قازاقستاندا تۇرعىن ءۇي باعاسى 20 پايىز قىمباتتاۋى مۇمكىن
بۇل نارىقتىڭ زاڭى دەيدى ەكونوميستتەر. دەگەنمەن ايىرباستاۋ بولىمشەلەرىندەگى دوللار باعامى كوتەرىلدى. بۇل تۇرعىن ءۇي نارىعىنا قالاي اسەر ەتەدى؟ سالا ماماندارىنىڭ بولجاۋىنشا، جازدا پاتەرلەردىڭ باعاسى 20 پروتسەنتكە دەيىن ءوسۋى مۇمكىن.
قازاقستاننىڭ قۇرىلىس وداعىنىڭ ءتوراعاسى تالعات ەرعاليەۆتىڭ پايىمداۋىنشا، نارىقتاعى سوڭعى وزگەرىستەرگە بايلانىستى جازدا پاتەرلەردىڭ قۇنى كوتەرىلەدى. باسپانالار 20 كە دەيىن قىمباتتاۋى ابدەن مۇمكىن. وداق ءتوراعاسىنىڭ ايتۋىنشا، قۇرىلىس زاتتارىنىڭ 60 پايىزى سىرتتان كەلەدى.
اتاپ ايتقاندا، ليفت، كەراميكا مەن وڭدەۋ جۇمىستارىنا قاجەتتى بوياۋلاردىڭ ءوزى شەتەلدەن تاسىمالدانادى. ارينە، ەلىمىزدە شىعارىلاتىن قۇرىلىس زاتتارى بار. باعاسى دا قولجەتىمدى. ءبىراق ولاردىڭ ساپاسى كوڭىل كونشىتپەيدى دەيدى ماماندار.
سوندىقتان قۇرىلىس كومپانيالارى قاجەتتى قۇرال جابدىقتى سىرتتان الادى. ال دوللاردىڭ قىمباتتاۋى، قۇرىلىس زاتتارىنىڭ قىمباتتاۋىنا اكەلەدى. بۇل ءوز كەزەگىندە باسپانالاردىڭ ءبىر شارشى مەترىنىڭ قۇنى وسەدى دەگەن ءسوز.
قىتايدان كەلەتىن يمپورت 11 پايىزعا ازايدى
قىتاي حالىق رەسپۋبليكاسىندا كوروناۆيرۋس ەپيدەمياسىنىڭ تارالۋى يمپورتقا سالىناتىن قوسىلعان قۇن سالىعىنىڭ كولەمىنە تەرىس اسەر ەتۋدە. قارجى ءمينيسترى ءاليحان سمايىلوۆ وسىلاي دەپ مالىمدەدى.
بيىل قىتايدان كەلەتىن تاۋارلار ازايعان. اتاپ ايتقاندا، اقپان ايىندا يمپورتتىڭ كولەمى وتكەن جىلمەن سالىستىرعاندا 11 پايىز تومەندەدى. ناتيجەسىندە، بۇل تاۋارلاردان تۇسەتىن كەدەندىك باج سالىقتارىنىڭ كولەمى 12 پايىز ازايدى. اقشالاي كورسەتكىشتە بۇل - 2,1 ميلليارد تەڭگە.
ءمينيستردىڭ بايانداماسىنا ساي، جىل باسىنان بەرى قىتايدان كەلەتىن اۆتوكولىكتەر سانى 24 پايىز جانە تەمىر جول كولىگى 14 پايىز كەمىدى.
بۇدان بولەك، ەۋرازيالىق ەكونوميكالىق وداق اياسىنداعى ساۋدا-ساتتىق تومەندەگەن. اقپان ايىندا وداققا مۇشە ەلدەردەن تاۋار تاسىمالدايتىن اۆتوكولىكتىڭ سانى 20 پايىز قىسقارعان. بيىل قاڭتار-اقپان ايلارىنداعى جاعداي بويىنشا جالپى ىشكى ءونىمنىڭ ءوسىمى 3,3 پروتسەنت دەڭگەيىندە.
جالپى ەل ەكونوميكاسىنىڭ شيكىزاتتىق ەمەس سالالارىندا ءوسىم بايقالادى. مىسالى، وڭدەۋشى ونەركاسىپ سەكتورىندا 9,4 پروتسەنت ءوسىم بار. ونىڭ ىشىندە كولىك جاساۋ سالاسىنداعى ءوسىم 72، جەڭىل ونەركاسىپتە 12، مۇناي وڭدەۋ سەكتورىندا 9,8 جانە مەتاللۋرگيادا 8 پروتسەنتتەن اسقان. سونداي-اق تاۋ-كەن سالاسى، تابيعي گاز ءوندىرىسى جانە قۇرىلىس پەن بايلانىس سالالارى دا بيىل وڭ ناتيجە كورسەتكەن.
ال ەندى ادەتتەگىدەي حالىق ءجيى تۇتىناتىن تاۋار باعاسىنا شولۋ جاسايمىز.
بۇگىن «نارىقتاعى باعا» ايدارىنان قاراقۇمىق قۇنىن بىلەتىن بولاسىزدار. ەڭ ارزان قاراقۇمىق قوستانايدا 275 تەڭگەدەن باستاپ ساتىلادى. پەتروپاۆلدا ونىڭ كەلىسى - 278 تەڭگە. پاۆلوداردا قاراقۇمىق جارماسى - 278 تەڭگە. ورتالىق قازاقستاندا دا ءداندى داقىلدىڭ باعاسى وسىنداي. ال كوكشەتاۋلىقتار ونى 280 تەڭگەگە ساتىپ الادى.
ەلىمىزدىڭ باتىسىندا قاراقۇمىق 40 تەڭگەگە قىمبات. شىمكەنت دۇكەندەرىندە جارمانىڭ ءبىر كيللوگرامى - 350 تەڭگە. تۇركىستان مەن وسكەمەندە دە وسىنداي باعا. ال ورالدا قاراقۇمىق - 360 تەڭگە. ەڭ قىمبات قاراقۇمىق نۇر- سۇلتاندا. ەلوردادا ول 400 تەڭگەگە ساۋدالانادى.
مۇناي باعاسىنا بولجام
وسى جىلدىڭ ەكىنشى جانە ءۇشىنشى توقساندارىندا Brent ماركالى مۇنايدىڭ باعاسى باررەلىنە 30 دوللارعا دەيىن تومەندەيدى. الەمدەگى ەڭ ءىرى ينۆەستيتسيالىق بانكتەردىڭ ءبىرى Goldman Sachs ساراپشىلارى وسىنداي بولجام جاسادى.
بۇعان دەيىن ولار Brent قۇنىن 47 دەن 53 دوللارعا باعالاعان. سونداي-اق ولار WTI سۇرىپىنداعى قارا التىننىڭ باعاسى ەكىنشى توقساندا 42 جارىم دوللاردان 29 دوللارعا دەيىن تومەندەيدى دەگەن پىكىردە. ال ءتورتىنشى توقساننىڭ باسىندا ماماندار الەمدىك مۇناي نارىعىندا قارا التىن تاپشى بولادى دەپ بولجاپ وتىر. بۇل كەزەڭدە Brent باررەلى 40 دوللار توڭىرەگىندە بولماق.
Goldman Sachs تاياۋ ارادا وپەك+ ەلدەرى مۇناي ءوندىرىسى كولەمىن قىسقارتۋ تۋرالى كەلىسىمگە كەلە المايدى. ال كەز كەلگەن جاۋاپتى شەشىمدەر، تەك باعا ودان ءارى تومەندەندەگەن جاعدايدا عانا قابىلدانادى دەگەن پىكىردە.
ۇلتتىق بانكتىڭ رەسمي دەرەگىنە ساي، دوللاردىڭ ورتاشا باعامى - 394 تەڭگە، ەۋرو 423 تەڭگە 85 تيىن، رۋبل 5 تەڭگە 53 تيىن.
