قارجىلاندىرىلعان كينولار تابىستىڭ 20 پايىزىن قايتارۋى ءتيىس - نۇرقيسا داۋەشوۆ
ورتالىققا قايتارىلعان قاراجاتتىڭ بارلىعى جاڭا جوبالار وندىرىسىنە باعىتتالادى. بۇل تۋرالى «ۇلتتىق كينونى قولداۋ ورتالىعى» كوممەرتسيالىق ەمەس اكسيونەرلىك قوعامىنىڭ قىزمەتىنە ارنالعان باسپا ءسوز كونفەرەنسياسىندا ايتىلدى، دەپ حابارلايدى قازاقپارات ءتىلشىسى.
«ۇلتتىق كينونى قولداۋ ورتالىعىنىڭ جۇمىسى تۋرالى توقتالىپ وتەيىن. بيىل قاڭتار ايىندا قابىلدانعان كينەماتوگرافيا تۋرالى زاڭ جوباسىن ازىرلەۋ بارىسىندا فرانسيا، گەرمانيا، قىتاي، رەسەي، ۇلى بريتانيا، ا ق ش، كانادا، كورەيا جانە تاعى دا باسقا جەتەكشى ءوندىرۋشى ەلدەردىڭ زاڭناماسىنىڭ وڭ تاجىريبەسى نەگىزگە الىندى»، - دەيدى «ۇلتتىق كينونى قولداۋ ورتالىعى» ك ە ا ق ديرەكتورلار كەڭەسىنىڭ ءتوراعاسى نۇرقيسا داۋەشوۆ.
ونىڭ ايتۋىنشا، بۇل زاڭ قازاقستاندىق كينەماتوگرافيانىڭ دامۋىنا مۇمكىندىك بەرەدى.
«وسى زاڭ اياسىندا «ۇلتتىق كينونى قولداۋ ورتالىعى» كوممەرتسيالىق ەمەس اكسيونەرلىك قوعامى قۇرىلدى. ورتالىقتىڭ ماقساتى - ۇلتتىق فيلمدەر شىعارۋعا باعىتتالعان مەملەكەتتىك قاراجاتتى ءتيىمدى ءبولۋ. ەكىنشى ماسەلە، ۇلتتىق كينونى مەملەكەتتىك قارجىلاندىرۋدىڭ جاڭا مودەلىن ەنگىزۋ. زاڭ قابىلدانعانعا دەيىن بارلىق كارتينالار پروكاتتى قوسىپ العاندا مەملەكەت ەسەبىنەن تولىق كولەمدە قارجىلاندىرىلعان بولسا، جاڭا زاڭ بويىنشا مەملەكەت تاراپىنان تولىق كولەمدە جوعارى الەۋمەتتىك ماڭىزى بار فيلمدەر قارجىلاندىرىلادى. باسقا كوممەرتسيالىق جوبالار ينۆەستورلار مەن جەكە كاپيتالدى تارتۋ ارقىلى ءىشىنارا قارجىلاندىرىلادى»، - دەيدى ول.
سونداي- اق، ءتوراعا جاڭا زاڭ جوباسىندا مەملەكەت جۇمساعان قاراجاتتى قايتارىپ الۋ ماسەلەسى قارالعانىن ايتتى.
«الەۋمەتتىك ماڭىزى بار فيلمدەردىڭ تۇسىرىلۋىنە % 100 قارجىلاي قولداۋ كورسەتىلگەن جوبالار پروكاتتاۋدان تۇسكەن ءتۇسىمنىڭ % 20- ىن ۇلتتىق كينونى قولداۋ مەملەكەتتىك ورتالىعىنا قايتارۋى ءتيىس. قالعان الۋشىلار قارجىنىڭ پايىزدىق اراقاتىناسىنا سايكەس كولەمدە قارجىنى قايتاراتىن بولادى. ورتالىققا قايتارىلعان قاراجاتتىڭ بارلىعى جاڭا جوبالار وندىرىسىنە باعىتتالادى»، - دەيدى نۇرقيسا داۋەشوۆ.
اۆتور: زارينا قاھارمان
