قازاقستاندىقتار استانانىڭ 20 جىلدىق مەرەيتويىن اتاپ وتۋدە
20 جىل، 240 اي نەمەسە 7300 كۇن... ادامزات تاريحى ءۇشىن قاس-قاعىم ءسات دەسەك تە، استانا ءۇشىن وسى 20 جىلدىق ۋاقىت - جاسامپازدىقتىڭ تاريحىنا اينالعانى شىندىق.
ەلوردانى الماتىدان اقمولاعا كوشىرۋ تۋرالى شەشىمدى 1994 -جىلعى 6 -شىلدەدە قازاقستان رەسپۋبليكاسى جوعارعى كەڭەسى قابىلداعان بولاتىن. 1997 -جىلى 10 -جەلتوقساندا ق ر استاناسى الماتى قالاسىنان اقمولا قالاسىنا رەسمي تۇردە اۋىستىرىلدى. ق ر پرەزيدەنتىنىڭ 1998 -جىلعى 6 -مامىرداعى جارلىعىمەن اقمولا اتاۋىنىڭ استانا بولىپ وزگەرتىلدى. جاڭا استانانىڭ حالىقارالىق تۇساۋكەسەرى 1998 -جىلعى 10 -ماۋسىمدا وتكەن ەدى.
مەملەكەتتىك دەڭگەيدە استانا كۇنى 2009 -جىلدان بەرى اتالىپ ءوتىپ كەلەدى.
استانانىڭ 20 جىلدىعى دەگەندە، «بۇل تويدىڭ بۇرىنعىدان وزگەرەك» بولارى ايقىن. سەبەبى، ەلوردانىڭ 20 جىلدىعىنا ارناپ قازاقستاننىڭ بارلىق وڭىرلەرى ءوزىنىڭ سىيىن تارتۋ ەتىپ جاتىر. اتاپ ايتقاندا، ەلوردانىڭ تويىنا ارناپ، اتىراۋ وبلىسى ەسىل وزەنى ارقىلى وتەتىن ۆەلوسيپەدشىلەر مەن جاياۋ جۇرگىنشىلەرگە ارنالعان جاڭا كوپىردى سىيعا تارتسا، شىعىس قازاقستان ءوڭىرى ەلورداداعى ەڭ ۇلكەن فونتاندى سالىپ بەردى. سول سەكىلدى الماتى وبلىسى جەتىسۋ ساياباعىن تارتۋ ەتتى. «شاحتەرلار قالاسى» دا سىي-قۇرمەتتەن كەندە ەمەس: قاراعاندىلىقتاردىڭ اتىنان ەلورداعا « ۇلىتاۋ» اللەياسى مەن «قازاق ەلىنە مىڭ العىس!» دەپ اتالعان مونۋمەنت ورناتىلدى. ءبىر سوزبەن، قازاقستاننىڭ قاي وبلىسى بولماسىن، باستى ورداسىنا بارىن سىيلاپ، قۇرمەتىن كورسەتۋدە.
بۇگىن ەلوردانىڭ ەلەۋلى داتاسىنا وراي بۇكىل قازاقستان جۇرتشىلىعى مەرەيلى مەرەكەنى كەڭىنەن اتاپ وتەدى. دەسە دە، استانانىڭ ءوزىنىڭ سالتاناتى مەن دۋمانى ەرەكشە بولماق. اتاپ ايتقاندا، تۇستەن كەيىن قالا شەتىندەگى «قازانات» اتشابارىندا ءدۇبىرلى بايگە ۇيىمداستىرىلسا، كەشقۇرىم قالادا وتاندىق جانە شەتەلدىك ەسترادا جۇلدىزدارىنىڭ قاتىسۋىمەن ۇمىتىلماس كونسەرتتىك كەش وتكىزىلەدى.
