگى وركەنىنە ەرەكشە ۇلەس قوسىپ كەلە جاتقان قارىمدى قالامگەرلەردىڭ ءبىرى بولاتىن.
اسىرەسە، كەشەگى كەڭەستىك جۇيەدە نۇرعاڭ باستاعان ات توبەلىندەي عانا جەرگىلىكتى اقىن، جازۋشىلار بۇل ولكەدەگى قازاق ءدىلى مەن ءتىلىنىڭ سولعىن تارتىپ، تامىرىنان ءۇزىلىپ قالماۋىنا ايتۋداي ەڭبەكتەرىن ءسىڭىردى.
1964-جىلى جارىق كورگەن «تۇڭعىش كىتابىنان» باستاپ ارقالى شايىر قولىنان قالامىن ءبىر ساتكە دە تاستاماي، وقىرماندارىنا «شۇعىلا»، «كوڭىل كوكتەمى»، «تىڭ تۇلەگى»، «قىراندار ۇياسى»، «جاۋقازىن شاق»، «دالا دەمى» تاعى دا باسقا سوقتالى شىعارمالارىن ۇسىندى.
توپتاما ولەڭدەرى ۋكراين، ورىس، قىرعىز تىلدەرىنە اۋدارىلعان.
«قاراكۇيىك» اتتى كەسەك رومانىندا قۇبىلمالى، تولقىمالى زامان احۋالىن، قازاقتىڭ تاعدىر- تالايىن، اقيقات بولمىستى شىعارماشىلىق زەردەلىلىكپەن شىنايى سيپاتتادى.
ۇلى عابيت مۇسىرەپوۆتىڭ، ءابدىلدا تاجىبايەۆتىڭ، عافۋ قايىربەكوۆتىڭ، ساعي جيەنبايەۆتىڭ جاقىن دوستارى ساپىندا بولعان نۇراعامىزدىڭ ايتارى دا، تولعارى دا ۇشان-تەڭىز بولاتىن.
نۇرعوجا وراز قازاقستان رەسپۋبليكاسىنىڭ ەڭبەك سىڭىرگەن مادەنيەت قىزمەتكەرى، ق ر جۋرناليستەر وداعىنىڭ م. سەرالين اتىنداعى سىيلىعىنىڭ لاۋرەاتى، «استانا» جانە «تاۋەلسىزدىكتىڭ 10 جىلدىعى» مەدالدارىمەن ماراپاتتالعان. «قازاقستاننىڭ ەڭبەك سىڭىرگەن قايراتكەرى» (2006).
