جاس مامانداردى باسپانامەن قامتۋ ءۇشىن 21 ميلليارد تەڭگەدەن استام قاراجات ءبولىندى

بۇل تۋرالى بۇگىن ۇكىمەت وتىرىسىندا «نۇرلى جەر» باعدارلاماسى بويىنشا بايانداما جاساعان ق ر يندۋستريا جانە ينفراقۇرىلىمدىق دامۋ ءمينيسترى رومان سكليار ايتتى، دەپ حابارلايدى قازاقپارات ءتىلشىسى.

«مەملەكەت باسشىسىنىڭ «جاستار جىلىنىڭ» اشىلۋى كەزىندە بەرگەن تاپسىرمالارىن ىسكە اسىرۋ اياسىندا 2019-جىلعا استانا، الماتى جانە شىمكەنت قالالارىندا جۇمىس ىستەيتىن جاستار ءۇشىن 1 مىڭ جالدامالى پاتەر قۇرىلىسىنا 7,2 ميلليارد تەڭگە قاراستىرىلدى. وسىلايشا، جاس ماماندار ءۇشىن 3 جىلدا 3 مىڭ پاتەردىڭ قۇرىلىسىنا 21,6 ميلليارد تەڭگە قاراستىرىلىپ وتىر»، - دەدى رومان سكليار.

ءمينيستردىڭ ايتۋىنشا، بيۋجەتكە قاتىستى بارلىق ماسەلەلەردى رەسپۋبليكالىق بيۋجەت كوميسسياسى ماقۇلدادى جانە ءماجىلىستىڭ قاراۋىندا.

ايتا كەتەيىك، جاستار جىلىنىڭ اشىلۋىنا ارنالعان سالتاناتتى جيىندا ەلباسى نۇرسۇلتان نازاربايەۆ استانا، الماتى جانە شىمكەنت قالالارىندا جاستار ءۇشىن جىلىنا 1 مىڭ پاتەر سالىناتىندىعىن ايتقان ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى