قازاقپارات كۇنتىزبەسى: 20- ءساۋىر
ەستە قالار وقيعالار
1930-جىلى ب م س ب (بىرىككەن مەملەكەتتىك ساياسي باسقارما-وگپۋ) «ۇشتىگىنىڭ» شەشىمىمەن الاش قوزعالىسىنىڭ مۇحامەدجان تىنىشبايەۆ باستاعان 20 دان استام مۇشەسى جازالاندى.
وسى توپپەن بىرگە ءىستى بولعان مۇحتار اۋەزوۆ، ءۋاليحان وماروۆ، ءبىلال سۇلەيەۆ، ءالىمحان ەرمەكوۆ الدىن الا تەرگەۋ كەزىندە تۇرمەدە وتىرعان ۋاقىتى ەسەپكە الىنىپ، بوساتىلدى.
1991-جىلى اتىراۋدا الەمدەگى ەڭ تەرەڭ كەن ورنى تەڭىزدەن العاشقى ونەركاسىپتىك مۇناي ءوندىرىلدى.
1994-جىلى ت م د مەملەكەتتەرى ۇجىمدىق قاۋىپسىزدىك تۋرالى شارتى كۇشىنە ەندى. شارتقا 1992-جىلى تاشكەنتتە قازاقستان، ارمەنيا، قىرعىزستان، رەسەي، تاجىكستان جانە وزبەكستان باسشىلارى قول قويعان بولاتىن.
2000-جىلى تاشكەنتتە قازاقستاننىڭ، وزبەكستاننىڭ، قىرعىزستاننىڭ جانە تاجىكستاننىڭ پرەزيدەنتتەرى ايماقتىق قاۋىپسىزدىك ماسەلەلەرى بويىنشا كەزدەسۋ وتكىزدى.
2007-جىلى قازاقستان رەسپۋبليكاسى پرەزيدەنتىنىڭ «ەرتىس»، «وڭتۇستىك» جانە «جەتىسۋ» اتتى ءۇش الەۋمەتتىك كاسىپكەرلىك كورپوراتسيا قۇرۋ تۋرالى جارلىعى شىقتى.
الەۋمەتتىك كاسىپكەرلىك كورپوراتسيالاردىڭ باستى قىزمەتى - ينۆەستيتسيالار تارتا وتىرىپ، جەرگىلىكتى جەرلەردەگى جاڭا جوبالاردى جۇزەگە اسىرۋ. ءسويتىپ وڭىردەگى حالىقتىڭ مۇڭ- مۇقتاجىن شەشۋگە قول ۇشىن بەرۋ.
2011-جىلى ماسكەۋدەگى قازاق دياسپوراسى س. نۇرماعامبەتوۆ اتىنداعى «جاس ۇلان» رەسپۋبليكالىق مەكتەبىندە كەڭەس وداعىنىڭ باتىرى، داڭقتى قولباسشى باۋىرجان مومىش ۇلى تۋرالى جازىلعان «اڭىزعا اينالعان باتىر» اتتى كىتاپتىڭ تۇساۋكەسەرىن وتكىزدى.
2018-جىلى وڭتۇستىك قازاقستان وبلىسىنىڭ قازىعۇرت اۋدانىندا وربۇلاق شايقاسىنداعى جەڭىستىڭ 375 جىلدىعىنا ارنالىپ، ەرەكشە مەموريالدىق كەشەن بوي كوتەردى. ونىڭ حاس بەتىندە سالقام جاڭگىر حان مەن ءجالاڭتوس ءباھادۇر باتىرلارعا ارنالعان ەسكەرتكىش اشىلدى.
شىمكەنت-تاشكەنت حالىقارالىق كۇرە جولىنىڭ بويىندا سالىنعان «باتىر بابالار» مەموريالدىق كەشەنى الاڭىنىڭ سىرتقى جاعىندا بىرنەشە پاننو ورنالاسقان.
ونىڭ ءبىرى «اقتابان شۇبىرىندى، القاكول سۇلاما» اتانعان زار زاماندى بەينەلەسە، ەكىنشىسىندە وربۇلاق شايقاسىنىڭ كورىنىستەرى ايشىقتالعان. قابىرعادا ۇلى جەڭىسكە قول جەتكىزۋدە ەرەكشە كوزگە تۇسكەن ەكى قولباسشىمەن بىرگە ساردار باتىرلاردىڭ اتى-جوندەرى وشپەستەي ەتىپ، گرانيت تاسقا قاشالعان.
ال، قوس باتىرعا سالىنعان قولا ءمۇسىننىڭ بيىكتىگى 12 مەتر.
