دۇنيەجۇزىلىك بانك قازاقستانداعى جاستار كورپۋسىن دامىتۋعا 21,7 ميلليون دوللار بولەدى
ەندى قۇجات مەملەكەت باسشىسىنىڭ قول قويۋىنا جولدانادى.
«كەلىسىمنىڭ بىرنەشە ماقساتتارى بار. بىرىنشىدەن، جاستاردى اسىرەسە، جۇمىسسىز، تابىسى از، مۇگەدەك، وسال توپتارعا جاتاتىن ساناتتاعى جاستاردى قوعام ومىرىنە تارتۋ بولىپ تابىلادى. ەكىنشىدەن، قوعامدىق پايدالى قىزمەت داعدىلارىنا وقىتۋ باعدارلامالارى ارقىلى ولاردىڭ ومىرلىك ماڭىزدى داعدىلارىن دامىتۋ كوزدەلەدى. وسىعان بايلانىستى دۇنيەجۇزىلىك بانك جاستار كورپۋسىن دامىتۋ جوباسىن قارجىلاندىرۋعا جاردەم كورسەتۋ ءۇشىن قازاقستانعا وسى كەلىسىمدە جازىلعان نەمەسە ايتىلعان تارتىپپەن 21,7 ميلليون دوللار مولشەرىندە گرانت بولەدى. گرانت تراست قورىنىڭ قاراجاتىنان قارجىلاندىرىلادى، ونى تولىقتىرۋ ءۇشىن دۇنيەجۇزىلىك تراست قورىنىڭ دونورىنان كەزەڭدەر بويىنشا جارنالار الىنىپ وتىرادى» -، دەدى ءبىلىم جانە عىلىم ءمينيسترى اسلان ءسارىنجىپوۆ.
ونىڭ ايتۋىنشا، جاستار كورپۋسىن دامىتۋ ءۇش قۇرامداس بولىكتەن تۇرادى. ونىڭ ىشىندە ءبىرىنشى كەزەڭدە 18 جانە 29 جاس ارالىعىنداعى جاستاردىڭ قوعامدىق پايدالى قىزمەتتى جۇزەگە اسىرۋعا باعىتتالعان جوبالارى قارجىلاندىرىلادى. ءار جوبانىڭ ۇزاقتىعى التى ايعا سوزىلادى، قارجىلاندىرۋ سانى بەس ادامعا دەيىن جەتەدى. جوباعا قاتىسۋشىلار اي سايىن الەۋمەتتىك ستيپەنديا الادى، ول قازىرگى اقشامەن 50-100 مىڭ تەڭگەنىڭ اراسىندا بولادى. جاستار ءۇشىن ءبىر اپتالىق قارجىلىق ساۋاتتىلىق جانە جوبانى باسقارۋ بويىنشا وقىتۋ وتكىزىلەدى.
«تۇتاستاي العاندا، جاستار كورپۋسىن دامىتۋ جوباسىنىڭ ءبىرىنشى باعىتىن جۇزەگە اسىرۋدىڭ ناتيجەسىندە رەسپۋبليكا بويىنشا 1700 جاستار جوبالارىن جۇزەگە اسىرۋ كوزدەلەدى. 8,5 مىڭ جاس ازاماتتار بۇعان تارتىلادى. سونىمەن قاتار، 100 گە جۋىق جاستار ۇيىمى وسى جۇمىسقا قاتىسادى»، - دەدى ا. ءسارىنجىپوۆ.
ال جوبانى جۇزەگە اسىرۋ ءۇشىن ىلكى وڭىرگە جاستار كوپ شوعىرلانعان الماتى، وڭتۇستىك قازاقستان، قاراعاندى جانە پاۆلودار وبلىستارى تاڭداپ الىنعان.
پارلامەنت قابىلداعان زاڭ مەملەكەت باسشىسىنىڭ قول قويۋىنا جولدانادى.
اۆتور: قانات مامەتقازى ۇلى
