قايرات نۇرتاستىڭ بۇگىن وتەتىن كونسەرتىنە 21 مىڭنان استام بيلەت ساتىلعان

«استانا ارەنادا» وتەتىن كونسەرتكە قازىردىڭ وزىندە 21 مىڭنان استام بيلەت ساتىلعان. ال، كونسەرتتى ۇلتتىق ارنا تىكەلەي ەفيردە كورسەتۋدى جوسپارلاپ وتىر.

قايرات نۇرتاستىڭ كونسەرتىنە تيماتي، نيۋشا جانە باسقا دا شەتەلدىك انشىلەر قاتىسپاقشى. شوۋدان تۇسەتىن قارجىنىڭ ءبىراز بولىگىن ءانشى قايىرىمدىلىق ماقساتتارعا ارناماق نيەتتە. ال، شوۋدىڭ ءوزى قايرات نۇرتاستىڭ ساحنادا جۇرگەنىنىڭ 10 جىلدىعىنا ارنالىپ وتىر.

شوۋ-كونسەرتكە دايىندىققا ەكى اپتادان استام ۋاقىت كەتتى. شارانى ۇيىمداستىرۋ، وتكىزۋ جۇمىستارىنا قاتىسۋشىلاردىڭ سانى 4 مىڭنان اسادى. ولاردىڭ قاتارىندا شىعارماشىلىق ۇجىمدار دا، تەحنيكالىق ماماندار دا بار. كەشتىڭ قويۋشى رەجيسسەرى گريگوري سكوموروۆسكي.

شوۋ- كونسەرت كەزىندە «استانا ارەناعا» اپاراتىن ءبىراز جولداردا كولىكتەردىڭ جۇرۋىنە شەكتەۋ قويىلادى. بۇل تۋرالى استانا قالالىق ءى ءى د ماماندارى مالىمدەدى. دەگەنمەن، كونسەرت كەزىندە استانالىقتار ءۇشىن ارنايى اۆتوبۋستار ازىرلەنگەن.

كونسەرتتى «قازاقستان» ۇلتتىق تەلەارناسىنىڭ پورتالىنان ونلاين جۇيەسى ارقىلى تاماشالاۋدىڭ مۇمكىندىگى بار.

Kaznews.kaztrk.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى