شىڭجاڭنان 20 قازاق وتباسى قازاقستانعا كوشىپ كەلدى

ولاردى الماتى اۋەجايىنان كۇتىپ العان «وتانداس ەل» قوعامدىق بىرلەستىگىنىڭ جەتەكشىسى مۇقان مامىتحان وسىدان بەس جىل بۇرىن كوشى- قون شاقىرتۋىن جىبەرگەندەرىن ايتادى.

- 2017-2018 -جىلى قىتايدا تۇراتىن 100 ۇيگە كوشى- قون شاقىرتۋىن جىبەرگەن ەدىك. سونىڭ العاشقى بولىگى كەلىپ جەتتى. ءبىزدىڭ ەسەبىمىز بويىنشا جىل سوڭىنا دەيىن شاقىرتۋ جىبەرگەندەر تۇگەل كەلىپ بولۋعا ءتيىس، - دەيدى مۇقان مامىتحان.

كوشىپ كەلگەندەردىڭ ءبىرى 59 جاستاعى ورالتاي نۇردىناي قۇلجا قالاسىنان كەلگەن. وتباسىندا جەتى ادام بار. ايتۋىنشا، قىتاي بيلىگى قازىر تەك وتباسىمەن تولىق كوشەتىندەرگە عانا رۇقسات بەرىپ وتىر.

- قۇلجادان ءۇرىمجى- شىڭدۋ ارقىلى ءتورت كۇن ءجۇرىپ كەلدىك. اتاجۇرتقا جەتكەنىمىزگە قۋانىشتىمىز. الداعى جوسپاردى تۋىستارمەن اقىلداسىپ شەشەمىز، - دەدى ول تەلەفون ارقىلى.

اقپاراتقا قاراعاندا، 20 وتباسى ۋاقىتشا الماتى وبلىسىنا ورنالاستىرىلادى.

2019 -جىلدىڭ سوڭىنا قاراي شەكارا اشىلىپ، قازاقستانعا ون شاقتى وتباسى كوشىپ كەلگەنىمەن، 2020 -جىلدان باستاپ پاندەمياعا بايلانىستى كوش قايتا توقتاعان بولاتىن.

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، 2022 -جىلدىڭ 1-قاڭتارى مەن 1-اقپانى ارالىعىندا قازاقستانعا وزگە ەلدەردەن 1820 قازاق ورالىپ، قانداس مارتەبەسىن العان، 200 دەن استامى قىتايدان كەلگەن. 1991 -جىلدان بەرى شەتتە جۇرگەن 1 ميلليون 89,7 مىڭ قازاق تاريحي وتانىنا ورالعان.

نۇرتاي لاحان ۇلى

azattyq.org

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى