مۇحتار اۋەزوۆ سالعان گول. 20- عاسىردا تۇسىرىلگەن سۋرەت تاريحىن بىلەسىز بە؟
ال ەگەر وندا قازاق تاريحىنداعى العاش فۋتبول كلۋبتارىنىڭ ءبىرى بەينەلەنگەنىن بىلەسىز بە؟
Massaget.kz ءتىلشىسى بۇل سۇراقتارعا جاۋاپ ىزدەپ، سۋرەت تاريحىن انىقتادى.
بۇل 1913-جىلى تۇسىرىلگەن سۋرەت. تاريحي دەرەكتەرگە سۇيەنسەك، 1912-جىلى ماسكەۋدەن سەمەيگە نيكولاي كۋپريانوۆ ەسىمدى كىسى كوشىپ كەلىپ، سەمەيدەگى اتاقتى پلەشەيەۆتىڭ دۇكەنىنە قىزمەتكەر بولىپ ورنالاسقان. نيكولاي نيكولايەۆيچ ماسكەۋدەن وزىمەن بىرگە دوپ، سەتكا جانە سپورت بۇيىمدارىن اكەلىپ، فۋتبول ويىنىنا اۋەس جاستاردى جاتتىقتىرا باستايدى.
فوتو ورتالىق مەملەكەتتىك كينو-فوتوقۇجاتتار مەن دىبىس جازبالار ارحيۆىنەن. مۇحتار اۋەزوۆ وڭنان سولعا ساناعاندا 2-قاتاردا، ءۇشىنشى تۇر
ال 1913-جىلى العاش رەت قۇرامىندا م. سايداشيەۆ، ا. كارىموۆ، يۋ. نيگماتۋللين بار قازاق جانە تاتار جاستارىنان تۇراتىن «جارىس» كومانداسى قۇرىلادى. كەي دەرەكتەردە فۋتبول كلۋبىنىڭ العاشقى فورماسىن گافا بايازيتوۆا تىگىپ بەرگەن دەسە، كەي دەرەكتەردە مۇحتار اۋەزوۆ كۋپريانوۆتان ءوزى بارىپ، ارنايى كيىم تىككىزۋدى سۇراعان، ءتىپتى فورماعا «يارىش» كومانداسى. سەميپالات» دەپ جازعىزعانى ايتىلادى.
جاس وسپىرىمدەر بىرلەسىپ، جەكە فورمالارىن، ءتىپتى كوماندانىڭ ەمبلەماسىن دا ويلاستىرادى. 1914-جىلى كۇزدە سەمەيلىك توپ گيمنازيستەردىڭ مىقتى كومانداسىمەن كەزدەسىپ، جەڭىسكە جەتەدى. ال قارسىلاستار قاقپاسىنا ءبىرىنشى بوپ دوپتى مۇحتار اۋەزوۆ تۇسىرەدى. جاس مۇحتارمەن بىرگە جاسىل الاڭعا احمەتسالىم كارىموۆ (كاپيتان)، قاسىمحان مۇحامەدوۆ، يۋنۋس نيگماتۋللين، ءامىرجان سيتدىقوۆ، عابدۋلحان عابباسوۆ شىعادى. سۋرەتتىڭ ارتقى بەتىندە ورىس تىلىندە بارلىق 24 سپورتشىنىڭ اتى-ءجونى جازىلعان. بۇل جازبانى كوماندا مۇشەسى ريفكات فامزوۆ قالدىرعان. سۋرەت العاشقى جارىس الدىندا تۇسىرىلگەن.
1914-جىلى سەمەيلىكتەر العاش رەت تومسك پوليتەحنيكالىق ينستيتۋتى ستۋدەنتتەرىمەن جولداستىق كەزدەسۋ وتكىزدى. بۇل - قازاقستان فۋتبولىنىڭ كىندىگى كەسىلگەن جىل.
فوتو sports.ru سايتىنان. مۇحتار اۋەزوۆ ورتاسىندا
«مۇحتار اۋەزوۆ جانە سپورت ونەرى» كىتابىنىڭ اۆتورى ءومىرزاق سۇلتانوۆ سۋرەتتەگى ەمبلەماعا نازار اۋدارادى.
«سۋرەتتىڭ جوعارى جاعىنداعى اق دوڭگەلەكشە ورتاسىنداعى جازۋ «يارىش» (قازاقشا جارىس – ە س ك.) دەگەن ءسوز ەكەن. ءبىزدىڭ ويىمىزشا، بۇل - كوماندا ەمبلەماسى. ويىنشىلاردىڭ ارتقى جاق تورىنە ىلىنگەن تۋ ىسپەتتەس. ال تومەندە «يارىش فۋتبول كومانداسى. سەميپالات» دەپ جازىلعان»، - دەيدى ول.
مۇحتار اۋەزوۆتىڭ تەتەلەس ءىنىسى احمەت اۋەزوۆ «جاس مۇحتار» ەستەلىك كىتابىندا ايگىلى جازۋشىنىڭ فۋتبولعا قالاي قادام باسقانىن اڭگىمەلەپ بەرگەن. وندا مۇحتار اۋەزوۆ جولداستارى ءناسىر مەن داكۋ ۇشەۋى نيكولاي كۋپريانوۆتى ىزدەپ بارعاندارى، اقشا جيناپ، العاش رەت دوپ ساتىپ العانى، كەيىن جارىسقا قاتىسىپ، العاشقى گول سالعانى باياندالادى.
