دەسترۋكتيۆتى ءدىني اعىم وكىلدەرىنەن تۇراتىن ەكى قىلمىستىق توپتىڭ 20 مۇشەسى ۇستالدى - ۆيدەو

4-شىلدەدە ۇلتتىق قاۋىپسىزدىك كوميتەتى ىشكى ىستەر مينيسترلىگىمەن بىرلەسە وتىرىپ، باتىس قازاقستان وبلىسى پروكۋراتۋراسىنىڭ ۇيلەستىرۋىمەن الماتى، ورال جانە اقساي قالالارىندا ەكى قىلمىستىق توپتىڭ ءىس-ارەكەتىنىڭ جولىن كەستى.

ءۇش مەكەمە ءبىر مەزگىلدە ارنايى وپەراتسيا وتكىزدى.

بوپسالاۋ، بۇزاقىلىق جانە توناۋ كۇدىگىمەن قىلمىستىق توپتىڭ 20 مۇشەسى ۇستالدى.

ءبىرقاتار ءتىنتۋ شارالارى وتكىزىلىپ، ناتيجەسىندە اتىس جانە سۋىق قارۋ- جاراق، سونداي-اق ەسىرتكى تاركىلەندى.

الدىن الا مالىمەت بويىنشا، كۇدىكتىلەردىڭ باس پايداسى ءۇشىن بەيبىت ازاماتتاردى قورقىتقانى بەلگىلى بولدى.

ءوز كەزەگىندە جاپا شەككەندەر فيزيكالىق زورلىق- زومبىلىقتان قاۋىپتەنىپ، ىشكى ىستەر ورگاندارىنا جۇگىنبەگەن.

اتالعان توپتار - بۇرىن سوتتالعاندار جانە دەسترۋكتيۆتى ءدىني اعىم وكىلدەرىنەن قۇرالعان.

قىلمىستىق توپ مۇشەلەرى ءبىر بىرىمەن تەكەتىرەستە بولعاندارى جانە بەلگىلى ءبىر ايماقتاردا ءوز امىرلەرىن جۇرگىزۋ ءۇشىن قارۋ قولدانا وتىرىپ قاقتىعىستارعا بارعاندارى بەلگىلى.

ىسكە اسىرىلعان شارالار وڭىردەگى قىلمىستىق احۋالدىڭ جاقسارۋىنا ىقپال ەتەدى.

سوتقا دەيىنگى تەرگەۋ جالعاسىپ جاتىر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى