جاستارى 21 گە تولماعان ازاماتتاردىڭ تەمەكى شەگۋىنە تىيىم سالىنادى
ۇسىنىستىڭ باستاماشىسى ءرولىن فەدەراتسيا كەڭەسىنىڭ مۇشەسى انتون بەلياكوۆ بولدى. ول مۇنى تەمەكىگە قارسى ناۋقاندى جۇرگىزۋدىڭ قوسىمشا شاراسى دەپ ەسەپتەيدى. سەناتوردىڭ مالىمەتىنشە، قازىرگى تاڭدا ر ف تۇرعىندارى تەمەكى شەگۋدىڭ جان باسىنا شاققانداعى مولشەرى بويىنشا الەمدە ءتورتىنشى ورىندا تۇر. بۇعان ەلدەگى ەر كىسىلەردىڭ 60 پايىزدان، ايەلدەردىڭ 20 پايىزدان استامىنىڭ تەمەكى شەگەتىنى ناقتى دالەل. رەسەيدە سونداي-اق تەمەكى ارقىلى قوزعان اۋرۋلاردان جىل سايىن 400-700 مىڭ ادام ارالىعىندا قايتىس بولىپ كەلەدى.
سەناتور انتون بەلياكوۆ بۇگىنگە دەيىن قالىپتاسىپ قالعان جاعدايدى بىردەن بۇزا- جارا وزگەرتىپ جىبەرۋدىڭ رەتى كەلمەيتىنىن دە ايتتى. الايدا، 2009 -جىلدان بەرى ەلدە تەمەكى شەگۋشىلەر قاتارى 3 پايىزعا ازايعانىن دا ەسكە سالا كەتۋىمىز كەرەك.
فەدەراتسيا كەڭەسىنىڭ وكىلى سوڭعى جىلدارى جوعارى وقۋ ورىندارى مەن كوللەدجدەردە وقيتىن ستۋدەنت- جاستار اراسىنداعى تەمەكى شەگۋشىلەر قاراسىنىڭ كۇرت ءوسىپ وتىرعانىنا قاتتى الاڭداۋشىلىق بىلدىرەدى. بۇل جونىندەگى كورسەتكىش شامامەن 50 پايىزدان 70 پايىزعا دەيىن وسكەن. سول سياقتى 15-19 جاس ارالىعىنداعى جاس ءوسپىرىم ۇلداردىڭ - 40، قىزداردىڭ 7 پايىزى وسى زياندى ەرمەككە تارتىلعان. ولار كۇنىنە تيىسىنشە 12 جانە 7 تەمەكى تالىن شەگىپ تۇرادى.
بۇدان بۇرىن انتون بەلياكوۆ مەملەكەتتىك دۋماعا جاستارى 21 گە تولماعان جىگىتتەر مەن قىزدارعا الكوگولدى ىشىمدىك ساتپاۋدى قاراستىراتىن زاڭ جوباسىن دا ۇسىنعان ەدى.
دەرەك، فوتو: ۆەستي. Ru.
«ەگەمەن قازاقستان»
