ەلىمىزدە سوڭعى ءبىر اپتادا 20 دان استام ادامنىڭ اياق-قولدارى كەسىلدى
تاعى ەكى ايەلگە دالادا سۋىق ءوتىپ، كوز جۇمعان. ءبىر قاراعاندى قالاسىندا سوڭعى ەكى اپتانىڭ ىشىندە اياق- قولدارى ءۇسىپ، دارىگەردىڭ كومەگىنە جۇگىنگەندەردىڭ سانى 30 ادامعا دەيىن جەتكەن.
بۇل تۋرالى 31-ارنا حابارلادى.
قۇمارباي بولاتوۆ ءبىر جىلدىڭ ىشىندە اۋرۋحاناعا ەكىنشى مارتە ءتۇسىپ وتىر. اقپان ايىندا عانا اياعىنداعى ساۋساقتارىنان ايىرىلعان قاراعاندىلىقتىڭ ەكىنشى اياعى دا امپۋتاتسياعا ۇشىراعان. ازامات ساقىلداعان ايازدا مۇگەدەكتىكتى راسىمدەيمىن دەپ قاعازباستىلىقپەن ءجۇرىپ قالعانىن ايتادى.
«سۋىق تيگەن، پەرەوحلاجدەنيە دەيدى. اياعىمدى ەكىنشى رەت ءۇسىتىپ جىبەردىم»، - دەيدى قاراعاندى قالاسىنىڭ تۇرعىنى قۇمارباي بولاتوۆ.
قاراعاندى دارىگەرلەرى قاراشانىڭ 18 ىنەن باستاپ 22 ادامنىڭ اياق- قولى امپۋتاتسيالانعانىن ايتادى. سوزدەرىنشە، «كوبىنە قاتتى تونىپ قالعان تۇرعىندار قولدارىن بىردەن ىستىق سۋعا سالىپ جىلىتپاق بولعان»، دەيدى. ال ەمحاناعا تەك ەكى-ءۇش ساعاتتان كەيىن عانا جۇگىنگەن ەكەن.
«كەشە ساران قالاسىنىڭ تۇرعىنى ءتۇستى. جەرتولەدەگى قۇبىر جارىلىپ، جۇمىس ىستەي بەرگەن ازامات بىردەن ۇيىنە بارىپ ىستىق سۋعا وتىرىپتى. دارىگەرلەردى تەك ەكى ساعاتتان كەيىن عانا شاقىرتقان. بىزگە تۇسكەندە وتە كەش بولدى»، - دەيدى ءبىرىنشى ساناتتى دارىگەر ۆيدادي دجامالەددينوۆ.
قاراعاندى وبلىسىندا ۇسىك شالعانداردىڭ ەڭ ۇلكەنى 55 جاستا بولسا، ەڭ جاسى نەبارى 14 تە ەكەن. ال سەمەي قالاسىندا ايازدان زارداپ شەككەن توعىز ادام تىركەلگەن. ولاردىڭ كوبى اۆتوبۋس توسىپ، ايالدامادا تۇرعاندار.
اقمولا وبلىسىندا دا وسىدان 12 كۇن بۇرىن جوعالىپ كەتكەن ايەلدىڭ ءمايىتى تابىلدى. ءۇش بالانىڭ اناسى بازارگۇل 12 كۇنى ساعات 8 جارىم شاماسىندا وشاق اۋىلىنداعى ۇيىنەن شىعىپ كەتكەن. سودان كەيىن ءىز- ءتۇسسىز جوعالادى. تەك ءبىر اپتادان سوڭ بازارگۇلدىڭ دەنەسى وشاق اۋىلىنان ەكى شاقىرىم جەردەگى سايدىڭ ىشىنەن تابىلعان.
«ايەلدىڭ دەنەسىن انىقتاعان كەزدە، ۇسىكتەن قايتىس بولدى دەگەن بولجام جاسالدى. كەيىن بۇل مالىمەت ساراپتاما قورىتىندىسىمەن راستالدى»، - دەيدى اقمولا وبلىسى ىشكى ىستەر دەپارتامەنتى باسپا ءسوز قىزمەتىنىڭ جەتەكشىسى گۇلنار پينچۋك.
ال ۇسكىرىك ايازدان قورعانۋدىڭ بىرنەشە جولى بار. مىسالى:
قالىڭ ۇلتاراق
تەرموسقا ىستىق شاي قۇيىپ الىڭىز
دەنەنى قىزدىراتىن ماي
مويىنورامالمەن بەتىڭىزدى وراپ، تەرىڭىزدى قارايىپ كەتۋدەن قورعاڭىز
دارىگەرلەر ءۇسىپ قالعانداردىڭ اۋرۋى اسقىنباي تۇرعان كەزدە مەديتسينالىق كومەككە جۇگىنگەن ابزال دەيدى.
