قاتتى سۋىق 20 ادامنىڭ ءومىرىن قيدى
سوڭعى 2 كۇندە ەۋروپادا قاتتى سۋىقتان 20 دان استام ادامدى ۇسىك شالىپ قايتىس بولعان. ولاردىڭ قاتارىندا ميگرانتتار مەن تۇرعىلىقتى مەكەن-جايى جوق ازاماتتار دا بار.
ناقتىراق ايتساق، پولشادا سۋىقتان 10 ادام قايتىس بولدى. بۇل ايماقتا سىناپ باعاناسى 14- سەلسي گرادۋسقا دەيىن تومەندەگەن. ال كەيبىر وڭىرلەردە بۇل كورسەتكىش - 20 گرادۋسقا دەيىن جەتىپ وتىر.
يتاليانىڭ وڭتۇستىك-شىعىسى مەن ورتالىق بولىگىندە تابيعاتتىڭ توسىن مىنەزى 7 ادامنىڭ ءومىرىن قيدى. سونداي-اق، بۇل ەلدە سۋىقپەن قاتار قار كوشكىنى دە تۇرعىندارعا قاۋىپ توندىرۋدە.
گەرمانيانىڭ وڭتۇستىك بولىگىندەگى تاۋلى ايماقتا اۋا تەمپەرتۋراسى 26- گرادۋسقا دەيىن تومەندەگەن. سالدارىنان كوپتەگەن اۆتوكولىك جولدارى كوكتايعاققا اينالعان.
ال چەحيانىڭ استاناسى پراگادا كەشە قىستىڭ ەڭ سۋىق كۇنى بولدى. سالدارىنان 3 ازامات كوز جۇمعان. سونىمەن قاتار، بولگاريادا تابيعاتتىڭ توسىن مىنەزىنەن 3 بوسقىن قازا تاپتى.
ىستانبۇلدا جاۋعان قاردىڭ بيىكتىگى 40 سانتيمەترگە دەيىن جەتكەن. سوڭعى كۇندەرى تۇركيا ۇسكىرىك اياز بەن بوراننىڭ قۇرساۋىندا قالىپ وتىر.
سونداي-اق، ماسكەۋدە سوڭعى كۇندەرى ۇسكىرىك اياز ورنادى. مۇندا سىناپ باعاناسى 30- سەلسي گرادۋستان تومەندەپ كەتكەن. مەتەورولوگتاردىڭ ايتۋىنشا، مۇنداي اياز رەسەي استاناسىندا وسىدان 120 جىل بۇرىن بولعان ەكەن.
