قازاقستانداعى جالعىز ينكاسساتور ايەل: 20 جىل بويى قولىمنان قارۋ تۇسكەن ەمەس
«قازاقپارات» ح ا ا تىلشىسىمەن بولعان سۇحباتتا ول ءوز ماماندىعىنىڭ ەرەكشەلىگى تۋرالى ايتىپ بەردى.
- اسىلاي التاي قىزى، نازىك جاندىلار اراسىندا سيرەك كەزدەسەتىن ماماندىققا قالاي كەلدىڭىز؟
- بارلىعى رەسەيدە باستالدى. ءوزىم 1965-جىلى چەليابينسك قالاسىنىڭ ناگايباك اۋدانىندا تۋدىم. بالالىق شاعىم سونداعى كۋرگاننايا سەلوسىندا ءوتتى. 1986-جىلى جەرگىلىكتى سگپتۋ-71 كولەدجىنە قابىلداندىم. جاقىندارىممەن اقىلداسا كەلە بايلانىس ماماندىعىن تاڭدادىم. قانشا دەگەنمەن، تاريحي وتانىڭا قاراي تارتىپ تۇرادى عوي. ەكى جىلدان سوڭ وقۋدى اياقتاپ، قوستانايعا قونىس اۋداردىق. وسىلايشا، قارابالىق اۋدانىنداعى پوشتا بولىمىنە قىزمەتكە تۇردىم. كەيىن باسشىلىق جۇمىسىمدى باعالاسا كەرەك، ءبولىم باستىعى ەتىپ تاعايىندادى. سودان سوڭ جاپپاي قىسقارتۋ بولىپ، جۇمىستان شىعىپ قالدىم. ءبىراق، 2001-جىلى پوشتا قىزمەتىنە قايتا شاقىردى. جاۋاپكەرشىلىگى مەن تالابى قاتاڭ جۇمىس ينكاسساتورلىقتى ۇسىندى. جالاقىسى از بولسا دا، قىزمەتى ءۇشىن قۋانا كەلىستىم. ءبىر جاعىنان، ايەلدەردىڭ دە قارۋ ۇستاي الاتىن قابىلەتى بارىن دالەلدەگىم كەلدى.
- جالپى، فەلدەگەر-ينكاسساتور مامانداردىڭ نەگىزگى مىندەتى قانداي؟
- نەگىزى، ءبىزدىڭ ماماندىقتىڭ ناقتى مىندەتتەرىن ايتۋعا بولمايدى. سەبەبى، كوپتەگەن قۇپيا قۇجاتتارمەن جۇمىس ىستەيمىز. كۇندەلىكتى قىزمەتىمىزگە جەدەل جانە ارنايى قۇجاتتاردى ءتيىستى مەكەنجايلارعا جەتكىزۋ جاتادى. قازىر مەنىمەن بىرگە ءتورت ەر ادام جۇمىس ىستەيدى. ونىڭ ۇشەۋى جۇرگىزۋشى-ينكاسساتور بولسا، تاعى ءبىر ينكاسساتور ماعان كومەكتەسەدى. مەن بۇل جىگىتتەرگە كۇنىنە قارۋ بەرىپ، نۇسقامالىق جۇمىستار جانە اتۋ وقۋ-جاتتىعۋلارىن جۇرگىزەمىن. بارلىعى - ءوز ءىسىنىڭ شەبەرلەرى.
- تاپانشا اتۋدىڭ قىر-سىرىن مەڭگەرگەن شىعارسىز؟
- جىلجىمالى بايلانىس بولىمىندە جۇرگەن وسىناۋ 20 جىلدىڭ ءبىر كۇنىندە قولىمنان قارۋ تۇسكەن ەمەس. باستاپقىدا جۇرت ينكاسساتور فورماسىن كيىپ، تاپانشا ۇستاعان ايەلگە تاڭدانا قارايتىن. قازىر كوبى اۋدانداعى قارۋ ۇستاۋعا قۇقىعى بار ايەل رەتىندە تانيدى. قازاقستانداعى جالعىز ينكاسساتور ايەل ەكەنىمدى ءبىلىپ، حابارلاسىپ جاتاتىندار دا بار. اتۋ جاعىنا كەلسەك، ءوزىمدى تولىقتاي ماقتاي الامىن. نىسانانىڭ وندىعىنا ءدوپ تيگىزگەندە، بىلىكتى قىزمەتكەر ەكەنىڭدى تاعى ءبىر سەزىنەسىڭ.
- ءسىزدىڭ جولىڭىزدى قۋعىسى كەلەتىن نازىك جاندارعا قانداي كەڭەس بەرەسىز؟
- راسىن ايتۋ كەرەك، ماماندىقتىڭ جامانى بولمايدى. ءارقايسىسىنىڭ وزىندىك قىزىقتارى بار. باستىسى، قانداي جۇمىس بولسىن، بارىڭدى سالىپ ىستەۋگە تىرىسۋ قاجەت. مەن ەكى قىز ءوسىردىم. كىشىسى 11-سىنىپتا وقيدى. ماماندىق تاڭداۋدى ولاردىڭ ءوز ەركىنە قالدىردىم. باسقا ارۋلارعا دا سولاي دەر ەدىم. جان قالاۋىن تاڭداساڭ، بارلىعى وڭىنان تۋادى. ءوز باسىم بايلانىس سالاسىندا ءجۇرىپ، جاقسى جەتىستىكتەرگە قول جەتكىزدىم. سونىڭ ءبىرى - ءتول مەرەكەمىز قارساڭىندا «التىن كوگەرشىن» سىيلىعىنا يە بولدىم. كاسىبي مامان رەتىندە ماعان بۇدان اسقان سىيلىق جوق.
- حالىقارالىق ايەلدەر مەرەكەسى تاياپ قالدى. ەلىمىزدەگى جالعىز ينكاسساتور ايەلدىڭ قۇتتىقتاۋىنا نازار سالساق...
- اجەلەر مەن انالاردى، ارۋ قىزدارىمىزدى كوكتەمنىڭ تاعى ءبىر مەرەكەسىمەن شىن جۇرەكتەن قۇتتىقتايمىن. شىندىعىندا، قانشا قارۋ اسىنعانىڭمەن، قىز جانى نازىك كەلەدى. مۇنى تاريحي كىتاپتاردان، فيلمدەردەن دە بايقاۋعا بولادى. بارشا ايەلدەر قاۋىمىنا كوكتەمگى جىلۋلىق پەن جايدارى كوڭىل تىلەيمىن!
اۆتور: قاسقىرباي قويشىمانوۆ
