ولدىگە ساناعان قارىنداسى 20 جىلدان سوڭ اعاسىنا قوڭىراۋ سوقتى
اسىلبەكتىڭ ايتۋىنشا، ونىڭ تۋعان- تۋىستارى ءۇيدىڭ كەنجەسى - جانبوتانىڭ جارىق دۇنيەدە بار ەكەندىگىنەن كۇدەر ۇزگەن. ءوزى دە اۋىق- اۋىق ەسكە الىپ وتىراتىنى بولماسا، ەندى ونى كورەمىن دەپ ويلاماعان. الايدا، كۇنى كەشە 20 جىلعا جۋىق ۋاقىت بۇرىن ايدىڭ- كۇننىڭ امانىندا كوز جازىپ قالعان كەنجە قارىنداسى قوڭىراۋ شالىپ، «مەن جانبوتامىن، اعا، بارمىن، ءتىرىمىن» دەگەندە توبەسىنەن جاي تۇسكەندەي كۇي كەشكەن.
جانبوتا شاياحمەت قىزى 1984 -جىلى دۇنيەگە كەلگەن ەكەن. 1991 -جىلى اكەسى شاياحمەت بۇرقان ۇلى قازاقستانعا موڭعوليادان العاشقى كوشتى باستاپ كەلەدى. ول كىسىنىڭ ءۇش جوعارى ءبىلىمى بار، موڭعول ەلىندە ءتۇرلى مەملەكەتتىك لاۋازىمدى قىزمەتتەر اتقارعان. اناسى عازيزا حالحاعان قىزى جوعارى ءبىلىمدى دارىگەر. عازيزا مەن شاياحمەتتەن 4 بالا تۋادى: جاندوس، زاۋرەش، اسىلبەك جانە جانبوتا.
1996 -جىلى ءساۋىر ايىندا اناسى عازيزا كوكشەتاۋ وبلىسى (سول كەزدەگى اتاۋ - رەد. ) ۆولوداروۆكا اۋدانى ءداۋقارا اۋىلىندا باس دارىگەر بولىپ ءجۇرىپ، كەنەت كوز جۇمادى. ودان سوڭ شاياحمەت بۇرقان ۇلى بالا- شاعاسىمەن كوكشەتاۋ قالاسىنا كوشىپ كەلىپ كوكشەتاۋ ۋنيۆەرسيتەتىندە، «الاش» قوعامدىق قوزعالىسىنىڭ ورتالىق اپپاراتىندا جۇمىس ىستەيدى.
2001 -جىلى 9-سىنىپ بىتىرگەن جانبوتا كوكشەتاۋداعى قازاق پەداگوگيكالىق كوللەدجىنە وقۋعا قۇجات تاپسىرۋعا كەتىپ، سول كۇيى ودان حابار بولمايدى. تۋعان- تۋىستارى «بارمىسىڭ، باۋىرىم!»، «جدي مەنيا» سىندى كوپتەگەن باعدارلامالار ارقىلى، ىشكى ىستەر ورگاندارى ارقىلى ىزدەستىرەدى، ءبىراق ەش ناتيجە شىقپايدى. 2-3 جىلدان سوڭ ءومىر اعىمىمەن ىزدەۋ جۇمىستارى دا سايابىرسي باستايدى. كەلە- كەلە ول ءتىرى دەگەن دە ءۇمىت ۇزىلەدى. الايدا، 17 جىلدان سوڭ ولدىگە سانالعان جانبوتا اعاسىن ءوزى تاۋىپ العان.
«كەشە، ياعني 1 - ءساۋىر كۇنى انامىز عازيزا مارقۇمنىڭ رۋحىنا قۇران باعىشتاپ وتىرعان ساتتە قارىنداسىمىز حابارلاسىپ، ءوزىنىڭ ءتىرى ەكەنىن، بار ەكەنىن ايتتى. اۋزىما ءسوز تۇسپەي، نە دەرىمدى بىلمەي قالدىم. 1 - ءساۋىردىڭ قالجىڭى ما دەپ تە ويلادىم. الايدا قوناقتارىم كەتكەن سوڭ سويلەسە كەلە ونىڭ بار تاعدىرىن ءبىلدىم»، - دەيدى اسىلبەك.
ءمالىم بولعانداي، جانبوتا ۇيدەن كەتكەن جولىندا ءبىر دوس قىزىمەن استانا قالاسىنا بارادى. جاستىقپەن «جۇمىسقا تۇرىپ، ءوز بەتىممەن كۇن كورەم» دەگەن شەشىم قابىلدايدى. كەيىن جاقىندارى ونى ىزدەستىرە باستاعاندا الماتىعا قاشىپ كەتەدى. الماتىدا جول كولىك وقيعاسىنا ۇشىراپ، 1,5 جىل ەمدەلەدى. سول جىلدارى قىزدارمەن بىرگە اۆتوكولىك ۇرلىعىن جاساپ، 3 جىلعا سوتتالىپ كەتەدى.
تۇرمەدەن شىققان سوڭ تالعار اۋدانىندا ءبىر قويشى جىگىتكە تۇرمىسقا شىعىپ، 2,5 جىلدان سوڭ ورتاق بالا بولماعاندىقتان اجىراسادى. وسىدان سوڭ ءوز ءومىرىن قولعا الىپ، جامانشىلىققا ۇرىندىرعان ورتادان الىستايدى. وسىنشا وقيعانى باستان كەشكەن ول اعالارىن ىزدەپ بارۋعا ءداتى بارمايدى.
قازىرگى ۋاقىتتا جانبوتا الماتى قالاسىندا جۇمىس ىستەيدى ەكەن. بىرەر كۇن بۇرىن الەۋمەتتىك جەلىدە وتىرىپ، ويدا- جوقتا ناعاشى اپكەسىنىڭ پاراقشاسىن تاۋىپ الادى. سودان بارلىق تۋىستارىنىڭ نومەرلەرىن الىپ، حابارلاسا باستايدى. اقىرى مارقۇم اناسىنىڭ ومىرگە كەلگەن كۇنىندە اعاسىمەن تىلدەسەدى.
ءبىزدىڭ كەيىپكەر اتى- ءجونىن جاننا شاياحمەتوۆا دەپ وزگەرتىپ العان كورىنەدى. سول سەبەپتى ىشكى ىستەر ورگاندارىنىڭ ىزدەۋ جۇمىستارى ناتيجە بەرمەگەن.
جاقىن كۇندەرى 20 جىلعا جۋىق ءبىر- ءبىرىن كورمەگەن اعالى- قارىنداستى ەكەۋ كەزدەسپەك...
