مادەنيەت مينيسترلىگىنىڭ 20 ميلليارد تەڭگەنى ءتيىمسىز جۇمساعانى انىقتالدى
مينيسترلىكتىڭ جەكەلەگەن بيۋدجەتتىك باعدارلامالارىنىڭ ىسكە اسىرىلۋى بويىنشا جۇرگىزىلگەن مەملەكەتتىك ءاۋديتتىڭ قورىتىندىسى بويىنشا ەسەپ كوميتەتىنىڭ مۇشەسى تالعات جاقان وسىلاي دەدى، دەپ حابارلايدى قازاقپارات ءتىلشىسى.
«اتاپ ايتقاندا، مينيسترلىك «قازاق ۇلتتىق حورەوگرافيا اكادەمياسىنا» 7,9 ميلليون تەڭگە كولەمىندە نەگىزسىز قوسىمشا قۇن سالىعىن (ق ق س) اۋدارعان. ول ۋاقىتتا اكادەميا ق ق س تولەۋشى بولماعان» ، - دەدى تالعات جاقان.
ونىڭ ايتۋىنا قاراعاندا، مينيسترلىكتىڭ جۇمىسىنان تاعى ءبىرقاتار كەمشىلىك تابىلعان.
«جالپى، اۋديتورلىق شارالار بويىنشا 343 ميلليون 900 مىڭ تەڭگەنىڭ قارجىلىق بۇزۋشىلىق فاكتىلەرى انىقتالدى. ورىندى جوسپاردىڭ بولماۋىنان 20 ميلليون 600 ميلليون تەڭگە ءتيىمسىز جۇمسالعان. 846 ميلليون تەڭگەنىڭ مەملەكەتتىك ساتىپ الۋى كەزىندە بۇزۋشىلىقتارعا جول بەرىلگەن. 91 پروتسەدۋرالىق بۇزۋشىلىق بولعان. اۋديت بارىسىندا ورنىنا قويىلۋى ءتيىس 10 ميلليون 900 مىڭ تەڭگەنىڭ بۇزۋشىلىقتارىن رەتتەۋ بويىنشا شارالار قابىلداندى. 333 ميلليون تەڭگەنىڭ جۇمىسى قالپىنا كەلتىرىلدى. 9 ميلليون 700 مىڭ تەڭگە وتەلدى. 75 ميلليون 400 مىڭ تەڭگە قايتارىلدى. اكىمشىلىك قۇقىقبۇزۋشىلىق سيپاتى بار 28 ءىس اكىمشىلىك ءوندىرىس ءىسىن قوزعاۋ ءۇشىن ۋاكىلەتتى ورگانعا تاپسىرىلدى» ، - دەدى تالعات جاقان.
