بۇگىن «قازاتوم ونەركاسىپ» ۇلتتىق اتوم كومپانياسىنا - 20 جىل
باسقارما ءتوراعاسى اسقار جۇماعاليەۆ ارىپتەستەرىن قۇتتىقتاپ، ءسوز سويلەدى، دەپ حابارلايدى اتالمىش كومپانيانىڭ قوعاممەن بايلانىس دەپارتامەنتى.
«1997 -جىلعى 14 - شىلدە كۇنى مەملەكەت باسشىسى قازاتوم ونەركاسىپتى قۇرۋ تۋرالى جارلىققا قول قويدى. وسى ۋاقىت ىشىندە اتقارىلعان قىرۋار جۇمىستاردىڭ ناتيجەسىندە قازاقستان ۋران ءوندىرىسى جونىنەن الەمدىك كوشباسشىعا اينالدى. بۇگىندە قازاقستاندىق ۋران دۇنيەجۇزىلىك اتوم ەنەرگەتيكاسى سۇرانىسىنىڭ شامامەن 40 پايىزىن قامتاماسىز ەتىپ وتىر. جاڭا ونجىلدىققا جاساعان ۇلكەن جوسپارلارىمىز بار. ءوندىرىستى ءارتاراپتاندىرۋعا تۇبەگەيلى بەت بۇرىپ، يادرولىق وتىن شىعاراتىن زاۋىت قۇرىلىسىن باستادىق. كومپانيا ەكونوميكا مەن ەلدەگى الەۋمەتتىك تۇراقتىلىقتى نىعايتۋعا باعىتتالعان ءبىرقاتار ماڭىزدى مىندەتتەردى جۇزەگە اسىرىپ كەلەدى. وسىنىڭ بارلىعى قازاتوم ونەركاسىپتىڭ كوپ ساندى ۇجىمىنىڭ ەرەن ەڭبەگىنىڭ جەمىسى. بۇل - ءبىزدىڭ ورتاق تابىسىمىز!»، - دەدى ۇلتتىق اتوم كومپانياسىنىڭ باسشىسى.
قازاتومونەركاسىپتىڭ 20 جىلدىعىن مەرەكەلەۋ اياسىندا ەنشىلەس كاسىپورىنداردىڭ 2400-دەي قىزمەتكەرى ءتۇرلى ناگرادالارعا ۇسىنىلدى. كومپانيانىڭ وركەندەۋىنە ەلەۋلى ۇلەس قوسىپ جۇرگەن ماماندار «قازاتومونەركاسىپتىڭ قۇرىلعانىنا - 20 جىل»، «اتوم سالاسىنىڭ ۇزدىگى» مەرەيتويلىق بەلگىلەرىمەن، ەنەرگەتيكا مينيسترلىگىنىڭ، «سامۇرىق- قازىنا» قورىنىڭ جانە «قازاتوم ونەركاسىپ» كومپانياسىنىڭ قۇرمەت گراموتالارى جانە العىس حاتتارىمەن ماراپاتتالدى.
قازاتوم ونەركاسىپتىڭ مەرەيتويى استانا ەكسپو-2017 كورمەسى اۋماعىنداعى «اتوم ەنەرگياسىنىڭ الەمى» پاۆيلونىندا دا مەرەكەلەندى. مۇندا ناعىز سيركتىك قويىلىم بولىپ، كورمەگە كەلۋشىلەر الدىندا اكروباتتار مەن مۋزىكانتتار ونەر كورسەتتى، ال ەڭ بەلسەندى قاتىسۋشىلار مەرەيتوي يەسىنىڭ سىيلىقتارىن الدى.
«قازاتوم ونەركاسىپ» ۇ ا ك» ا ق - قازاقستاننىڭ ۋران جانە ونىڭ قوسىندىلارىن، سيرەك مەتالدار، اتوم ەلەكتر ستانسيالارىنا ارنالعان يادرولىق وتىن، ارنايى قۇرال- جابدىقتار، تەحنولوگيالار ەكسپورتىمەن اينالىساتىن ۇلتتىق وپەراتورى. كومپانيا قىزمەتىنىڭ باستى باعىتتارى - گەولوگيالىق بارلاۋ، ۋران ءوندىرىسى، يادرولىق وتىن سيكلى ونىمدەرىن ءوندىرۋ جانە كونسترۋكتسيالىق ماتەريالدار ءوندىرىسى. بۇگىنگى تاڭدا كومپانيادا 26000-نان استام ادام ەڭبەك ەتەدى. قازاتوم ونەركاسىپ الەمنىڭ جەتەكشى ۋران ءوندىرۋشى كومپانيالارىنىڭ كوشىن باستاپ كەلەدى.
