دەموگرافتار: بيىل حالىق سانى 20 ميلليون بولادى

جارتى جىلدان كەيىن قازاقستان حالقىنىڭ سانى 20 ميلليونعا جەتەدى. بيىل جىل باسىندا رەسپۋبليكا بويىنشا شامامەن 159 مىڭ بالا دۇنيەگە كەلدى. وسىلايشا، ەل تۇرعىندارى قازىر 19 ميلليون 880 مىڭعا جۋىقتادى.

بيبىگۇل ميراسبەك، ق ر ۇلتتىق ستاتيستيكا بيۋروسىنىڭ ساراپشىسى:

- ونداعى ەرلەر سانى 9 ميلليون 705 مىڭ ادامدى قۇراسا، ايەلدەر سانى - 10 ميلليون 173 مىڭ ادام. وسى اعىمداعى جىلدىڭ قاڭتار- مامىر ارالىعىندا جالپى تۋعان بالالار سانى 158 مىڭ 473 بالانى قۇرادى. ونىڭ ىشىندە قىز بالا - 76 مىڭ 349 بالا جانە ۇل بالالار - 82 مىڭ 124 بالا.

ءبىر ايتا كەتەرلىگى، ەل تۇرعىندارىنىڭ قاتارىنا تۇراقتى تۇردە جۇمىس ىستەپ، ءومىر ءسۇرىپ كەلە جاتقان شەتەلدىكتەر دە ەنەدى. ۇلتتىق ستاتيستيكا بيۋروسى حالىق ساناعى كەزىندە وسىنداي تۇستارىن دا ەسكەرەدى.

رۋسلان يبرايەۆ، الەۋمەتتانۋشى:

- 1993 -جىلدان باستاپ ەسەپتەيتىن بولساق، قازاقستان حالقىنىڭ سانى 5 ميلليونعا ءوستى. ءوسىم بويىنشا تۇركىستان وبلىسى، شىمكەنت، الماتى قالاسى مەن الماتى وبلىسى الدا. ءبىر تۇركىستان وڭىرىندە حالىق سانى جىل سايىن 70 مىڭ ادامعا ءوسىپ وتىرادى. ال تۋۋدىڭ ەڭ جوعارى كورسەتكىشى ماڭعىستاۋ وبلىسىندا تىركەلگەن. ەڭ تومەن كورسەتكىشى ەلىمىزدىڭ سولتۇستىگى مەن شىعىسىندا بايقالادى.

جالپى ەل بويىنشا تەك 5 ايماقتا حالىق سانى قارقىندى ءوسىپ كەلەدى. ولار - استانا، الماتى، تۇركىستان، اقتوبە جانە ماڭعىستاۋ وڭىرلەرى.

اياۋلىم ساعىنبايەۆا، دەموگراف:

- قاي قالا 4- مەگاپوليس بولۋى مۇمكىن؟ ەندى ول تۋرالى ءتۇرلى پايىم بار. ءبىرى اقتوبە دەسە، ەندى ءبىرى قاراعاندى دەيدى. دەگەنمەن دە «ميلليوننيككە» جەتۋ ءۇشىن ءتۇرلى وزگەرىس بولۋ كەرەك. ءبىز بىلەتىن شىمكەنتتىڭ «ميلليوننيك» بولۋى بۇل تابيعي وزگەرىستەردەن بۇرىن، اكىمشىلىك تەرريتوريالىق وزگەرىستەر دەيمىز عوي. سوعان بايلانىستى بولعان.

جىل باسىنان قالالىقتار 12 مىڭعا، اۋىلدىقتار نەبارى 7 مىڭعا كوبەيدى. ءىرى قالالار ىرگەدەگى وبلىس حالقىن وزىنە تارتىپ الاتىنى جاسىرىن ەمەس. وسىعان بايلانىستى مەگاپوليستەردە كوممۋنالدىق، الەۋمەتتىك جانە ينفراقۇرىلىمدىق جۇكتەمەنى وڭتايلاندىرۋ قاجەت، - دەيدى ساراپشىلار.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى