قازاقتىڭ ەگىز بالاسى 21 جاستارىندا ۇشاق باسقارىپ ءجۇر

ولەگ پەن جان - ەگىزدەر. ەكەۋى دە قازاقستاننىڭ ءىرى اۋە كومپانياسىندا جۇمىس ىستەيدى. جولاۋشىلاردى ەلدىڭ ىشىندە دە، شەتەلگە دە تاسىمالدايدى. «بالا كەزىندە اسپاندى باعىندىرۋدى ارماناداعان ادام كوپ. مەن دە ارماندادىم. جاۋتىكوۆ اتىنداعى رەسپۋبليكالىق فيزيكا-ماتەماتيكا مەكتەبىن بىتىرگەننەن كەيىن مەن «Ab-inito»  پيلوتتاردى دايارلاۋ باعدارلاماسىنا قابىلداندىم. يسپانيانىڭ ۇشۋ مەكتەبىندە ارنايى دايىندىقتان ءوتتىم. 19 جاسىمدا ءبىر موتورلى ۇشاقپەن العاش رەت اۋەگە كوتەرىلدىم. سودان «كوممەرتسيالىق ۇشقىش» باعدارلاماسىن ءساتتى اياقتاپ شىقتىم. 20 جاستا مەن ەكىنشى ۇشقىش رەتىندە ءوزىمنىڭ العاشقى رەيسىمدى ورىندادىم. قازىر ەلىمىزدىڭ ءىرى اۋە كومپانياسىندا جۇمىس ىستەيمىن»، - دەيدى ولەگ جاقىپوۆ.

ونىڭ ويىنشا، قازاقستاندا مىقتى ۇشۋ مەكتەبىن اشۋعا ابدەن بولادى. ول ءۇشىن ينفراقۇرىلىم دا، ماماندار دا، قالىپتاسقان مەكتەپ تە بار. قازاقستان ءوز جەرىندە دە ۇشقىشتاردى دايارلاي الادى. وسىدان كەيىن ساحناعا ولەگتىڭ ءىنىسى - جان جاقىپوۆ شىقتى.

«ولەگ مەنەن 7 مينۋتقا ۇلكەن. سول سەبەپتى الدىمەن وعان جول بەردىم (كۇلدى). مەن دە ۇشقىش بولۋدى ارماندادىم. قازىر مەن 21 جاستامىن. جاۋتىكوۆ اتىنداعى رەسپۋبليكالىق فيزيكا-ماتەماتيكا مەكتەبىن ءتامامداعاننان كەيىن مەن پيلوتتاردى دايارلاۋ باعدارلاماسى بويىنشا يرلانديادا دايىندىقتان ءوتىپ كەلدىم. بۇگىندە «Airbus-A320» - تىڭ ەكىنشى ۇشقىشى بولىپ جۇمىس ىستەيمىن. 800 ساعاتتىق ۇشۋ تاجىريبەم بار. بارلىق رەيستەر بويىنشا ۇشىپ جۇرەمىن. دۋباي، ماسكەۋ، ىستانبۇل، دەلي،  قىزىلوردا جانە تاعى باسقا قالالارعا قاتىنايمىز. مەن ۇشاقپەن الەمدى ارالاپ، شەتەلدە وقيتىن قازاقستاندىقتاردى كورگەندە قاتتى قۋانامىن. وسىنىڭ ءوزى ەركىندىك، باسەكەگە قابىلەتتىلىك، ەكونوميكالىق تۇراقتىلىقتىڭ بەلگىسى بولسا كەرەك»، - دەپ اتاپ كورسەتتى جان جاقىپوۆ.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى