استانا تۇرعىنى 21 جىل بويى بەيتانىس اداممەن نەكەدە تۇرعانىن ءبىلدى
ايەل بۇل مالىمەتتى egov.kz پورتالى ارقىلى بىلگەن.
بۇدان كەيىن ول جالعان نەكەنى جويۋ ءۇشىن تىركەۋشى ورگانعا جۇگىنگەن. الايدا وعان نەكەدە تۇرعان ازامات ە. -مەن بىرگە ازاماتتىق حال اكتىلەرىن تىركەۋ (ا ح ا ت) ورگانىنا كەلىپ، بىرلەسكەن ءوتىنىش جازۋى قاجەتتىگى تۋرالى ايتىلعان.
ال ازامات ە. ازاماتتىق حال اكتىلەرىن تىركەۋ ورگانىنا بىرگە بارۋدان ءۇزىلدى-كەسىلدى باس تارتقان.
بۇدان ءارى ايەل استانا قالاسىنىڭ ادىلەت دەپارتامەنتىنە شاعىممەن جۇگىنگەن. الايدا «اكتىلىك جازبانىڭ قاعاز نۇسقاسىندا نەكەگە تۇرعانداردىڭ قولدارى جوق» دەپ كورسەتىلگەن ۇقساس جاۋاپ العان.
وسىدان كەيىن تالاپ-ارىزبەن سوتقا بارعان. ول استانا قالاسىنىڭ اكىمشىلىك سوتىنان ازامات ە. -نى نەكەنى تىركەۋ تۋرالى اكتىلىك جازبانىڭ كۇشىن جويۋ تۋرالى قولايلى اكىمشىلىك اكتى قابىلداۋعا ماجبۇرلەۋدى سۇراعان.
«سۋديا سوتتىڭ بەلسەندى ءرولى قاعيداتىن قولدانا وتىرىپ جانە داۋدى قاراۋدىڭ قۇقىقتىق سالدارىن تۇسىندىرە وتىرىپ، تاراپتارمەن اڭگىمە جۇرگىزدى.
ناتيجەسى بويىنشا كەلىسىم بەكىتىلدى. ونىڭ شارتتارىنا سايكەس اكىمنىڭ اپپاراتى ازاماتتىق حال اكتىلەرىن تىركەۋ بولىمىندە تىركەلگەن نەكەنى تىركەۋ تۋرالى اكتىلىك جازبانىڭ كۇشىن جويۋ تۋرالى اكىمشىلىك قولايلى اكتى قابىلداۋعا مىندەتتەنەدى»، - دەلىنگەن سوت حابارلاماسىندا.
