بيىل جەڭىلدەتىلگەن اۆتونەسيە ءۇشىن قوسىمشا 20 ميلليارد تەڭگە بولىنەدى

بۇل تۋرالى قازاقستان اۆتوبيزنەس قاۋىمداستىعىنىڭ وكىلدەرى حابارلادى. جەڭىلدەتىلگەن نەسيە قازاقستاندا جاسالعان كولىكتەرگە عانا بەرىلەدى. بىلتىر وسى باعدارلاما بويىنشا 17 مىڭنان استام وتانداسىمىز جاڭا كولىك الدى. ال بيىل ساتىلىم كولەمى كوبەيەدى دەگەن بولجام بار.

بيىل جەڭىلدەتىلگەن اۆتونەسيە باعدارلاماسىنا قوسىمشا 20 ميلليارد تەڭگە بولىنەدى. ونى ەلىمىزدەگى ەكىنشى دەڭگەيلى بانكتەر جۇزەگە اسىرادى. نەسيەلەۋ شارتتارى وزگەرمەگەن. ياعني قارىزدىڭ جىلدىق ۇستەمەسى - 4 پروتسەنت. 7 جىلعا بەرىلەدى. كولىك قۇنى 15 ميلليون تەڭگەدەن اسپاۋى ءتيىس.

اۆتونەسيە باعدارلاماسىنا قازاقستاندا قۇراستىرىلعان 30 ءتۇرلى كولىك ماركاسى كىرەدى. ولاردىڭ اراسىندا جەڭىل اۆتوكولىكتەر، كروسسوۆەرلەر جانە جول تاڭدامايتىن تەمىر تۇلپارلار دا بار. قاۋىمداستىق وكىلدەرىنىڭ ايتۋىنشا، باعدارلاما كەز كەلگەن ادامعا قولجەتىمدى. ءبىراق نەسيەلەۋگە بولىنگەن قارجى ءوتىنىش بەرگەندەردىڭ بارلىعىن قامتۋعا جەتىپەيدى. ويتكەنى ءبىر ايدا جەڭىلدەتىلگەن نەسيەمەن تەك 100 كولىك ساتىلۋى ءتيىس بولسا، ساتىپ الۋعا نيەتتىلەر سانى 3 مىڭنان اسادى. سوندىقتان ءبىر جىلعا بولىنگەن قارجى بىرنەشە ايدىڭ ىشىندە تولىق جاراتىلىپ كەتەدى.

ەسكە سالا كەتەيىك، اتالعان باعدارلاما ەلىمىزدە 2015 -جىلدان باستاپ جۇزەگە اسىرىلىپ كەلەدى. وسى ۋاقىت ىشىندە 15 مىڭعا جۋىق جەڭىل اۆتوكولىك جەڭىلدەتىلگەن نەسيەمەن ساتىلدى.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى