الماتىدا تۇراتىن افريكالىق سۋرەتشى قالا تۇرعىندارىنا 20 كۇن ىشىندە اعىلشىن ءتىلىن ۇيرەتەدى
ونەر يەسى «20 كۇن ىشىندە اعىلشىن ءتىلىن» مەڭگەرتەتىن ارنايى ادىستەمە ويلاپ تاپقان.
بۇنداي باستاما تۇرعىندار تاراپىنان ۇلكەن قولداۋعا يە بولىپ وتىر. وقۋ كۋرسىنا ءبىر ۋاقىتتا جۇزگە جۋىق ادام قاتىسادى، دەپ حابارلايدى استانا ارناسى.
قازىرگى ۋاقىتتا بوب ۋسوروح سۋرەت ونەرىنە ەرەكشە دەن قويعان. الىس نيگەريادا تۋىلعان بوب ۋسوروح وسىدان 31 جىل بۇرىن وقۋ سالاسىندا گرانت ۇتىپ الىپ، قازاقستانعا ات باسىن بۇرادى. بۇل كەڭەس وداعىنىڭ تاراپ، اۋمالى-توكپەلى كەزەڭى بولاتىن. وقۋ بىتىرگەن سوڭ قازاقستاندا قالۋدى ۇيعارادى. ءناپاقا تابۋ ءۇشىن تاكسي جۇرگىزدى. ورىس ءتىلىن جەتىك مەڭگەرگەن ول قازاق ەلىنە اعىلشىن تىلىندە سويلەيتىن مامانداردىڭ كەرەك ەكەنىن ۇعىندى. مىنە وسى ۋاقىتتان بەرى اعىلشىن ءتىلىن ۇيرەتۋدى قولعا الادى.
«بۇل وتە قولجەتىمدى ادىستەمە. وعان ارنايى تاجىريبە جۇرگىزۋ ارقىلى قول جەتكىزدىم. مەن قازاقستانعا كەلگەن ۋاقىتتا بارلىق ادامداردىڭ اعىلشىن ءتىلىن تەز ۇيرەنگىسى كەلەتىنىن ۇعىندىم. تەزىرەك ءتىلدى مەڭگەرتۋ ءۇشىن «20 كۇن ىشىندە اعىلشىن ءتىلىن ۇيرەتۋ» باعدارلاماسىن ويلاپ تاپتىم»، - دەيدى سۋرەتشى بوب ۋسوروح.
بوب ۋسوروح تەك سۋرەتشى جانە مۇعالىم عانا ەمەس، ءتۇرلى ماماندىقتى يگەرگەن جان. ءبي مەكتەبىن اشىپ، ساباق بەرۋدى قولعا السا، بۇدان بولەك ءان جازادى. اقىندىعى تاعى بار. ءوزىنىڭ بىرنەشە سۇيىكتى ىسىمەن اينالىسسا دا، جۇرەگىندە افريكاعا دەگەن ساعىنىشى باسىلار ەمەس. ونى كورمەگە قويعان تۋىندىلارىنان بايقاۋعا بولادى. كورمەگە شىعارىلعان تۋىندىلارىندا افريكا ەلىنىڭ تۇرمىسىن بەينەلەي وتىرىپ، قازاق ەلىنىڭ دارحان دالاسىن دا كورسەتەدى.
«مىنا كارتيناعا نازار اۋدارىڭىزشى؟ قازاقستان مەن افريكالىق ستيل استاسىپ جاتىر. مىنا بەينەلەر افريكالىق ادامدار بولعانمەن، پەيزاج قازاق دالاسىنىڭ كەڭدىگىن كورسەتىپ تۇر. سۋرەت سالعاندا مۇنىڭ ءبارىن ەسكەرەمىن. بايقاساڭىز اۋىل كورىنىستەرىنە كوپ ءمان بەرەمىن. ويتكەنى كىندىك قانىمنىڭ تامعان جەرى اۋىل بولاتىن»، - دەيدى سۋرەتشى بوب ۋسوروح.
بوب ۋسوروح جاقىندا جەيدەلەر مەن ساپتىاياقتارعا سۋرەت سالۋدى قولعا الىپتى. سۇرانىس بار دەيدى. كوپ ۇزاماي قازاق تىلىندە سۇحبات بەرەتىنىن دە ايتىپ ماقتاندى. مەملەكەتتىك ءتىلدى ەركىن مەڭگەرگەن سوڭ، قازاق ءتىلدى قاۋىمعا دا اعىلشىن ءتىلىن تەز ۇيرەنەتىن ادىستەمە جاساپ شىعارماق.
