قازاقستاننىڭ سولتۇستىگىندە 22 اۋىل مەكتەبى جابىلدى
وڭىردە وسى وقۋ جىلى 22 ءبىلىم ورداسى جابىلىپ، تاعى 25 ءى قايتا قۇرىلعان. بۇعان بالا سانىنىڭ ازدىعى سەبەپ. ەندى وسى اۋىلداردىڭ بالالارى جاقىن ماڭداعى ەلدى مەكەندەرگە بارىپ ءبىلىم الۋعا ءماجبۇر.
سولتۇستىك قازاقستانداعى ءبىلىم وشاقتارىنىڭ 80 پايىزى شاعىن جيناقتالعان مەكتەپتەردىڭ قاتارىنا جاتادى. وقۋشىلار سانىنىڭ ازدىعىنان ايماقتا جىلىنا كەم دەگەندە 15 وقۋ ورداسى جابىلادى ەكەن.
وبلىستىق ءبىلىم باسقارماسىنىڭ باس مامانى ىرىسجان نۇرعاليەۆانىڭ ايتۋىنشى، جابىلعان مەكتەپتەردىڭ وقۋشىلارى بۇگىنگى كۇنى مەكتەپپەن قامتاماسىز ەتىلدى.
«وقۋشىلار جاقىن ەلدى مەكەندەردە ورنالاسقان مەكتەپ جانىنداعى ينتەرناتتارعا ورنالاستىرىلدى. ال ۇيىندە جاتىپ وقيمىن دەگەن 800 وقۋشى ءۇشىن كۇندەلىكتى تاسىمالداۋ كولىگى قاراستىرىلعان»، - دەدى ول.
