قازاقستاندىق 20 جوعارى وقۋ ورنى پرەزيدەنتتىك وليمپيادا جەڭىمپازدارىنا گرانتتار ءبولدى

وليمپيادانىڭ رەسپۋبليكالىق كەزەڭى جاراتىلىستانۋ - ماتەماتيكالىق باعىتتاعى پاندەر بويىنشا 15-18 قاراشا ارالىعىندا ءوتتى.

زياتكەرلىك سايىستىڭ قورىتىندىسى بويىنشا 48 وقۋشى جەڭىمپاز جانە جۇلدەگەر اتاندى. ق ر ب ع م I دارەجەلى ديپلومدارىمەن — 11 وقۋشى، II دارەجەلى ديپلومدارمەن — 15 وقۋشى جانە III دارەجەلى ديپلومدارمەن 22 وقۋشى ماراپاتتالدى.

«ءبىلىم جانە عىلىم مينيسترلىگى مەملەكەت باسشىسىنىڭ تاپسىرماسى بويىنشا دارىندى بالالاردى قولداۋ بويىنشا شارالار قابىلداپ جاتىر. قازاقستاندىق 20 جوعارى وقۋ ورنى پرەزيدەنتتىك وليمپيادانىڭ جەڭىمپازدارى مەن جۇلدەگەرلەرىن قولداۋعا نيەت ءبىلدىرىپ، ولارعا ارنايى گرانتتار ءبولدى. بۇل وليمپيادا وتكىزۋ بارىسىندا دارىندى بالالاردى كوتەرمەلەۋ ءۇشىن قولعا الىنعان العاشقى تەڭدەسسىز شارا. مۇنداي قولداۋ دارىندى بالالاردىڭ الەۋەتىن ىسكە اسىرۋعا جانە ەلىمىزدىڭ ادامي كاپيتالىن دامىتۋعا قوماقتى ۇلەس قوسۋعا مۇمكىندىك بەرەدى. سونداي-اق وقۋشىلار ق ر ب ع م ديپلومدارىن، مەدالدار مەن قازاقستاندىق جوعارى وقۋ ورىندارىندا ءبىلىم الۋ سەرتيفيكاتتارىن الدى. وقۋشىلارىمىزدىڭ ناتيجەلەرى ەل ىشىندەگى، ءتىپتى ءتۇرلى حالىقارالىق وليمپيادالاردا دا جاقسارىپ كەلە جاتقانىن اتاپ وتكەن ءجون»، - دەدى «دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى تيمۋر نۇركەشوۆ.

ەستەرىڭىزگە سالا كەتەيىك، ⅩⅣ پرەزيدەنتتىك وليمپيادانىڭ رەسپۋبليكالىق كەزەڭى ە. ا. بوكەتوۆ اتىنداعى قاراعاندى ۋنيۆەرسيتەتىندە ءوتتى.

زياتكەرلىك بايقاۋعا ەلىمىزدىڭ بارلىق وڭىرىنەن وڭىرلىك جانە ىرىكتەۋ كەزەڭدەرىنىڭ ناتيجەسى بويىنشا ىرىكتەلگەن 182 وقۋشى قاتىستى.

وقۋشىلارعا ءتورت ءپان بويىنشا تاپسىرمالار بەرىلدى: ماتەماتيكا، فيزيكا، حيميا جانە بيولوگيا.

پرەزيدەنتتىك وليمپياداعا قاتىسۋشىلاردىڭ جۇمىسىن قازاقستاننىڭ جەتەكشى جوعارى وقۋ ورىندارىنىڭ ماماندارى، حالىقارالىق وليمپيادالارىنىڭ جەڭىمپازدارى مەن جۇلدەگەرلەرى باعالادى.

بارىنشا اشىقتىقتى قامتاماسىز ەتۋ ءۇشىن كونكۋرس ونلاين كورسەتىلدى.

پرەزيدەنتتىك وليمپيادانىڭ جەڭىمپازدارى مەن جۇلدەگەرلەرىنەگرانت بەرگەن 20 جوعارى وقۋ ورنىنىڭ ءتىزىمى:

1. اكادەميك ە. ا. بوكەتوۆ اتىنداعى قاراعاندى ۋنيۆەرسيتەتى

2. سارسەن امانجولوۆ اتىنداعى شىعىس قازاقستان ۋنيۆەرسيتەتى

3. ساتبايەۆ ۋنيۆەرسيتەتى

4. سافي وتەبايەۆ اتىنداعى اتىراۋ مۇناي جانە گاز ۋنيۆەرسيتەتى

5. م. اۋەزوۆ اتىنداعى وڭتۇستىك قازاقستان ۋنيۆەرسيتەتى

6. ح. دوسمۇحامەدوۆ اتىنداعى اتىراۋ ۋنيۆەرسيتەتى

7. رۋدنىي يندۋستريالدىق ينستيتۋتى

8. قورقىت اتا اتىنداعى قىزىلوردا ۋنيۆەرسيتەتى

9. ق. جۇبانوۆ اتىنداعى اقتوبە وڭىرلىك ۋنيۆەرسيتەتى

10. پاۆلودار پەداگوگيكالىق ۋنيۆەرسيتەتى

11. ى. التىنسارين اتىنداعى ارقالىق پەداگوگيكالىق ينستيتۋتى

12. نارحوز

13. قازاقستان-بريتان تەحنيكالىق ۋنيۆەرسيتەتى

14. م. س. نارىكبايەۆ اتىنداعى كازگيۋۋ ۋنيۆەرسيتەتى

15. الماتى مەنەدجمەنت ۋنيۆەرسيتەتى

16. وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتى

17. ش. ءۋاليحانوۆ اتىنداعى كوكشەتاۋ ۋنيۆەرسيتەتى

18. ءمىرجاقىپ دۋلاتوۆ اتىنداعى قوستاناي ينجەنەرلىك-ەكونوميكالىق ۋنيۆەرسيتەتى

19. كاسپي قوعامدىق ۋنيۆەرسيتەتى

20. قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى